Rusiya XİN-in rəsmisi Mariya Zaxarova ənənəvi həftəlik birifinqdə üçtərəfli bəyanatların Bakı ilə İrəvan arasında barışıq üçün alternativsiz “yol xəritəsi” olduğunu bəyan edib.
Rusiya Xarici İşlər Nazirliyinin sözçüsü Mariya Zaxarovanın bu açıqlamasını əslində Vaşinqtonda sülh dialoqunun növbəti raunduna hazırlaşan İrəvan və Bakıya xəbərdarlıq mesajı kimi qəbul etmək lazımdır. Azərbaycan və Ermənistan arasında sülh danışıqlarının əsas vasitəçi misiyasını boynuna götürən Kreml XİN rəsmisinin dili ilə barışığın onun iştirakı olmadan, kənar təşəbbüskarların dəstəyi ilə əldə olunmasının mümkünsüzlüyünü bir daha tərəflərin diqqətinə çatdırır. “Rusiya üçtərəfli bəyanatları Azərbaycan və Ermənistan arasında barışıq prosesi üçün alternativi olmayan “yol xəritəsi” hesab edir”, – deməklə Zaxarova həmçinin sülh danışıqlarının Brüssel və Vaşinqton platformalarının heç bir nəticə verməyəcəyini da vurğulamağa çalışır.
“Biz dəfələrlə bəyan etmişik ki, üçtərəfli formatda - Rusiya, Ermənistan və Azərbaycan arasında münasibətlərin normallaşdırılması üzərində işləyirik. Biz üçtərəfli bəyanatlar toplusunu proses üçün alternativsiz “yol xəritəsi” hesab edirik. Bu işin öz trekləri, danışıqlar prosesinin dinamikası, formatları və əlavə alətləri var. Biz heç nəyə məcbur etməyə çalışmırıq, plana əməl edirik”, – deyə xanım Zaxarova vurğulayıb.
XİN rəsmisinin sözlərinə görə, Azərbaycan və Ermənistanın mövqelərində yanaşmaların yaxınlaşması Rusiya üçün həmişə prioritet olaraq qalır.
Moskvanın sülh danışıqlarının intensivləşən indiki mərhələsində təşəbbüsü okeanın o üzündəki ortaq vasitəçilərə vermək istəməməsi başadüşüləndir. Amma artıq həm Bakı, həm də İrəvan sülh prosesini məntiqi sonluğa çatdırmaqda qərarlıdırlar. Bunu Moskvanın arzulamadığı məkanda baş verməsi isə onun öz problemi idi. Zamanında bu gedişatı görməli idi.
“Xalq qəzeti”