Azərbaycanın Qarabağ bölgəsində müvəqqəti yerləşdirilən Rusiya sülhməramlı kontingenti erməni silahlı separatçılarına loyal münasibət bəsləyir, təxribatçı fəaliyyətlərinə göz yumur, bəzi hallarda onları himayə edir. 

Təkcə 2023-cü il iyunun 2-də baş vermiş olayın təhlili göstərir ki, sülhməramlıların fəaliyyətsizliyi fonunda erməni avantürizmi aktivləşməkdə, yeni təxribatlar hazırlan­maqdadır. Bunun ən böyük isbatı Xocalı­dakı erməni separatçılarının sülhməram­lıların gözü önündə atəş məşqləri həyata keçirmələri, yeni qarşıdurmalara hazırlaş­malarıdır. İyunun 2-də sosial şəbəkələrdə Xocalıda atəş məşqləri həyata keçirən erməni separatçıları ilə bağlı üç videoçarx yayılıb. Həmin kadrlarda silahlı terrorçula­rın növbəti təxribatlara hazırlaşdıqları ay­dın şəkildə görünür. 

* * * 

Bəli, narahatlıq doğuran ən vacib məqam isə 10 noyabr 2020-ci il tarixli üç­tərəfli Bəyanata əsasən erməni separat­çılarını tərk-silah etməli olan sülhməram­lıların baş verənləri sadəcə seyr etmələri, terrorçulara qarşı hər hansı addımı at­mamalarıdır. 

Qarabağdan çıxmağa tələsməyən erməni separatçıların sülhməramlılar tərəfindən himayəsi ilə bağlı növbəti fakt erməni terrorçuların mütəmadi ola­raq Azərbaycan Ordusunun mövqelə­rini atəşə tutmasıdır. İyunun 2-də Azərbaycan Respublikasının Müdafiə Nazirliyi ordumuzun Kəlbəcər və Ağ­damdakı mövqelərinin atəşə tutulması ilə bağlı məlumat yayıb. Məlumatdan aydın olur ki, mövqelərimizə atəş Rusiya sül­hməramlı kontingentinin müvəqqəti yer­ləşdiyi ərazidəki separatçılar tərəfindən açılıb. Bu isə onu göstərir ki, sülhmə­ramlılar 10 Noyabr Bəyanatının şərtinə uyğun olaraq, öz üzərilərinə götürdükləri missiyanı ya yerinə yetirə bilmir, ya da bunu etmək istəmirlər. 

Erməni silahlı quldur dəstəsinin yeni təxribatlara hazırlaşdığını sübut edən üçüncü fakt onların həmin tarixdə Xankəndi-Xəlfəli-Qaybalı yolu ilə “döyüş mövqeləri”nə hərbi yüklərin daşınmasını həyata keçirməsidir. Bu dəfə də separat­çılara məxsus hərbi yükləri sülhməramlı­lar müşayiət edib və onların təhlükəsizliyi təmin olunub. 2 iyunla bağlı dördüncü fakt isə separatçıların Xankəndidə Azər­baycana etiraz məqsədi ilə çadır-qərar­gah qurmaları, bütün erməniləri müba­rizəyə səsləmələridir. 

“Kavkazski uzel” nəşrinin yaydığı mə­lumata görə, “Laçın dəhlizinin açılması uğrunda xalq hərəkatı” adlanan qurumun təşəbbüs qrupunun üzvü, bloqçu David Vanyan bildirib ki, etirazların keçirilmə­sində əsas məqsəd Laçın-Xankəndi yo­lunun girişindəki sərhəd-keçid məntəqə­sinin götürülməsinə nail olmaqdır. 

* * * 

Onu da qeyd edək ki, Xankəndidəki separatçıların bu addımı da sülhməramlı­lar tərəfindən heç bir müqavimətlə üzləş­məyib və bu gün də davam etməkdədir. 2 iyunla bağlı yuxarıda sadalanan dörd fakt erməni separatizminin yeni təxribat­lara hazırlaşdığını əyani şəkildə ortaya qoyur. Bir daha bildiririk ki, separatçıların törətdiyi və törədəcəyi təxribatlara görə bütün məsuliyyət Qarabağdakı erməni terrorçuları ilə yanaşı, həm də Rusiya sülhməramlılarının üzərinə düşür. Təbii ki, Ermənistanın siyası rəhbərliyinin də.

Seymur ƏLİYEV