Azərbaycan–İsrail əlaqələri müxtəlif sahələrdə dinamik inkişaf edir. Bu dövlətlər arasında ticarət dövriyyəsi getdikcə genişlənir, qeyri-neft məhsullarının payı yüksəlir. Lakin buna baxmayaraq, hazırda ticarət əlaqələrinin şaxələndirilməsinə ciddi zərurət duyulur, çünki ölkəmizin qeyri-neft məhsullarının İsrail bazarına ixracı üçün istifadə olunmayan böyük potensial var. Bundan başqa, investisiya, innovasiya, informasiya, kənd təsərrüfatı, ekologiya, qida, su, enerji texnologiyaları, əczaçılıq və biotexnologiya, ərzaq təhlükəsizliyi, kibertəhlükəsizlik, turizm, kiçik və orta sahibkarlıq kimi sahələrdə əməkdaşlıq üçün geniş perspektivlər mövcuddur. Mütəxəssislərin fikrincə, bu potensialın reallaşdırılması üçün özəl sektorun fəallığı artırılmalıdır. Bu baxımdan, Azərbaycan–İsrail biznes dairələri arasında keçirilən işgüzar tədbirlər xüsusi diqqət çəkir.
Ümumiyyətlə, son illər Azərbaycan–İsrail arasındakı iqtisadi əlaqələrin güclənməsi müşahidə olunur. Belə ki, ötən il iki ölkə arasındakı ticarət dövriyyəsinin 85 faiz artaraq 1 milyard 718 milyon dollara çatması, son iki ildə isə ticarət dövriyyəsinin 3,7 dəfə artması bunun bariz ifadəsidir.
Prezident İlham Əliyev və İsrail Dövlətinin Prezidenti İsxak Hersoqun mayın 30-da mətbuata bəyanatlarla çıxışlarında da iki ölkə arasında iqtisadi münasibətlər haqqında geniş bəhs edilib. Dövlətimizin başçısı bəyanatında bəzi iqtisadi rəqəmləri xatırladaraq ticarət dövriyyəsinin 1,7 milyard ABŞ dollarından çox olduğunu vurğulayıb. Ölkə rəhbəri bu göstəricini yüksək məbləğ kimi dəyərləndirib və növbəti illərdə ticarət dövriyyəsini şaxələndirməklə onun həcminin daha da artırmağa nail olunacağını diqqətə çatdırıb. Dövlətimizin başçısı daha sonra deyib: “Həyata keçiriləcəyini planlaşdırdığımız birgə layihələr nəticəsində bizim daha balanslaşdırılmış ticarət dövriyyəmiz olacaq və o, təkcə enerji amilindən asılı olmayacaq. Buna baxmayaraq, uzun illərdir ki, Azərbaycan İsrailə xam neftin etibarlı təchizatçısı olmaqda davam edir və bu da əslində enerji sahəsində sıx əməkdaşlığı nümayiş etdirir”.
Səfər çərçivəsində keçirilən görüşlərdə iki ölkə arasında enerji sahəsində əməkdaşlığın necə genişləndirilməsi məsələsi də müzakirə edilib. Bu sektorda investisiya layihələri, interkonnektorların yaradılması və üçüncü ölkələrdə potensial əməkdaşlıq layihələri üçün böyük imkanların mövcudluğu xatırladılıb.
Bu məqamda qeyd edək ki, Azərbaycan İsrailin enerji təhlükəsizliyində mühüm rol oynayır. İsrailin neft idxalının 40 faizə yaxın hissəsini respublikamız təmin edir. Bundan əlavə İsrailin Aralıq dənizi sahillərində böyük qaz rezervi–Leviathan və Tamar yataqları kəşf olunub. Azərbaycanın Dövlət Neft Şirkəti (SOCAR) İsrailin Aşdod neft yatağı bölgəsindən 5 faiz pay alıb.
Dövlətimizin başçısı mətbuata bəyanatında daha sonra bəzi irriqasiya və kənd təsərrüfatı sahəsində görülın işlər və qarşıda duran vəzifələr haqqında ətraflı danışıb. Ölkə rəhbərinin nitqində İsrailin bu sahələrdə qazandığı uğurların önəmi yüksək dəyərləndirilib və Azərbaycanın bundan yararlandığı–kənd təsərrüfatında məhsuldarlığı artırmaq üçün bu müsbət təcrübədən istifadə etmək və ixrac bazarını şaxələndirmək istəyi diqqətə çatdırılıb.
Dövlətimizin başçısı bəyanatında Azərbaycanın İsraillə bu yaxınlarda əməkdaşlığa başladığı sahələrdən biri olan kibertəhlükəsizliklə əlaqədar layihələrin əhəmiyyətini də vurğulayıb. Ölkə rəhbəri dost dövlətlə bu sahədə fəal təmasların başlanılmasını yüksək dəyərləndirib və bu məsələyə böyük əhəmiyyət verilməsini kibertəhlükəsizliyin hər bir ölkənin, o cümlədən də Azırbaycanın milli təhlükəsizliyinin mühüm hissəsi kimi prioritet xarakter daşıdığını qeyd edib.
Yeri gəlmişkən, kibertəhlükəsizliyin tətbiqi sahəsində İsrail şirkətləri böyük təcrübəyə malikdir. Buna görə də Azərbaycan Kibertəhlükəsizlik Təşkilatları Assosiasiyası (AKTA) döst ölkədə kibertəhlükəsizlik üzrə mütəxəssislərimizin hazırlanmasına böyük maraq göstərir.
Xatırladaq ki, bir müddət bundan əvvəl ölkələrimizin informasiya texnologiyaları və kibertəhlükəsizlik sahəsində qarşılıqlı əməkdaşlıq imkanlarının genişləndirilməsi “Israil Export Institute” ilə müzakirə edilib. Kibertəhlükəsizliyin təmin olunmasının hər iki ölkə üçün aktuallığı nəzərə alınaraq, bu cür görüşlərin və qarşılıqlı səfərlərin zəruriliyi xüsusi vurğulanıb. Gələcəkdə tərəflər arasında birgə işlərin görülməsi üçün danışıqların davam etdirilməsi qərara alınıb.
Azərbaycanda kibertəhlükəsizlik ekosisteminin gücləndirilməsi və potensialının artırılmasına dəstək verilməsi məqsədilə 2022-ci ildə təsis edilən AKTA özündə informasiya texnologiyaları və kibertəhlükəsizlik üzrə ixtisaslaşmış şirkət və təşkilatları birləşdirir.
Azərbaycan–İsrail əlaqələrindən danışarkən müdafiə sənayesi sahəsində uzunmüddətli əməkdaşlığı da qeyd etmək yerinə düşər. Azərbaycanın uzun illərdir ki, bu sahədə İsrailin müasir avadanlığına çıxışı var, bu da ölkəmizin müdafiə qabiliyyətinin müasirləşdirilməsini, möhkəmləndirilməsini şərtləndirir. Başqa sözlə, İsrailin müdafiə sənayesindən bəhrələnmək Prezident İlham Əliyevin vurğuladığı kimi, dövlətçiliyimizi, əsas dəyərlərimizi, milli maraqlarımızı və ərazi bütövlüyümüzü müdafiə etməyə imkan yaradır.
İsrail Dövlətinin Prezidenti İsxak Hersoqun ölkəmizə səfəri çərçivəsində iki ölkə arasında qarşılılıqlı turist axını səviyyəsinin necə qaldırılmasını da müzakirə olunub, bu sahədə müəyyən çatışmazlıqlar diqqətə çatdırılıb. Həftədə yalnız dörd reysin olduğu, belə bir göstəricinin isə yetərli sayılmadığı bildirilib. Bu problemin aradan qaldırılması məqsədilə nümayəndə heyətləri üzvlərinə uçuşların sayının artırılması ilə bağlı müvafiq göstərişlər verilib və bunun daimi əsasda gerçəkləşdirilməsinin zəruriliyi diqqətə çatdırılıb. Başqa sözlə, iki dövlət tərəfindən qarşılıqlı uçuşların turist mövsüminin qızğın çağında–yay vaxtlarında olduğu kimi, digər fəsillərdə də diqqətdə saxlanılmasının zəruriliyi xatırladılıb.
Burada bir məqamı da qeyd etmək yerinə düşər. Azərbaycanın İsraildə səfirliyinin açılması ikitərəfli münasibətlərin yeni mərhələyə yüksəldiyini göstərir. Azərbaycan Hökuməti ilə İsrail Dövləti Hökuməti arasında Birgə Komissiya, həmçinin Azərbaycanın İsraildəki Ticarət nümayəndəliyi ölkələrimiz arasında tərəfdaşlığın inkişafı üçün əhəmiyyətli platformalardır.
Ölkələrimiz tərəfindən iqtisadi-ticarət əməkdaşlığının gücləndirilməsi istiqamətində işləri hazırda uğurla davam etdirliir. İsrail Azərbaycanın əsas ticarət tərəfdaşları sırasındadır. Bu ölkə qarşılıqlı investisiya, həmçinin, energetika, kənd təsərrüfatı, İT, innovasiya, əczaçılıq, turizm və s. sahələr üzrə səmərəli əməkdaşlıq mövcuddur.
Ötən il işgüzar dairələrimiz arasında əlaqələrin genişləndirilməsi istiqamətində fəal iş aparılıb. İsrail şirkətləri ilə birgə investisiya layihələrinin reallaşdırılması uğurla gerçəkləşdirilib. İsrail şirkətləri ilə sənaye zonaları və aqroparklar, su təsərrüfatı və digər sahələr üzrə də möhkəm tərəfdaşlıq yaradılıb. Ötən müddətdə İsraillə innovativ inkişaf və rəqəmsal iqtisadiyyat sahəsində əməkdaşlıq Azərbaycan üçün xüsusi önəm daşıyıb.
Vaqif BAYRAMOV, “Xalq qəzeti”