Heç kim bizim qabağımızda dura bilmədi, bu gün də dura bilmir, sabah da dura bilməyəcək. Əgər kimsə fikirləşir ki, bizə qarşı cızılmış çirkin planlar həyata keçə bilər, səhv edir. Bizə qarşı hər bir çirkin plana bizim güclü iradəmiz, güclü siyasətimiz, müzəffər Ordumuz cavab verəcək.
Prezident İlham Əliyevin Tərtər rayonunun Talış kəndindən Novruz bayramı münasibətilə Azərbaycan xalqına müraciətindən.
2023-cü ildə özünün hərbi büdcəsini 47 faiz artıraraq ilk dəfə 1 milyard dolları keçən Hayastan ordunu silahlandırmaqla məşğuldur. Rusiya hərbi texnikasına artıq güvənməyən rəsmi İrəvan axtardığı silah-sursatı uzaq Hindistanda tapıb və Dehli ilə üçillik müqavilə imzalayıb.
Sülhə gəlməyə tələsməyən, danışıqlar prosesini süni şəkildə uzadan və bununla vaxt udmağa çalışan Hayastan başbilənləri, deyəsən, Azərbaycana qarşı yeni hərbi əməliyyatlara getmək planından əl çəkməyiblər. Görünür, iki il altı ay bundan əvvəl qazandığımız Qələbə sayəsində bölgədə yaratdığımız yeni reallığı həzm edə bilməyən daşnaklara bir hərbi dərs kifayət etməyib. Rəsmi Bakının xoşməramlı addımlarını, sülh təkliflərini sağlam məntiqlə dəyərləndirmək əvəzinə, İrəvanın baş vurduğu “hərbi fəaliyyət taktikası” ona dəlalət edir ki, haylar 44 günlük müharibədəkı acı məğlubiyyətdən nəticə çıxarmayıb. Bu, azmış kimi, İrəvandan revanş çağırışları, yeni müharibəyə hazırlığın anonsları eşidilir.
İrəvan Rusiya silahına alternativ tapıb
Həm 2020-ci ilin 27 sentyabrına qədər, həm 44 günlük savaşda, həm də postmüharibə dövründə silah tədarükü ilə bağlı öhdəlikləri yerinə yetirmədiyinə görə Rusiyanı ittiham edən Paşinyan hökuməti ölkəyə silah idxalının qarşısını aldığına görə Azərbaycanın ünvanına hədyanlar yağdırırdı. Nəhayət, Paşinyanın komandası axtardığı silah-sursatı Hindistanda tapıb. Artıq yerli mediaya bu barədə məlumatlar sızdırılıb. Dehli və İrəvan arasında silah tədarükünə dair müqavilənin imzalandığı faktdır. Hayların mətbuatı Hindistanın “The Economic Times” nəşrinə istinadla, hətta, bu hərbi sövdələşmənin bəzi detallarını açıb. İrəvanla Dehli arasında hərbi müqavilə keçən il sentyabrın əvvəllərində imzalanıb. Razılaşmaya əsasən, Hindistan yaxın 3 ildə Ermənistana təxminən 250 milyon dollarlıq silah tədarük edəcək. Burada söhbət əsasən “Pinaka” raket sistemlərinin və onlara sursatın, eləcə də tank əleyhinə qurğuların satışından gedir.
Ermənistana satılacaq silah növləri barədə Hindistan mediası da bəzi materialları yayımlayıb. Məlumatlara görə, yaxın üç ildə Ermənistana dəyəri 150 milyon ABŞ dolları olan “ATAGS” haubitsaları tədarük ediləcək. Mərmisinin yiv ölçüsü 155 mm olan özüyeriyən topların atış məsafəsinin 48 kilometrə çatdığı, dağlıq şəraitdə sınaqdan çıxarıldığı və Hindistan ordusunun arsenalına qəbul edildiyi deyilir.
Cənublu “qardaşından” isə PUA-lar alır
Son vaxtlar Ermənistanın qonşu İranla hərbi əməkdaşlığı genişləndirdiyi də gizlədilməsi mümkün olmayan faktdır. Yenə yerli medianın verdiyi məlumata görə, İrəvan İranla pilotsuz uçuş aparatlarının (PUA) tədarükü ilə bağlı razılığa gəlib. Tehran, həmçinin Ermənistan ordusu üçün zabit kadrların hazırlanması işində də dəstək verir.
Bəs Ermənistan kimi kasıb ölkə xaricdən bahalı silahları hansı vəsaitlə alır? Axı bu ölkənin maliyyə durumunun bahalı silah müqavilələri imzalamağa imkan vermədiyini hərbi deyil, mülki ekspertlər də çox yaxşı bilirlər. Otuz il uzanan işğalçılıq siyasətinin işğalçı Ermənistana heç bir fayda gətirmədiyi də məlumdur. Son məlumatlara görə, Hayastanın xarici borcu ümumi daxili məhsulun təxminən 60 faizinə bərabərdir. Cənubi Qafqazda ən bərbad iqtisadiyyata və ən kiçik büdcəyə malik bir ölkənin silah almağa həvəslənməsi absurd görünür. Ehtimallara görə, Ermənistan silah sövdələşməsində də xaricdən gələn qrantlara və erməni lobbisinin maliyyə dəstəyinə ümid bəsləyir. Ümumiyyətlə, bu ölkədə özgələrinin hesabına yaşamaq və dövləti idarə etmək bir növ ənənə halını alıb – ən zəruri xərclər belə xarici ianələr hesabına maliyyələşdirilir ki, bu da məqbul variant sayıla bilməz.
Hayastan yeni hərbi dərs üçün darıxıb?
Son vaxtlar Hindistandan və İrandan silah-sursat tədarükünü gücləndirən, Fransanın İrəvandakı səfirliyi xətti ilə yeni hərbi yardım layihəsinə baş vuran Ermənistanın müharibə hazırlıqları aşkar görünməkdədir. Onun 2023-cü il üçün müdafiə büdcəsini 47 faiz artırması, hərbi xərclərə ilk dəfə 1 milyard dollar ayırması heç də İrəvanın sülh məramından xəbər vermir. Üstəlik demoqrafik fəlakətdən əziyyət çəkən ölkədə bu arada səfərbərliklə bağlı tədbirlər görülür. Kişilərin, xüsusən də gənclərin ölkədən çıxmasına qoyulan məhdudiyyətlər daha da sərtləşdirilir. “Hraparak” qəzeti yazır ki, son vaxtlar 48 yaşa qədər kişilər təlim toplanışlarına çağırılır. Nəşr açıq şəkildə bildirir ki, təcili təlimlər Hayastanın müharibə hazırlığı ilə bağlıdır.
Əslində, İrəvanın Hindistan və İrandan silah tədarük etməsi faktının özü onun ordusunun beynəlxalq standartlara cavab vermədiyini söyləməyə əsas verir. Amma Hayastan heç vaxt iriçaplı silah alıcısı rolunda olmayıb, buna imkanı çatmayıb. Həm də bu səbəbdən Paşinyan hökuməti dünyanın nüfuzlu silah istehsalçıları sırasında yer almayan Hindistanla və İranla sövdələşməyə üstünlük verir. İrəvan bu iki “qardaşı” ilə əvvəllər də silah alış-verişi edib.
Fəqət Hayastan hakimiyyətinin unutduğu vacib məqamlardan biri də Azərbaycan Ordusunun malik olduğu gücdür. Onların bu gücü bir neçə dəfə öz üzərlərində hiss etmək şansı olub. Aprel döyüşlərini, Günnüt və Tovuz əməliyyatlarını buna missal göstərmək olar. Amma haylar ordumuzdan ən böyük dərsi Vətən müharibəsində aldılar. 300-dən çox yaşayış məntəqəsi döyüş nəticəsində işğaldan azad edildi. Silahın qüdrətindən, milli ruhun iradəsindən yoğrulan “dəmir yumruğ”un dadını görən yağı Ağdam, Kəlbəcər və Laçın rayonlarını isə döyüşsüz təslim etdi.
Bu gün Azərbaycan Silahlı Qüvvələri dünyanın 50 ən güclü ordusu sırasında yer tutur. Dövlət başçısının birbaşa tapşırığı və idarəçiliyi ilə postmüharibə mərhələsində ordunun təchizatı daha da möhkəmləndirilib. İndi Azərbaycanın Müzəffər Ordusu düşmənin cavabını ən layiqli şəkildə verməyə hazırdır.
Amma revanş götürmək xülyasına düşən hay-daşnaklar bu dəfə Azərbaycan Ordusunun cavabının iki il səkkiz ay əvvəllə müqayisədə daha sərt, “dəmir yumruğ”un zərbinin isə ömürlük olacağını unutmamalıdırlar.
Şair RAMALDANOV,
ehtiyatda olan polkovnik
Həmişə olduğu kimi, Ermənistanın hərbi-siyasi rəhbərliyi bu gün də konstruktiv mövqe tutmaq istəmir, yenə hansısa miflərə inanmaqla məşğuldur.
Son zamanlar rəsmi İrəvanın bəzi ölkələrlə hərbi müqavilələr bağlaması ilə bağlı məlumatlar yayılır və hətta real nəticələr var. Artıq Fransa, Hindistan və cənub qonşumuz İran bu sövdələşmələrdə iştirak edirlər. Bu yöndə fəaliyyət daxildəki revanşist qüvvələrin fəallaşmasına və Hayastanın yeni müharibə barədə düşünməsinə müəyyən zəmin yaradıb. Amma Ermənistandakı praqmatik siyasətçilər, ağıllı adamlar yaxşı bilirlər ki, ən doğru yol Azərbaycanla sülhə gəlməkdir. Bununla Ermənistanın qarşısında iqtisadi cəhətdən inkişaf etmək, sosial sahədə problemlərini yoluna qoymaq üçün perspektivlər açıla bilər.
Xarici havadarlarının diqtəsilə bölgədə vəziyyəti gərginləşdirməyə çalışan İrəvan nə edirsə-etsin, heç nəyə nail ola bilməyəcək. Azərbaycan Silahlı Qüvvələrinin Müzəffər Ali Baş Komandanı Prezident İlham Əliyev onlara öz mesajını çatdıraraq dedi ki, əgər istər Ermənistanın daxilindən, istərsə də xaricdən Azərbaycan üçün hər hansı təhlükə yaranarsa, Bakı dərhal adekvat addım atacaq. Bu xəbərdarlıq Hayastanın hərbi-siyasi rəhbərliyi ilə yanaşı, onun əcnəbi himayədarlarına da ünvanlanıb.
Ermənilər nə qədər kənar sifarişlə silahlansalar da, bununla heç nəyə nail ola bilməyəcəklər. Cənab Prezidentin siyasi iradəsi və “dəmir yumruq” hər zaman onların başının üstündə olacaq.
İmran BƏDİRXANLI, “Xalq qəzeti”