Laçın–Xankəndi yolunda Qarabağda faydalı qazıntı yataqlarının qanunsuz istismarının dayandırılması ilə bağlı təşkil olunan dinc aksiyanın 127-ci günündə də ərazi humanitar məqsədlər üçün istifadəyə tam açıq olub.
Səhər saatlarında Xankəndidən Laçın istiqamətinə hərəkət edən Beynəlxalq Qırmızı Xaç Komitəsinə məxsus yük maşınları və minik avtomobilləri ərazidən maneəsiz keçib. Sonrakı saatlarda hər iki istiqamətdə Rusiya sülh-məramlılarına məxsus avtomobillər maneəsiz hərəkət edib. Avtomobillərin içərisində Qarabağda yaşayan erməni əsilli ailələrin də olması Ermənistanın blokada ilə bağlı səsləndirdiyi iddiaların saxtalığını bir daha təsdiq edir. Həmçinin, aksiyanın ilk günündən başlayaraq Laçın–Xankəndi yolunun humanitar məqsədli bütün avtomobillər və mülki şəxslər üçün açıq olması bir daha göstərir ki, ekofəalların etirazının hədəfi dəqiq, məramı aydındır.
Elə mənfur düşmən də aksiyanın blokada xarakteri daşıyaraq humanitar fəlakətə səbəb olması ilə bağlı, yalnız ümumiləşdirici yalançı iddialarla çıxış etməklə kifayətlənir. Həmçinin, haylar hər iki istiqamətdə yolun humanitar məqsədlər üçün açıq olduğunu da etiraf etməyə məcburdurlar. İrəvan mətbuatının yazdığına görə, Ermənistana müalicəyə göndərilən 12 xəstə bazar günü Qarabağa qayıdıb. Həmin günə qədər isə Beynəlxalq Qızıl Xaç Komitəsinin vasitəçiliyi və yardımı ilə ümumilikdə 326 xəstənin Ermənistana köçürülməsi təmin edilib. Təbii ki, hər iki istiqamətdə mülki vətəndaşların sərbəst hərəkəti “blokada” iddialarını alt-üst edir.
Rusiya sülhməramlı kontingentinin Qarabağ ərazisində fəaliyyətinə dair son günlərin məlumatında da, “blokada”ya dair heç bir işarə yoxdur. Vurğulanır ki, Rusiya sülhməramlıları marşrut üzrə humanitar yükdaşıyan avtomobil karvanını müşayiət etməkdə davam edir. Yəni onların fəaliyyətinə heç bir maneə yaradılmır.
Gecə-gündüz, hətta qarlı-şaxtalı havalarda belə aksiyanı yorulmadan davam etdirən gənclərimiz isə fəallıqlarını gündən-günə artırırlar. Onlar Vətən torpaqlarını qarı düşmən talanından xilas etmək üçün yenilməz iradəyə malik olduqlarını bütün dünyaya əzmkarlıqla nümayiş etdirirlər. Ekoaksiyaçılarımızın Azərbaycan, rus və ingilis dillərində səsləndirdikləri “Azərbaycan milləti qoruyacaq sərvəti!”, “Azərbaycan oyaqdır, sərvətinə dayaqdır!”, “Azərbaycan vahiddir, sərvətinə sahibdir!”, “Ekocinayətə son!” şüarları onların tələblərinin dəyişməz olduğunu göstərir.
Leyla QURBANOVA,
“Xalq qəzeti”