Ekoaksiyanın gündəliyi
Rusiya sülhməramlılarının müvəqqəti yerləşdiyi Azərbaycan ərazilərində yataqların qanunsuz istismarına etiraz olaraq ekofəallarımızın başladığı aksiyanın 120 günü də tamam oldu. Ötən günlər də avtomobil yolunun aksiyanın keçirildiyi ərazisindən hərəkətin sərbəstliyinin tam təmin edilməsi ilə bağlı hesabat öz əksini tapdı.
Ötən aylar ərzində aksiyanın getdikcə mütəşəkkil hal alması etirazçıların torpaqlarımızda qanunsuz istismarın dayandırılması tələbində nə qədər israrlı olduğunu bir daha sübut edir. Erməni tərəfi də ötən günlər ərzində Rusiya sülhməramlılarının Laçın–Xankəndi marşrutu üzrə humanitar yük daşıyan avtomobil karvanını müşayiət etdikləri barədə məlumat yayıb. Onu da vurğulamaq lazımdır ki, aksiyanın keçirildiyi ərazidə həmişəki kimi, qanun pozuntusu ilə bağlı heç bir qeydə rast gəlinmir. Yəni, düşmənin Laçın–Xankəndi yolunun humanitar məqsədlər üçün açıq olmasını dolayısı ilə də olsa, etiraf etməkdən başqa çarəsi qalmayıb.
Amma bütün bunlara baxmayaraq, riyakarlığını davam etdirən erməni separatçıları avtomobil yolunda ekofəallarımızın keçirdiyi aksiyaya blokada deyib xaricə yalan informasiya ötürməyi davam etdirirlər. Elə bu günlərdə Ermənistan mətbuatının Avropa Komissiyasının rəhbəri Ursula Von der Leyenin Laçın dəhlizinin “blokada”sı ilə bağlı fikirlərini geniş tirajlaması təsadüfi deyil. Erməni tərəfi məktubu geniş yaymaqla ekoaksiyaçılarımızın haqlı tələblərinin üzərinə kölgə salmağa cəhd edir. Məlumatda bildirilir ki, yanvar ayında qondarma “Artsax Qadınları Artsaxın Gələcəyi Naminə” təşkilatının üzvlərinin Laçın dəhlizinin “blokada”sının açılması ilə bağlı məktub-petisiyasına Avropa Komissiyasının rəhbəri Ursula Von der Leyen cavab verib. Cavab məktubunda aksiyanın keçirildiyi ərazidə hərəkətin məhdudlaşdırılmasının yerli əhaliyə “ciddi narahatlıq və humanitar problemlər” yaratdığı bildirilir. Təbii ki, bəzi təşkilatların ikili standartlarına dünya artıq vərdiş edib. Ən maraqlısı isə belə qurumlar tərəfindən ermənilərin humanitar “faciə” adlandırdıqları by “blokada”nın yerli əhaliyə yaratdığı problemlə bağlı heç bir ciddi arqumentin olmamasının qulaqardına vurulmasıdır.
Ermənistanın Azərbaycan ərazilərində davamlı ekoloji terror törətməsi faktları isə yetərincədir və bu davam edir. İki gün bundan əvvəl Zəngəzur mis-molibden zavodu ətraf mühit və insan sağlamlığı üçün ciddi təhlükə yaratması səbəbindən fəaliyyətini yenidən dayandırıb. Şirkətin bəyanatında qeyd olunur ki, elektrik enerjisində fasilələrə görə, zavoddan zəhərli tullantıların axını baş verib. Əslində, zavodun çox zərərli tullantılarının Oxçuçayı təhlükəli həddə çirkləndirməsi, çay hövzəsinin flora və faunasının məhv edilməsi Azərbaycanda geniş rezonans doğuraraq ictimai narazılıq yaradıb. Ermənilərin ekoloji terroruna göz yuman bəzi beynəlxalq təşkilatlar isə bütün bunları sanki görmür və eşitmir.
Buna görə də, ekoloji fəallarımız regionun nadir bitki və heyvanat aləminə ziyan vuran fəaliyyətlə bağlı etiraz aksiyasını məqsədlərinə nail olanadək davam etdirməkdə israrlıdırlar.
L.QURBANOVA, “Xalq qəzeti”