Ermənistan silahlı qüvvələrinin tör-töküntülərinin Azərbaycan ərazisində qalmasının qeyri-mümkünlüyü barədə ekokönüllülərin tələbi düşmən ölkəni getdikcə çıxılmaz vəziyyətə salır. Vaxtilə işğal etdiyi ərazilərimizdə bütün vasitələrlə terror törətməyə nail olan “şər qüvvə”nin amansızlıqla həyata keçirdiyi dağıdıcılıq missiyası sona çatmaqdadır. 

Torpaqlarımızda zaman-zaman vəh­şilik törədən, kənd və şəhərlərimizin kü­lünü göyə sovuran, meşələrimizi dağıdan ermənilər vandalizm hərəkətlərinə bəraət qazandırmaqda çətinlik çəkirlər. Ölkəmi­zin ekologiya könüllülərinin mütəşəkkil aksiyası da Qarabağın yeraltı sərvətlə­rinin amansızcasına talan edilməsinə dünyanın diqqətini cəlb etməklə, onların bütün yalanlarını alt-üst edir. 

Üç aydan artıq davam edən aksiya­nın ilk günlərində Ermənistan mətbuatı etirazçıların Laçın-Xankəndi yolunu bağ­lamaları barədə dezinformasiya yayma­ğa cəhd etsə də, növbəti uğursuzluqla üzləşib. Elə ekoaksiyanın dünən keçirilən 116-cı günündə də humanitar məqsədlər üçün yolun açıq olması, eyni zamanda Rusiya sülhməramlılarına məxsus av­tomobillərin aksiya ərazisindən maneə­siz keçidinin təmin olunması ilə bağlı həqiqətlər dünya gündəmini zəbt edib. 

Aksiya iştirakçısı “Yaşıl Dünya” Eko­loji Maarifləndirmə İctimai Birliyinin sədri Elman Cəfərli “Xalq qəzeti” ilə fikirlərini bölüşərkən düşmənimizin çox amansız, məkrli və hiyləgər olduğunu, bunu döyüş meydanında da, dinc insanlara, təbiətə münasibətdə də sübut etdiklərini bildirdi. Qeyd etdi ki, aksiya erməni tərəfinin ötən illər ərzində işğal olunmuş ərazilərimizdə ekoloji terror həyata keçirməsini dünya diqqət mərkəzində saxlayır. Düşmən iş­ğal bölgəsində qiymətli filiz yataqlarını qanunsuz və qaydalara uyğun olmayan tərzdə istismar edib, nadir ağaclar bitən meşə sahələrini məhv edib, çayları, göl­ləri zəhərləyib. Ermənilər qanunsuz ola­raq Kəlbəcər rayonu ərazisində yerləşən Zod, keçmiş Ağdərə rayonu ərazisindəki “Qızılbulaq”, “Dəmirli” və Zəngilan rayo­nundakı “Vejnəli” qızıl yataqlarını stan­dartlardan kənar şəkildə, ətraf mühitə ziyan vurmaqla istismar edirdilər. Həmin yataqlar hər il ermənilərə on milyonlarla dollar qanunsuz qazanc gətirirdi. Azər­baycan tərəfi dəfələrlə sülhməramlıla­ra xəbərdarlıq edərək qızıl yataqlarının qanunsuz istismarına son qoyulmasını, ərazidə monitorinq aparılmasına şərait yaradılmasını tələb etmişdilər. 2022-ci il dekabrın 12-də bir qrup ekologiya yö­nümlü QHT rəhbərinin təşəbbüsü ilə Şu­şanın girəcəyində Xankəndi-Laçın yolun­da etiraz aksiyası başlandı. 

Aksiyada mən də iştirak edirdim. Vətəndaş cəmiyyəti fəallarının məqsədi heç də gediş-gəlişə mane olmaq, yolu bağlamaq deyildi. Biz sülhməramlıla­rın rəhbəri general Volkovla görüşmək, tələblərimizi ona çatdırmaq istəyirdik. Ak­siyada “Ekoloji cinayətə son!”, “Qızıl ya­taqlarının qanunsuz istismarı dayandırıl­sın!”, “Ərazidə ekoloqların monitorinqinə şərait yaradılsın!” tələbləri səsləndirilirdi. Yeri gəlmişkən, düşmən tərəfindən, guya, azərbaycanlı fəalların yolu bağlaması, Qarabağ iqtisadi rayonunda yaşayan erməni əhalisinin blokadaya alınması ilə bağlı yaydıqları informasiyaların heç bir əsası yoxdur. 116 gündür ki, aksiya da­vam edir. Lakin bu günə qədər erməni vətəndaşlarımızın blokadaya alınması ilə bağlı hər hansı fakt qeydə alınmayıb. Xankəndi ilə Ermənistan arasında Laçın yolu humanitar məqsədlər üçün açıqdır. Hər gün oradan onlarca yük və minik av­tomobili keçir. 

Dövlət başçısı İlham Əliyev də çıxış­larının birində vurğuladı ki, yol aksiyanın ilk günündən humanitar məqsədlər üçün açıqdır. Biz Qarabağ iqtisadi rayonunda yaşayan erməni vətəndaşlarımza prob­lem yaratmaq istəmirik. Xankəndi Azər­baycan ərazisidir, orada yaşayanlar da bizim vətəndaşlarımızdır. Biz istəyirik ki, Xankəndi-Laçın yolu ilə Qarabağa silah-sursat, mina daşınmasın. Onsuz da son 27 ildə işğaldan azad olunmuş ərazilərimiz mina ilə çirkləndirilib. Əra­zilərimizdə təxmini rəqəmlərə görə, 1 milyondan çox mina basdırılıb. Minaların təmizlənməsi illərimizi alacaq. Azərbay­can tərəfi istəyir ki, erməni əhalisi cəmiy­yətə inteqrasiya olunsun.

Elman Cəfərli onu da bildirdi ki, son vaxtlar Azərbaycan Qarabağ iqtisadi ra­yonunda yaşayan ermənilərin reinteq­rasiyasının həyata keçirilməsi istiqamə­tində müxtəlif addımlar atıb. Ümid edirik ki, Qarabağ iqtisadi rayonunda yaşayan ermənilər, nəhayət reallığı dərk edəcək, revanşist qüvvələrin fitnəsinə uymayıb Azərbaycan cəmiyyətinə inteqrasiya prosesini sürətləndirəcəklər. Xalqımızla yanaşı, sülh, sabitlik içərisində və təh­lükəsiz şəraitdə yaşamaq istəyən erməni vətəndaşlarımıza da silahsız, minasız, ekoloji cəhətdən təmiz Qarabağ – təmiz dünya lazımdır. 

Leyla QURBANOVA, “Xalq qəzeti”