Ermənistanın öhdəliklərindən boyun qaçıraraq, öz silahlı qüvvələrini Azərbaycan ərazilərindən çıxarmaması, yalnız humanitar məqsədlər üçün istifadə olunan Laçın yolundan ölkəmizin təbii sərvətlərini qanunsuz şəkildə daşıması, torpaqlarımızda milyondan artıq mina “əkməsi” regionda sülh və təhlükəsizliyin bərqərar edilməsinə maneə olur. 

Laçın yolu ətrafında Ermə­nistanın bu kimi qeyri-qanu­ni fəaliyyətlərinə etiraz edən Azərbaycan vətəndaş cəmiyyə­ti nümayəndələrinin aksiyasına kölgə salmaq və beynəlxalq ic­timaiyyəti yanlış yönləndirməyə hesablanan “humanitar böhran”, “blokada” iddiaları həqiqəti əks etdirmir. Bu fikirləri Azərbaycanın Xarici işlər naziri Ceyhun Bayra­mov Avropa Şurası (AŞ) Bakı ofi­sinin rəhbəri Petr Zix ilə görüşdə bildirib.

Azərbaycan ərazilərində Er­mənistanın törətdiyi ekoterrora Türkiyə mediası da davamlı ola­raq diqqət yetirir. Məqalələrdə Azərbaycandakı ekofəalların, qeyri-hökumət təşkilatlarının nü­mayəndələrinin, şəhid ailə üzvləri və qazilərin könüllülərlə birlikdə işğaldan azad olunmuş Qarabağ bölgəsində təbii sərvətlərin Ermə­nistan tərəfindən talan edilməsinə, ekoloji terror törədilməsinə etiraz məqsədilə dekabrın əvvəllərindən başlayaraq Laçın–Xankəndi yo­lunda fasiləsiz dinc aksiya keçir­dikləri qeyd edilib. Ermənilərə “Siz 30 il işğal altında olan Azərbaycan torpaqları üçün nə etdiniz ki, indi Laçın və Xankəndinin ekoloji qətli­amına qarşı çıxan QHT-lərin şərəfli mübarizəsinə etiraz edirsiniz?”, – deyə konkret sual ünvanlanır.

 Azərbaycan Ermənistandan fərqli olaraq aqressivlik nümayiş etdirmir. Regi­onda sülhün tərəfdarı kimi addımlar atır. Sülhpərvərlik, xoşməramlılıq Azərbayca­nın dövlət qurumlarında çalışan vəzifəli şəxslərinin, sıravi vətəndaşının da ru­huna hopub. Bunun ötən gün də şahidi olduq. Belə ki, Xankəndi–Laçın yolunda Qarabağda yaşayan erməni vətəndaşla­rının halı pisləşib, azərbaycanlı həkimlər yardım göstəriblər. Rusiya sülhməramlı­larının müraciətindən sonra əraziyə Şuşa şəhərində yerləşən modul tipli xəstəxa­nanın təcili tibbi yardım maşını gəlib, il­kin müdaxilə edilib. Daha sonra erməni vətəndaşları təcili tibbi yardım avtomobili ilə Xankəndiyə aparılıb.

Xankəndi–Laçın yolunda halı pis­ləşən Qarabağ ermənilərinə tibbi yardım göstərən Şuşa modul tipli xəstəxanasının həkimi Vilad Əliyev deyib ki, ermənilərə yerindəcə ilkin tibbi yardım göstərildi. Dörd nəfərdən üçünün vəziyyəti nisbətən ağır idi. Daha sonra onları bizim nəzarəti­miz altında Xankəndi xəstəxanasına sağ­lam şəkildə çatdırdıq. Xəstəxanaya təhvil verdikdən sonra Şuşaya qayıtdıq.

Gün ərzində ərazidən humanitar təyi­natlı avtomobillərin sərbəst keçidinə şə­rait yaradılıb. Ümumilikdə, 100-dən çox nəqliyyat vasitəsi yoldan istifadə edə bi­lib. Onların sırasında beynəlxalq təşkilata aid maşınlar da keçib. Avtomobillərdə er­məni ailələri və uşaqları da olub.

Rizvan FİKRƏTOĞLU, “Xalq qəzeti”