Ulu öndər Heydər Əliyev deyirdi: “1994-cü il 26 fevral ərəfəsində mən Milli Məclisə təklif verdim. Milli Məclis qərar qəbul etdi və Xocalı soyqırımı Xocalı faciəsi günü elan olundu. Bu gün bizim tariximizdə, bizim təqvimimizdə matəm günüdür, hüzn günüdür. Bunu biz qanunla qəbul etdik”. Milli Məclisin dahi şəxsiyyətin təşəbbüsü ilə qəbul edilmiş qərarından sonra ali qanunverici orqanımız 1995-ci il fevralın 24-də dünya parlamentlərinə və beynəlxalq təşkilatlara Xocalı soyqırımı ilə bağlı müraciəti ünvanlamışdı. Bəli, 1990-cı ilin 20 Yanvar faciəsi kimi, Xocalı soyqırımına hüquqi qiymətin verilməsi də ümummilli lider Heydər Əliyevin adı ilə bağlı olmuşdu. Mövzumuz isə dünya miqyasında soyqırımı cinayətlərinə hüquqi qiymətin verilməsi tarixi barədədir.
Aşağıda oxucularımızın diqqətinə çatdıracağımız xronoloji mahiyyət daşıyan qeydlər “soyqırımı” anlayışının bəşəriyyət tərəfindən dərkinin, habelə mövcud istiqamətdəki müvafiq hüquqi təcrübənin inkişaf mərhələlərini özündə əks etdirməkdədir. Onu da bildirək ki, təqdimatımızda soyqırımı qismində qiymətləndirilə biləcək bütün halların təfərrüatlı təsvirinə cəhd göstərmirik. Niyyətimiz bu terminin tədricən meydana çıxması prosesinin müxtəlif qruplara qarşı geniş yayılmış zorakılıq hallarına siyasi, hüquqi və etik qiyməti özündə birləşdirən ayrı-ayrı məqamları vurğulamaqdır.
Yəhudi Lemkinin Polşadan qaçışı
Ondan başlayaq ki, “soyqırımı” sözünü işlədən Rafael Lemkin 1900-cü ildə Polşada yəhudi ailəsində anadan olub. O, Osmanlı İmperiyasının ermənilərin soyqırımı kimi qiymətləndirdiyi dövrünü, yəhudi qırğınlarını və bir qrup insana qarşı zorakılıqların digər hallarını araşdırıb.
1933-cü ildə Adolf Hitlerin Almaniyada hakimiyyətə gəlişindən sonra həmin ilin oktyabrında ölkə Millətlər Liqasından çıxdı. Həmin vaxt hüquqşünasların Madriddə keçirilmiş beynəlxalq konfransına qatılmış Rafael Lemkin isə bütün qruplardan olan insanların müdafiəsi üçün hüquqi tədbirlərdən istifadə təklifini irəli sürür. Ancaq bu ideya dəstək qazanmır.
1939-cu il sentyabrın 1-də Almaniyanın Polşaya hücumu ilə İkinci Dünya müharibəsi başlanır. Polşa ilə tərədaşlıq müqaviləsinə malik Böyük Britaniya və Fransa Almaniyaya müharibə elan edir. 1939-cu il sentyabrın 17-də Sovet ordusu Polşanın şərq hissəsini tutur. Lemkin Polşadan qaçır, Sovet İttifaqına keçərək oradan ABŞ-a gəlir.
Çörçill “soyqırımı” demir, amma...
1941-ci il iyunun 22-də faşist Almaniyası Sovet İttifaqına hücum edir. Şərqə doğru irəliləyən alman qoşunlarının şəxsi heyəti görünməmiş qəddarlıq həyata keçirir. Bu kimi hallar Böyük Britaniyanın o zamankı Baş naziri Uinston Çörçilli 1941-ci ilin avqustunda belə bir bəyanat səsləndirməyə vadar etir: “Gözümüzün qarşısında hələ adı bəlli olmayan cinayət törədilir”.
1941-ci ilin dekabrında ABŞ müttəfiqlərinin tərəfini tutaraq İkinci Dünya müharibəsinə qoşulur. Həmin il Birləşmiş Ştatlara qaçqın kimi gələn R.Lemkin Çörçillin haqqında söz açdığımız çıxışını eşidir və bəşəri fəaliyyətinə yeni faza qazandırmağa başlayır. Onun təklif etdiyi “soyqırımı” ifadəsi müəyyən dərəcədə Böyük Britaniyanın Baş nazirinin bəyanatına reaksiya kimi gündəmə gəlir.
“Soyqırımı” ifadəsi “doğulur”
İkinci Dünya müharibəsinin gedişində faşist Almaniyasının rəhbərliyi kütləvi qırğınlar törədərək Avropa əhalisinin etnik tərkibinin zorakılıqla dəyişdirilməsini nəzərdə tutan demoqrafik siyasət yürütməyə başlayır. Belə bir siyasətin təzahürü bütün Avropa yəhudilərinin (sonralar “Holokost” adlandırıldı), qaraçıların, eləcə də Polşa və Sovet İttifaqının işğal olunmuş ərazilərində əhalinin aparıcı təbəqələrinin fiziki məhvinə əsaslanır. Nəzərə alaq ki, bu mənfur xəttə kütləvi qətllərlə yanaşı, dövrümüzdə etnik təmizləmə siyasəti kimi tanınan məcburi köçürmələr də daxil edilir.
1944-cü ildə ABŞ-ın Müharibə Departamenti ilə əməkdaşlıq edən Rafael Lemkin isə işğal olunmuş Avropadakı müharibə dəhşətlərinin təsvirinin yer aldığı kitab buraxır və həmin nəşrdə “soyqırımı” terminindən istifadə edir. Qeyd edək ki, Lemkin öz kitabında, həmçinin nasistlərin törətdikləri qətllərin və digər cinayət əməllərinin sənədli sübutlarını da ortaya qoyur.
Beynəlxalq Hərbi Tribunaldan soyqırımı konvensiyasına doğru
1945-ci il noyabrın 20-dən 1946-cı il oktyabrın 1-dək Nürnberq Beynəlxalq Hərbi Tribunalında sülh əleyhinə və insanlığa qarşı cinayətlərdə, habelə müharibə cinayətləri törətməkdə, bu əməlləri həyata keçirmək üçün sui-qəsdlərin gerçəkləşdirilməsində ittiham olunan nasist Almaniyasının 22 yüksək səviyyəli liderinin mühakiməsi aparılır. Bu, müharibədən sonra dövlət rəhbərlərini cinayətlərinə görə məhkum edən ilk beynəlxalq məhkəmə kimi tarixə düşür. Məhkəmə “soyqırımı” sözünü ittiham aktına daxil etsə də, bu daxiletmə sırf hüquqi termin mahiyyəti daşıyır, yalnız nasistlərin vəhşiliklərinin təsvirini hədəf seçir.
Rafael Lemkinin böyük səyləri ilə soyqırımı haqqında beynəlxalq qanunun zəruriliyi məsələsi Birləşmiş Millətlər Təşkilatının dünyanın hər yerindən gəlmiş nümayəndə heyətlərinin iştirak etdiyi müzakirəsinə çıxarılır. Konvensiyanın yekun variantı 1948-ci il dekabrın 8-də qəbul edilir. BMT-nin “Soyqırımı cinayətinin qarşısının alınması və cəzalandırılması haqqında” Konvensiyası 20-dən çox dövlət tərəfindən ratifikasiyası edildikdən sonra 1951-ci il yanvarın 12-də qüvvəyə minir.
“Soyuq müharibə” dövrü və soyqırımı
Ancaq mülki əhaliyə qarşı ağır cinayətlərin törədilməsinin yolverilməzliyinin dərkinə İkinci Dünya müharibəsindən sonrakı illərdə o qədər də əhəmiyyət verilmir və bu tendensiya bütün “soyuq müharibə” dövrü üçün xarakterikdir. Maraqlıdır ki, Lemkinin səyləri ilə ərsəyə gəlmiş konvensiyanı imzalayan, bu cür cinayətlərin qarşısının alınması və cəzalandırılması öhdəliyini üzərinə götürən dövlətlər də məsələyə həssas yanaşmaqdan yayınırlar.
1988-ci il noyabrın 5-də isə ABŞ Prezidenti Ronald Reyqan BMT-nin “Soyqırımı cinayətinin qarşısının alınması və cəzalandırılması haqqında” Konvensiyasını imzalayır. Bu qərarın həm tərəfdarları, həm də qatı əleyhdarları var idi və ikincilər sənədin Birləşmiş Ştatların dövlət suverenliyinə qəsd mahiyyətini qabardırlar. Həmin vaxt ABŞ-da konvensiyanın əsas tərəfdarlarından biri, 1968-1987-ci illər arasında Konqresdə onun müdafiəsi üçün üç mindən çox çıxış etmiş Viskonsin ştatının senatoru Uilyam Proksmir olur.
Srebrenitsadan Ruandaya – soyqırımı ilə bağlı tarixdə ilk cəza
SSRİ-nin süqutundan sonra keçmiş Yuqoslaviyada müharibələr ağır hərbi, ümumən, insanlığa qarşı cinayətlərlə müşayiət olunur. Bosniyadakı münaqişə (1992-1995) Avropanın İkinci Dünya müharibəsindən sonra gördüyü ən qəddar və qanlı qırğın kimi yadda qalır. Orada kiçik Srebrenitsa şəhərində 7800 bosniyalı serb qoşunları tərəfindən öldürülür.
Bosniyada törədilən vəhşiliklərə cavab olaraq BMT Təhlükəsizlik Şurası Haaqada keçmiş Yuqoslaviya üzrə Beynəlxalq Cinayət Tribunalını (ICTY) təsis edən 827 saylı qətnamə qəbul edir. Bu, Nürnberqdən sonra ilk beynəlxalq tribunal kimi tarixə düşür. Keçmiş Yuqoslaviya üzrə Beynəlxalq Tribunal 1949-cu il Cenevrə Konvensiyasının, müharibə qanunlarının və ya adətlərinin pozulması, soyqırımı və insanlığa qarşı cinayətlər üzrə təqib səlahiyyətlərinə malik olur. Tribunalın yurisdiksiyası keçmiş Yuqoslaviya ərazisi ilə məhdudlaşır. Ancaq...
Bu arada onu da deyək ki, ötən əsrin 90-cı illərinin əvvəllərinin, belə demək mümkünsə, soyqırımı diqqəti həm də Ruandaya yönəlir. Çünki 1994-cü ilin aprelindən iyulunadək burada 800 minə qədər insan öldürülmüşdü. Onların əksəriyyəti milli azlıq olan tutsi xalqının nümayəndələri idi. Bu, qısa müddətdə həyata keçirilən böyük ölçülü kütləvi qırğın əməli sayılırdı. Oktyabr ayında BMT Təhlükəsizlik Şurası Yuqoslaviya üzrə Beynəlxalq Cinayət Tribunalının, yəni ICTY-nin mandatını Tanzaniyanın Aruşa şəhərində yerləşən Ruanda üzrə Beynəlxalq Tribunal ilə (ICTR) əvəzləyir. 1998-ci il sentyabrın 2-də Ruanda üzrə Beynəlxalq Tribunal tarixdə ilk soyqırım hökmünü çıxarır. Tribunal ölkənin Taba kommunasının meri Jan-Pol Akayesanı və onun hərəkətlərinə kömək etmiş şəxsləri soyqırımı və insanlığa qarşı cinayətlərdə təqsirli bilir.
XXI yüzillik və soyqırımı cəzasızlığı
Qeyd edək ki, ABŞ tarixində ilk dəfə olaraq 2004-cü ildə hökumət davam edən böhranı soyqırımı kimi xarakterizə etmişdi. Söhbət Darfur soyqırımından gedir. Həmin il sentyabrın 9-da Birləşmiş Ştatların o zamankı dövlət katibi Kolin Pauel Senatın Xarici Əlaqələr Komitəsi qarşısında çıxış edərək demişdi: “Biz belə bir nəticəyə gəldik ki, Darfurda soyqırımı törədilib. Buna görə Sudan hökuməti və Cəncavid hərbçiləri məsuliyyət daşıyırlar. Ola bilsin ki, soyqırımı hələ də davam edir”.
K.Pauelin çıxışındakı motiv soyqırımı cinayətlərinin davamlılıq xarakterinin təsvirindəki kiçik bir elementdir. Ümumən, tribunallar, eləcə də Beynəlxalq Cinayət Məhkəməsi öz yurisdiksiyaları daxilində məhkəmə presedentləri təyin edə və cinayətləri araşdıra bilsələr də, soyqırımı mahiyyəti üzrə cəzalandırılma son dərəcə çətin proses olaraq qalır. Həm də ona görə ki, mövcud istiqamətdə siyasi iradə yoxdur. Daha doğrusu, siyasət insanlığın önünə keçir. Nəticə etibarilə, dünyada, bir qayda olaraq, soyqırımı faktlarına ədalətli qiymət verilmir. Baxın, Fransanın Əlcəzairdə törətdiyi soyqırımı kimi, Ermənistanın Xocalıda dinc azərbaycanlılara yaşatdığı dəhşət də cəzasızdır. Buna görə soyqırımı bəşəriyyəti təhdid edən cinayət əməli “öncüllüyünü” saxlayır.
Ə.CAHANGİROĞLU, “Xalq qəzeti”