Qəzetimizin ötən saylarında “Cənubi Azərbaycan” səhifələrində Türkiyənin Ərzincan Binəli Yıldırım Universitetinin professoru Əli Kafkasiyalının İran türkləri barədə silsilə yazılarını dərc etmişdik. Tanınmış türkoloq bugünlərdə redaksiyamıza göndərdiyi məktubda bildirir:
– Hörmətli “Xalq qəzeti” redaksiyası! Bir kitabı tanıtmaq, bəlkə də, onu yazmaq qədər önəmlidir. İran çoğrafiyası haqqında yazmış olduğum kitablar, uzun illərin və zəhmətin bəhrəsi olan tədqiqatlarım ilk dəfədir ki, qəzetinizin sayəsində Azərbaycanda ışıq üzü, göz izi gördü. Bir neçə il əvvəl AMEA-nın Tarix İnstitutunda irihəcmli “İran türkləri” kitabım haqqında xoş sözlər söylədilər və bu barədə müəyyən işlərin görüləcəyini planladılar. Amma sonralar bir səs-sədası olmadı. Mənim bu kitabda yazdıqlarımın, ən önəmlisi də İran rejiminin türklərə qarşı apardığı təhdid siyasətinin Azərbaycan xalqına çatdırılmasını alqışlayır və sözün həqiqi mənasında, bunu türkçülük yolunda böyük fədəkarlıq adlandırıram. Var olun!
Böyük şər güclər və onların yerli himayədarları əsrlər boyu türk dili, ədəbiyyatı, incəsənəti və bütün mədəni dəyərləri ilə bağlı o qədər böyük saxtakarlıqlar etmişlər və o qədər böyük yalanları həqiqət kimi təqdim etmişlər ki, milli mənliyimiz, tarixi köklərimiz doğru olmayan “yalan həqiqətlər” qiyafəsində təqdim olunmuşdur. Onları düzəltmək, başqa sözlə, yanlış təsəvvürləri insanların təfəkküründən silmək lazımdır. Əlbəttə ki, asan deyil.
Əsrlərin saxtakarlığını qısa zamanda düzəltmək çox cətindir. Xüsusilə təkəri geri fırlatmaq istəyən insanların hakim olduğu müddətdə bu, daha çətindir. İranla bağlı kitabları, məqalələri yazdığım illərdə hətta universitetlərin çox hörmətli professorları sual edirdilər ki, İranda türk varmı? Əli xoca, Tanrı eşqinə bunları haradan çıxarırsan? İrandakı türklərin böyük əksəriyyəti deyir ki, iranlıyıq. Azərbaycan türkləri isə deyirdilər ki, biz azəriyik.
Sağ olun ki, sizin kimi dəyərli dostların zəhməti ilə güvənli həqiqətləri Türk dünyasına çatdıra bildik. Arzu və istəklərimiz yenə sizin fədakar səylərinizlə daha da inkişaf etdiriləcək. Böyük Qaspıralının yüz il öncə söylədiyi dahi konsepsiya bu gün də aktualdır, bu gün də yenə fikirdə və əməldə birlik tələb olunur.
Bir qavrayış birliyi, həqiqətləri həqiqət, yanlışları isə yanlış qəbul etdiyimiz zaman türk birliyini qura biləcəyik. Bir daha təşəkkür edirəm və ən xoş arzularımı bildirirəm.
Əli KAFKASİYALI,
professor
Türkiyə