AMEA-nın Tarix və Etnologiya İnstitutunda Qərbi Kaspi Universiteti, Azərbaycan Universiteti və Bakı Slavyan Universitetinin tələbələrinin istehsalat təcrübəsi başlayıb.

İnstitutun direktoru, professor Kərim Şükürov tələbələrlə görüşərək rəhbərlik etdiyi elmi-tədqiqat müəssisəsinin tarixi, aparılan tədqiqatlar, institutun planları haqqında məlumat verib. Qeyd edib ki, istehsalat təcrübələri gələcəkdə həyatını elmə bağlayacaq gənclərin seçilməsi, institutun gəncləşdirilməsi baxımından mühüm əhəmiyyət daşıyır. Kərim Şükürov fevral–may aylarını əhatə edən istehsalat təcrübəsi zamanı tarix elminə xüsusi marağı olan tələbələrin diqqətdə saxlanılacağını, gələcəkdə onların elmi fəaliyyətlə məşğul olması üçün dəstək göstəriləcəyini vurğulayıb.

Bildirilib ki, Tarix və Etnologiya İnstitutunda bu prosesə diqqətlə yanaşılır. Həm universitetlərdən, həm də institutdan təyin olunan təcrübə rəhbərləri birgə işləyəcək, tələbələrlə yüksək səviyyəli iş qurulacaq.

XQ