Biləsuvar rayonunda AYB üzvü Müşfiq Malik Muğanlının Azərbayca­nın Milli Qəhrəmanı Mübariz İbrahimova həsr olunmuş “Mübarizdən sonra” adlı kitabının təqdimat mərasimi keçirilib.

Qəhrəmanın doğulub böyüdüyü Əli-abad kəndindəki ev-muzeyində mərasimə rayon rəsmiləri, ziyalılar və şəhid validey­nləri toplaşmışdılar. Kitabın məsləhətçisi – Mübariz İbrahimovun atası Ağakərim İbra­himov bu kimi kitabların ölkəmizdə gənc nəslə hərbi vətənpərvərlik hisslərinin aşı­lanmasında əhəmiyyətli olduğunu bildirib. 

Kitab iki hissədən, dörd bölmədən ibarətdir. Ayrı-ayrı hissələrdə tanınmışların Mübariz haqqında fikirləri, onun həyat he­kayəsi, esse və şeirlər, eləcə də “Müqəd­dəs Mübarizim” poeması yer alıb. Nəşrin baş redaktoru, AMEA-nin Dilçilik İnsti­tutunun baş direktoru, filologiya elmləri doktoru, professor Nadir Məmmədli çıxı­şında müzəffər Ali Baş Komandan İlham Əliyevin qətiyyəti, hərbçilərimizin qəhrə­manlığı sayəsində tarixi torpaqlarımızın işğalına son qoyulmasında Mübariz kimi oğulların hünərinin əsl mənəvi təməl rolu oynadığını diqqətə çatdırıb: “Mübariz İbra­himov müasir Azərbaycan gəncliyinə Vətə­ni necə sevməyi əyani olaraq göstərdi, bu yolda onun rəşadəti əvəzsizdir. Belə nəşrlə­rin davamı da olacaq”.

Biləsuvar Rayon İcra Hakimiyyəti Başcısının müavini Ləman Yüzbaşova, AYB-in beynəlxalq əlaqələr üzrə kati­bi Səlim Babullaoğlu, ADPU Cəlilabad filialının müəllimi, filologiya üzrə fəlsəfə doktoru Bilal Alarlı, kitabın redaktoru Famil Burxanoğlu, rayon ziyalıları Rüsətəm Əliyev, Mirhənifə Mirsultanov, Mirsahib Zəkiyev, şəhid atası Rafət İsayev və başqaları çıxış edərək əsərin vətənpər­vərlik ədəbiyyatı olduğunu vurğulayıblar.

Ə.DOSTƏLİ 
XQ