Azərbaycan Milli Konservatoriyasında “Bəhram Nəsibov yaradıcılığının təbliği” İctimai Birliyinin Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə icra etdiyi “Mədəniyyət paytaxtı” film-konsert layihəsinin təqdimat mərasimi keçirilib.

Layihənin rəhbəri, İctimai Birliyin sədri Adil Nəsibovun “XQ”-yə verdiyi məluma­ta görə, təşəbbüs 2024-cü il üçün “İslam dünyasının mədəniyyət paytaxtı” elan edilmiş Şuşa şəhəri ilə bağlı silsilə tədbir­lərə töhfə vermək məqsədilə icra olunur. O, təqdimatda bu barədə bilgilər verib. Şuşadakı Yuxarı Gövhər Ağa məscidinin imamı Mirabdullah Həsənli qala-şəhər­də məscidlərin 30 illik işğal dövründə dağıdılması və Vətən müharibəsindən sonrakı bərpa prosesi haqqında danışıb. Azərbaycan Milli Konservatoriyasının professoru, musiqişünas və film-kon­sertin məsləhətçisi Abbasqulu Nəcəfza­də isə ilk dəfə film-konsertdə səslənən mahnıları təhlil edib. Həmçinin Daxili Qoşunların xüsusi təyinatlısı, Vətən mü­haribəsi qazisi, “Qarabağ” ordenli kapitan Vüsal Həsənov Vətən müharibəsində or­dumuzun göstərdiyi rəşadət haqqında, əczaçı-bioloq Rauf Rəhimov isə insanla təbiətin harmoniyası haqqında fikirlərini bölüşüblər. 

Azərbaycan Milli Konservatoriyasının rektoru, Xalq artisti, professor Siyavuş Kərimi mərhum bəstəkar Bəhram Nəsi­bovun musiqi mədəniyyəti tariximizdəki rolundan söz açıb, onun mahnılarının dillər əzbəri olduğunu söyləyib. Rektor “Mədəniyyət paytaxtı” film-konsert la­yihəsinin reallaşdırılmasını təqdir edib. Digər çıxışçılar tanınmış sənətkarın hə­yat və fəaliyyətindən bəhs ediblər. 

Daha sonra “Mədəniyyət paytaxtı” film-konsert layihəsinin təqdimatı olub.

Bəhram Nəsibovun bəstələdiyi “Vətən bağı”, “Cıdır düzü”, “İslam dün­yası”, “Şuşa qalası” mahnıları ilk dəfə film-konsertdə müğənni-bəstəkar Elnur Nuri tərəfindən səsləndirilib. Mövzu ta­maşaçılara audio-vizual vasitələrlə təq­dim olunub. 

Qeyd edək ki, film-konsertin ssenari müəllifi və montajçısı Adil Nəsibov, rejis­soru Cəsarət Hüseynzadə, operatoru El­mir Mirzəzadə, prodüseri Vüsal Əhmə­dov, redaktoru isə Şəbnəm Tofiqqızıdır.

XQ