Hidayət Elvüsal – 75

Azərbaycan Mətbuat Şurasında veteran jurnalist, tanınmış satirik publisist Hidayət Elvüsalın anadan olmasının 75 illiyi münasibətilə yubiley toplantısı keçirildi. 

Mərasimi giriş sözü ilə açan AMŞ sədri Rəşad Məcid yubilyarın yarım əsr jurnalistikada keçmiş ömür yolundan söz açaraq onun çağdaş mediamızda qələmi ilə populyarlıq qazanmış peşəkar yazar­lardan biri olduğunu vurğuladı. Qurum rəhbəri xatırlatdı ki, 1949-cu ilin bu və­dələrində Kəlbəcərin sazlı-sözlü mühitin­də anadan olmuş Hidayət Elvüsal erkən yaşlarından söz yaradıcılığına maraq göstərib. Şeir və hekayələri ilə rayonun ədəbi aləmində ilk addımlarını atan gənc yazar orta məktəbdən sonra Bakı Dövlət Universitetinin jurnalistika fakültəsini biti­rib. 

Ali təhsilli jurnalist doğma rayona qa­yıdaraq Kəlbəcərdə çıxan “Yenilik” qəze­tində, yerli radio verilişləri redaksiyasında çalışıb, mərkəzi media ilə də sıx əmək­daşlıq edib. Böyük həyat və yaradıcılıq təcrübəsi toplamış yazar paytaxta köçən­dən sonra “Azərbaycan gəncləri”, “Xalq qəzeti”, “Səhər”, “Ədalət” qəzetlərində müxbir, şöbə müdiri, baş redaktor müa­vini vəzifələrində çalışıb, “Kriminal” qə­zetinə rəhbrlik edib. Müxtəlif mövzulu və janrlı publisistik yazılarla yanaşı, “Belə-belə işlər” rubrikasında çap etdirdiyi silsilə satirik yazılar da Hidayət Elvüsala məş­hurluq gətirib. Son illərdə yazdığı mahnı mətnləri və bəstələdiyi musiqilər yetkin jurnalisti qəlbində melodiyalar çağlayan nəğməkar kimi də tanıdıb.

Rəşad Məcid çoxillik səmərəli fəaliy­yətinə görə və anadan olmasının 75 illiyi münasibətilə AMŞ-nin yubiley plaketini Hidayət Elvüsala təqdim etdi.

AMŞ Ahıl Jurnalistlər Məclisinin səd­ri, “Xalq qəzeti”nin baş redaktor müavi­ni Tahir Aydınoğlu keçmiş iş yoldaşını veteran jurnalistlər və çalışdığı kollek­tiv adından səmimi təbrik etdi, yubiliyra möhkəm cansağlığı və yeni uğurlar ar­zuladı. O bildirdi ki, ustad jurnalistlərimiz, söz zərgərləri arasında ciddi xarakteri və bənzərsiz yaradıcılıq üslubu ilə se­çilən Hidayət Elvüsalın dövrün salnamə vərəqlərinə çevrilmiş yaradlcılıq nü­munələrinin toplanıb çap edilməsi pub­lisistika kitabxanamızı daha da zəngin­ləşdirər, yeni nəsil jurnalistlər üçün əlavə təcrübə mənbəyi olardı. 

“Ədalət” qəzetinin təsisçisi, Milli Məc­lisin deputatı Aqil Abbas, yubiliyarın tələ­bəlik və iş yoldaşlarından dövlət qulluğu veteranı İsrafil Qurbanov, tanınmış türko­loq Əli Şamil, yazıçı-publisist Akif Cabbar­lı, Əməkdar jurnalistlər Rəhim Hüseynza­də, Adil Cəmil, “Elm və həyat” jurnalının məsul katibi Maral Poladova, “Xalq qəze­ti”nin şöbə müdiri İmran Bədirxanlı, media meneceri Svetlana Şıxəliyeva və başqa­ları Hidayət Elvüsalı səmimi təbrik etdilər, onun yurdsevərliyindən, dostluğa sadiqli­yindən, mərd xarakterindən, özünəməx­sus dəst-xəttindən sevgi-sayğı ilə söz açdılar, səhhətində yaranmış problemin tezliklə aradan qalxmasını arzu etdilər.

Sonda Hidayət Elvüsal əməyinə ve­rilən qiymətə, söylənilən xoş sözlərə görə təşəkkürünü bildirdi, doğma Kəlbəcərinin azadlığa qovuşması və sürətlə bərpa edilməsinin ona mənəvi rahatlıq və yeni yaradıcılıq əhvalı gətirdiyini söylədi. 

T.RÜSTƏMLİ
XQ