Mədəniyyət Nazirliyinin dəstəyi, “Miras” mədəni irsin öyrənilməsinə kömək İctimai Birliyinin təşkilatçılığı ilə “5-ci Tərəkəmə yurdu” beynəlxalq folklor festivalı başlayıb. Ağsu rayonu Gəgəli kəndindəki folklore-turizm məkanı elat bayramına evsahibliyi edib.
Türkiyə, Gürcüstan və İtaliyadan qonaqların da qoşulduğu festivala Bakıdan, Qazax-Tovuz, Lənkəran-Astara, Şirvan-Salyan, Gəncə-Daşkəsən, Dağlıq Şirvan, Quba–Xaçmaz, Mil–Muğan, Qarabağ, Mərkəzi Aran, Abşeron–Xızı bölgələrindən folklor kollektivlərinin çıxışları ilə zəngindir. Kəndirbazlar, Zorxana, Oxatma, Çilingağac kimi milli oyunlar göz-könül oxşayır. Festival çərçivəsində rəsm əsərləri, dekorativ sənət nümunələri, kənd məhsullarından ibarət sərgi-yarmarka təşkil edilib. Tanınmış rəssamlar, heykəltaraşlar, el sənətkarları, idman ustaları ustad dərsləri keçirlər. Axşam saatlarında tərəkəmə həyat tərzi ilə bağlı filmlər göstərilir, müzakirələr aparılır.
Onu da deyək ki, qonaqlar gecəni kənddə əvvəlcədən müəyyən edilmiş evlərdə qalıb və ünsiyyət bağları qurublar. Bu gün sübh tezdən “Tərəkəmə marafonu” və qonaqların “Bel daşı əfsanəsi” marşrutu ilə hərəkət edəcəkləri nəzərdə tutulur.
Festivalın bir hədəfi də tərəkəmə həyat tərzinin və köç yollarının UNESCO-nun qeyri-maddi mədəni irs siyahısına salınmasıdır.
XQ
