Abşeron qədim türk məskənlərindəndir. Bu ulu diyarın toponimi Abbasqulu Ağa Bakıxanovun "Gülüstani-İrəm" əsərində “Əfşəran” şəklində yazılıb. Zaman-zaman Abşeronda istedadlı sənətkarlar yetişib, milli mədəniyyətin zənginləşməsinə töhfələr veriblər.
Yarımadanın hər qarışında tarixin izi var. Qalalar, mağaralar, türbələr dünənimizə şahidlik edir. Tarixi XIV əsrdən başlanan və İpək yolunun üzərində yerləşən Xırdalanda böyük karvansaraylar olub. Mərdəkan qalalarının yazılı daş qəlpəsi Sankt-Peterburqdakı Ermitaj muzeyində saxlanır. “Bir qalanın sirri”, Koroğlu”, “Nəsimi” və “Babək” filmlərinin əsas kadrları burada çəkilib. Yarımada özünün Ramana və Nardaran qalaları ilə də məşhurdur. Fatmayıda, Digahda, Masazırda, Hökməlidə və Sarayda qədim türbələrin qalıqları mövcuddur.
Bu məkanın söz-sənət qalaları ucaldan “memar”ları da çox olub. XX əsrin görkəmli tədqiqatçı və şairi Cəfər Rəmzinin “Deyilən söz yadigardır” kitabında Bakı-Abşeron ədəbi mühitini təmsil edən 170 şairin tərcümeyi-halı və əsərlərindən nümunələr toplanıb. Azadlıq mücahidi, AXC-nin yaradıcılarından olan Məhəmməd Əmin Rəsulzadə, filoloq-alim, dövlət xadimi Şıxəli Qurbanov, Xalq şairi Süleyman Rüstəm, akademik Lütfi Zadə, ünlü bəstəkarlar Qara Qarayev və Aqşin Əlizadə, Xalq rəssamları Əzim Əzimzadə, Qəzənfər Xalıqov və başqaları bu torpaqda boy atıb, ucalıblar.
Düz 100 il bundan öncə Xırdalanda dünyaya gəlmiş Xalq şairi Nəbi Xəzri ssenari müəlifi olduğu “Çiçəklənən Abşeron” sənədli filmində və şeirlərində bu torpağı ürəkdən vəsf edib.
Başqa zövqü vardır ana diyarın!
Əsdi göy Xəzərdən yel narın-narın.
Onun sahilində qayalıqların
Daşına baş qoyub ölərəm dedim...
Yeri gəlmişkən xatırladaq ki, bir müsamirədə Nəbi Babayevin oxuduğu şeir böyük ürək sahibi Səməd Vurğunun nəzərindən qaçmayıb, gənc şairin istedadını kəşf edib və 1945-ci ildə - 21 yaşında onu təkidlə Yazıçılar İttifaqına üzvlüyə keçirib.
Bu yerlər əruzu təmiz bilən, məclisi-şüəralarda bədahətən söz qoşan, qəzəl, meyxana-bədihə tipli ritmik-qafiyəli deyişmələri ilə tanınan xiridarları ilə də məşhurdur. Hələ 19-cu əsrin əvvəllərində Bakıətrafı kəndlərdə şair və xanəndələrin muğam məclisləri keçirilər, Qarabağdan, Şirvandan, hətta İrandan qəzəlxanlar və musiqiçilər qonaq gələrdilər. Özünü Füzulinin yadigarı sayan, şeirləri muğamla qoşa yaşayan, Masazırda abidəsi ucaldılmış Əlağa Vahidin, Hacı Mayılın, Həkim Qəninin, Ələkbər Şahidin... Abşeronun qumu və duzu kimi müalicəvi, ənciri, şanısı kimi şirin, dadlı kəlamları bu yurda şöhrət gətirib. Şairlərin təbi Suraxanı Atəşgahı, Məmmədli Yanardağı kimi sönməzdir.
Çağdaş ədəbiyyatın nümayəndələri Qəşəm Aslan, Məmməd Kazım, Ağacəfər Həsənli, Hafiz Rüstəm, Avdı Qoşqar, Yusif Hüseyn, Məlahət Yusifqızı, Günay Umud, Mina Rəşid, Mürvət Həkəri Abşeron ədəbi cameəsindən çıxmış qələm sahibləridir. Hər birinin bədii fəhmi, poetik hayqırtıları, həzin, lirik pıçıltıları var. 2012-ci ildə AYB-nin Abşeron filialı yaradılıb. Bölmənin təsis konfransında birliyin sədri, Xalq yazıçısı Anar, birliyin katibi, mərhum Xalq şairi Fikrət Qoca iştirak ediblər. Anar deyib ki, Abşeron şeir-sənət yurdu kimi həmişə diqqəti cəlb edib, indi də burada çox sayda yaşlı, eləcə də istedadlı gənc yazarlar var ki, diqqətə alınmaları vacibdir. Anar müəllim köçkün kimi Abşerona pənah gətirmiş qələm adamlarının da unudulmamasını yeni yaranan filialın rəhbərliyinə tövsiyə edib.
Bölmənin yarandığı qısa vaxtdan 100-dən çox şair və yazıçı birliyə cəlb olunub. Onların ədəbi uğurları fərəh doğurur. Yaradıcılıq gecələri, görkəmli şair, bəstəkar və alimlərlə yaddaqalan görüşlər təşkil edilir. Bölmənin yaşlı, xəstə üzvlərinə evlərində baş çəkilir.
AYB Abşeron bölməsinin sədri Şəhla Ağbulud həyata keçirilən kütləvi tədbirlərdən də həvəslə danışaraq dedi:
– Son dövrlərdə Xırdalandakı Heydər Əliyev Mərkəzində yüksək səviyyədə yubileylər, kitab təqdimatları olub. Heydər Parkında, “Aaaf Parkda” qonaq qismində dəvət edilən aşıqların, müğənnilərin iştirakı ilə bayramlar, eləcə də kitab sərgiləri, rayon ictimaiyyəti, məktəb və bağça uşaqları ilə görüşlər keçirilib. “Şeirə qrafik rəsm”, “Mənim dünyam” rəsm yarışması, “Vətənim Qarabağ”, “Abşeronum”, “Heydər Əliyevdən nə öyrəndim”, “Sevdiyim əsərlər” adlı inşa müsabiqələri, qiraət yarışmaları bu qəbildəndir. Eyni zamanda, uşaqların nitq qabiliyyətinin inkişafına kömək edən təlimlər olub. Digər rayonların şairləri ilə görüşlər xüsusilə yaddaqalandır. Abşeron Mərkəzi Kitabxana Sistemi ilə birgə tədbirlər də maraq doğurur. Hazırda 43 məktəb arasında keçirilən “Yaşıl dünya naminə” yarışı sona yetməkdədir. Yerli qələm sahiblərinin yaradıcılığı mənim baş redaktoru olduğum “Abşeron” qəzetinin səhifələrində və ölkə mətbuatında vaxtaşırı işıqlandırılır.
Bu günlərdə AYB-nin Natəvan klubunda Şəhla Ağbuludun “Ağ buludun kölgəsində” adlı kitabının təqdimatı keçirilib. Müəllifin bu toplusunda maraqlı hekayələri toplanıb.
Hafiz Rüstəm uzun illər “Maarif” nəşriyyatında çalışıb, şeir və poemaları, hekayə və oçerkləri, ədəbi araşdırma və tərcümələri diqqət çəkib. Hazırda “Kövsər” nəşriyyatının baş redaktorudur və bölmənin fəaliyyətində yaxından iştirak edir.
Abşeronlu qələm sahiblərinin ilhamı həmişə Xəzərin sularında ləpələnərək söz abidələrinə, qürur ifadələrinə dönsün.
Əli NƏCƏFXANLI,
AYB-nin üzvü