Qürbətdə milli mənsubluğundan güc alan gənc soydaşımız
Moskvada yaşayan 25 yaşlı Rusalina Rauf qızı Hüseynzadə qələm dostum Süleyman Hüseynovun nəvəsidir. Bakıda Bülbül adına orta ixtisas musiqi məktəbinin piano sinfində təhsil alıb. 13 yaşından skripkaya, 2 il sonra da violonçelə keçib.
Babasının verdiyi telefon nömrəsi ilə Rusalina xanıma zəng edib, uğur hekayəsini danışmasını istədim. Dedi ki, Xalq artisti Teymur Göyçayevin dəvəti ilə Qara Qarayev adına Dövlət Kamera Orkestrində qrup konsertmeysteri kimi fəaliyyətə başlayıb. Bakıda çoxsaylı mötəbər konsertlərdə uğurlu çıxışlar edib. Buna görə də məktəbi bitirdikdən sonra Bakı Musiqi Akademiyasına imtahansız daxil olub. Çox keçmədən Rusiya Federasiyası hökumətinin təqaüdü ilə Moskva Dövlət Konservatoriyasına qəbul edilib. 2022-ci ildə oranı fərqlənmə diplomu ilə bitirən Rusalina həmin il aspirantura təhsilinə başlayıb. Hazırda bədii rəhbər, RF Xalq artisti, professor İqor Qavrışın yanında assistentdir.
Gənc ifaçı dəfələrlə Moskvada, başqa böyük şəhərlərdə skripka və violonçel ilə konsertlər verib. Ötən ilin sentyabr ayında Saratovda Svyatoslav Knuşevitski adına beynəlxalq müsabiqədə ilk azərbaycanlı violonçelçi kimi ölkəmizi təmsil edib və təcrübəli rəqiblərini, o cümlədən erməni ifaçıların da hamısını geridə qoyaraq, müsabiqənin diplomantı olub. Bu, hələlik onun ən böyük uğurudur.
Rusalina onu da əlavə etdi ki, yaxın günlərdə Moskva konsevatoriyasında xüsusi proqramla konsert verəcək, Artur Oneggerin və Yohannes Bramsın sonatalarını, Jorj Bizenin “Fantaziya”sını, Sergey Raxmaninovun “Qrand Tanqo”sunu və digər klassik musiqiləri ifa edəcək. Gələn ay isə Sankt-Peterburq və Saratov şəhərlərində konsert verməyə hazırlaşır.
Sumqayıtda yaşayan babası Süleyman müəllim onun haqqında danışarkən böyük fərəh hissi ilə bildirmişdi ki, daha mötəbər müsabiqələrdə Rusiyanın adından çıxış etməsi üçün Rusalina Hüseynzadəyə RF vətəndaşlığı təklif olunub. Amma qız bundan qəti imtina edib. Bütün müsabiqə və festivallarda mütləq qaydada məhz Azərbaycanı təmsil etməkdə qərarlıdır. Bu barədə onun özünə sual verdim. Gülərək: – Burada nə var ki? – dedi. Sonra isə əlavə etdi:
– Xaricdə yaşayan hər bir soydaşımız Azərbaycan adının təəssübünü çəkməlidir. Əgər vətənpərvər olmasaq, burada hörmətimiz də azalar. Mən qarşıdakı mərhələdə Kraliça Elizabet, Pyotr Çaykovski, Emmanuel Feyerman adına və digər nüfuzlu müsabiqələrdə də səhnəyə Azərbaycanın adından çıxmaq əzmindəyəm. Müəyyən maneələr ola bilər, amma bu fikrimə alternativ görmürəm.
Çətinliklərə baxmayaraq, uğur hekayələrini artırmağa çalışan gənc soydaşımız bir sıra ölkələrdə də Azərbaycanı müxtəlif konsert proqramlarında, mədəniyyət tədbirlərində layiqincə təmsil edib. Rusalinanın repertuarını Azərbaycan bəstəkarlarından Qara Qarayev və Fikrət Əmirovun əsərləri də bəzəyir. Dediyinə görə, konsertlərdə F.Əmirovun Nazim Hikmətə həsr etdiyi “Poema-Monoloq” əsərini populyarlaşdıra bilməsi ilə qürur duyur.
Söhbətimiz zamanı Rusalina fərəhli məqamlarla bərabər, onda təəssüf yaradan bəzi məqamlara da toxundu. Bunlardan biri müasir Azərbaycan bəstəkarlarının violonçel üçün musiqilərinin az olmasıdır. Buna görə də, tutaq ki, piano və skripka üçün yazılmış hansısa əsərin üzərində işləyib, violonçel üçün uyğunlaşdırmaqla ifa edir. Daha bir təəssüfləndirici məqam kimi o, Rusiyada fəaliyyət göstərən Azərbaycan diasporu ilə sıx əlaqəsinin olmadığını bildirərək: – Onlar nədənsə tədbirlərinə daha çox estrada müğənnilərini dəvət edirlər, – dedi.
Rusalina Hüseynzadənin bir hobbisi də var: ingilis və rus dilləri üzrə tərcüməçidir. Bu dilləri musiqinin dilindən heç də zəif bilmir.
Qürbətdə xalqımızın adını ucaltmaq üçün yorulmaz səylər göstərən gənc istedada daha böyük uğurlar arzusu ilə:
Əli NƏCƏFXANLI
XQ
