“Dünyanı sənət xilas edəcək!” Bu günlərdə sənətsevərlər “Atatürk Mərkəzi”ndə bu fikrin işığına – yenicə çapdan çıxmış eyni adlı kitab-kataloqun təqdimatına toplaşmışdılar.
Tədbiri giriş sözü ilə açan “Uluslarlarası Aktvist Sənətçilər Birliyi”nin Azərbaycan üzrə təmsilçisi, rəssam Nəvai Metin kitabda 125 ölkədən 135 sənətçinin əsərlərinin toplandığını bildirdi. Rəssam bu qurumun əsas məqsədlərinin incəsənəti sevdirməklə, gənc istedadları üzə çıxarmaq olduğunu söylədi.
Xalq rəssamı Arif Hüseynov kataloqun nəşrini nəcib iş kimi alqışladı və 1990-cı illərdə Azərbaycan rəssamlarının əsərlərindən ibarət kataloqun çap olunduğunu yada saldı. Rəssam təklif etdi ki, hər bir türk ölkəsinin rəssamlarının da ayrıca kataloqunun nəşri günün tələbinə uyğun olardı.
Sənətşünas Ziyadxan Əliyev, Milli Məclisin Mədəniyyət Komitəsinin eksperti Əkbər Qoşalı, Qazax Xeyriyyə İctimai Birliyinin sədri İlham Pirməmmədov, ədəbiyatşünas Rüstəm Kamal kataloqun nəşrini sənət aləmində hadisə adlandırdılar, onun təşəbbüskarlarına və mərasimin təşkilatçılarına minnətdarlıq duyğularını ifadə etdilər. Digər natiqlər yeni kitab-kataloqun məziyyətlərindən danışdılar.
Tədbirdə rəssam Nəvai Metinin əsərləri də nümayiş olundu.
Ceyhun MİRZƏLİ
