Milli Olimpiya Komitəsinin (MOK) təsis etdiyi ikinci “İdman Filmləri və Proqramları Milli Televiziya Festivalı” keçirilir.
“Televiziya festivalları Azərbaycan idmanının salnaməsini yaradacaq. Ölkəmizdə idman öz həqiqi yerini tapır. Ümid edirəm ki, bu cür festivallar çox olacaq”.
Bu fikirləri Rəşid Behbudov adına Mahnı Teatrında müxtəlif federasiyaların təmsilçiləri və idman ictimaiyyətinin iştirak etdiyi açılış mərasimində mediaya müsahibəsində Milli Olimpiya Komitəsinin (MOK) vitse-prezidenti, Təşkilat Komitəsinin sədri Çingiz Hüseynzadə deyib. O, daha sonra bildirib ki, analoji festival 2-ci dəfə keçirilir. “İlk festival 2021-ci ildə MOK-un 30 illiyinə həsr olunmuşdu. Məqsəd gənclər arasında idmana marağı artırmaq və onların uğurlarını işıqlandırmaqdır. İkinci festivalın da uğurla keçəcəyinə əminik. İstəyirik ki, Azərbaycanı dünyaya tanıdan idmançılara, qəhrəmanlara həsr olunmuş bədii filmlər də çəkilsin və növbəti festivallarda bədii film nominasiyasında da qalibləri müəyyənləşdirək”.
Qeyd edilib ki, federasiyalar, televiziya kanalları, özəl studiyalar və yaradıcı kollektivlər bu istiqamətdə fəal iş aparır, filmlər, videoçarxlar çəkirlər. Bu festival Azərbaycan idmançılarına dəstək olacaq. Festival 5 Mart Bədən Tərbiyəsi və İdman Günü ərəfəsində başa çatacaq. Həmin gün münsiflər heyəti tərəfindən yüksək qiymət alan ilk üç film mükafatlandırılacaq. Ardınca MOK-un himninin yeni videoklipi təqdim olunub.
Mərasimdə festivalın münsiflər heyətinin sədri – atıcılıq üzrə Sidney–2000 Olimpiya Oyunlarının çempionu Zemfira Meftahətdinova bu kimi tədbirlərin artıq ənənəyə çevrilməsindən məmnunluq duyduğunu söyləyib: “Çox gözəl nominasiyalar var. Hər kəsi burada iştiraka dəvət edirik. Qoy, güclülər qalib gəlsin”.
Sonra “Azərbaycanın Olimpiya Odisseyası” layihəsi çərçivəsində sərbəst güləş üzrə XXX London Olimpiadasının qalibi Toğrul Əsgərov haqqında çəkilən "Ərtoğrul" filmi nümayiş olunub. Xatırladaq ki, bu film Lozanna şəhərində keçirilən I Beynəlxalq İdman Mətbuatı Assosiasiyası Festivalında Avropa qitəsini təmsil edib və “Avropa TOP 10-luğu”na düşüb.
XQ