Yekun dövlət imtahanı sessiyasında iştirak etdiyimiz Azərbaycan Milli Konservatoriyasının orkestr heyəti bizə əsgərlərin nizami sıra düzülüşünü xatırlatdı. Musiqi məbədinin kollektivi bir daha sənətə son dərəcə ciddi münasibətini sərgiləyirdi.
Yekun dövlət imtahanı verən, magistratura pilləsinin son kursunda təhsil alan gənc dirijorları müxtəlif musiqi alətləri ilə 65 nəfərlik orkestr heyəti müşayiət edirdi. Hər bir tələbə-dirijor orkestrin müşayiəti ilə 6 nəfərlik komissiya və qonaqlar qarşısında öz məharətini göstərə bildi. Onların hazırlığı, səriştəliliyi adamı valeh edirdi. Dinlədikcə, sözün əsl mənasında, musiqinin varlığını hiss edir, ruhunu duyurduq.
Azərbaycan Milli Konservatoriyasının rektoru, Xalq artisti Siyavuş Kərimi dedi ki, konservatoriyada imtahanlar daha çox praktiki keçirilir. Açıq format, şəffaflıq təmin edilir. Konservatoriyanın professor-müəllim heyətinin də tərkibi xalq çalğı alətləri üzrə peşəkar musiqiçilərdən, dirijor, xanəndə, bəstəkar və ictimai fənlər sahəsində öndə olan tanınmış şəxslərdən ibarətdir.
Konservatoriyanın mətbuat katibi Aysel Fikrət isə bildirdi ki, burada təhsil alan tələbələr qabiliyyət imtahanından keçdikləri üçün, demək olar ki, hazırlıqlı gəlirlər, üstəlik, tanınmış sənətkarlar konservatoriyada onlara ustad dərsləri keçirlər. Tələbələr arasında ölkəmizi dünya miqyasında təmsil edə biləcək gənclər var. Hər bir tələbəyə fərdi yanaşma sərgilənir. Çalışırıq ki, onlar öz qabiliyyətlərini tam göstərə bilsinlər.
Təhsil müəssisəsinin İmtahan mərkəzinin rəhbəri, sənətşünaslıq üzrə fəlsəfə doktoru Leyla Quliyeva konservatoriyada təhsil alan tələbələrin bir çoxunun xüsusi istedada malik olduğunu vurğuladı. O, da bütün proseslərin aşkarlıq şəraitində keçdiyinə diqqət çəkərək qiymətləndirmənin tam obyektiv olduğunu diqqətə çatdırdı.
Dirijorluq kafedrasının müdiri, dosent Leyla Zalıyeva isə dedi ki, tələbələr dövlət imtahanına orkestr rəhbərlərinin köməyi ilə hazırlaşıblar. Öz əsərlərini, aranjemanlarını, orkestrovkalarını orkestr qruplara təqdim edirlər.
Tələbələrin yazılı imtahan sessiyası ilə də tanış olduq. Rektor Siyavuş Kərimi zallara baxış keçirir, tələbələrə mane olmadan kənardan biletə salınmış suallara nəzər salırdı. Elə təəssürat yaranırdı ki, orada bütün proseslərə birbaşa rektor özü nəzarət edir. Tələbələr də bu barədə razılıqla danışdılar.
Sınağa çəkilən gənc dirijorların məharəti, dəhlizə yayılan xoş musiqi sədaları təəssüratlarımızı daha da zənginləşdirdi.
Rizvan FİKRƏTOĞLU,
Elşən AĞALAR (foto)
XQ
