Elə ki, 1804-cü ildə Rus imperiyasının qoşunları Gəncəni darmadağın etdi, Cavad xan və oğlu öldürüldü, dərhal qədim şəhərin adı da dəyişdirilib Yelizavetpol adlandırıldı. 1918-ci ildə Gəncə adı yenidən bərpa edilsə də, təəssüf ki, bu da uzun sürmədi. 1935-ci il fevralın 22-də şəhərin adı yenidən dəyişdirilərək Kirovabad oldu.
Gəncə ziyalıları illərlə şəhərin öz adının qaytarılmasına çalışdılar. Sovetlər dönəmində bu, böyük cəsarət tələb edirdi. Bu zaman ulu öndər Heydər Əliyevin dühası, zəkası köməyə gəldi. Məhz böyük şəxsiyyətin qətiyyəti ilə 1980-ci ildə Gəncə şəhəri 2 rayona bölündü və bu rayonlardan birinə Kəpəz, digərinə isə Gəncə adı verildi. Məhz Ulu öndərin müdrikliyi və uzaqgörənliyi sayəsində Gəncə adının hafizələrdən silinməsinə imkan verilmədi və bu ad yenidən səslənməyə başladı.
Ulu öndər, həmişə olduğu kimi, Gəncəyə və gəncəlilərə olan ehtiramını özünəməxsus səmimiliklə ifadə edirdi: “Gəncə Azərbaycan xalqının qədim, zəngin tarixini özündə əks etdirən diyardır, gözəl bir şəhərdir. Azərbaycan xalqının qədim tarixini, mədəniyyətini, ədəbiyyatını, şeirini Şərq aləmində, bütün dünyada Nizami Gəncəvi ilə tanıyırlar. Azərbaycana, Azərbaycan xalqına təkcə Nizami Gəncəvi kimi dahi bir şəxsiyyət bağışladığına görə Gəncə torpağı, gəncəlilər əbədi minnətdarlığa layiqdirlər”.
Sonrakı dövrlərdə də Ümummilli lider Gəncəyə xüsusi münasibət bəsləyib: “Bizim böyük şairimiz Nizaminin adı Bakıda çox yerlərdə var idi, amma mən istəyirdim ki, bir rayon da Nizaminin adını daşısın... O vaxt Gəncənin adını bərpa etmək böyük cəsarət tələb edirdi. Biz o rayonlardan birinin adını “Gəncə”, o birisinin adını “Kəpəz” qoyduq.
Bu məlumdur, gərək ki, bir neçə dəfə deyiblər, – o vaxt buradan təkliflər verilmişdi, Moskvaya da artıq yazılmışdı, çünki o zaman biz bu rayonları özbaşına yarada bilməzdik, bunun üçün Moskvanın qərarı olmalı idi. Deyəsən, birinə “Zavod rayonu”, birinə də “Proletar rayonu” adı verilmişdi. Yəni layihədə, Sovet hökumətinin qərar layihəsində bu vardı. Mən o layihəni dəyişdirdim və “Gəncə ”, “Kəpəz” adları verdik. Bakıda yaranan yeni rayonu isə, - o vaxt Bakıda on rayon var idi, - “Nizami rayonu” adlandırdıq. Bizim böyük şairimiz Nizaminin adı Bakıda çox yerlərdə var idi, amma mən istəyirdim ki, bir rayon da Nizaminin adını daşısın. Bir vaxt da xalqımız üçün, eyni zamanda da Gəncə üçün, – çünki Nizami də gəncəlidir, Nizami deyəndə də Gəncə düşünürsən, – bir rayonun adı “Gəncə”, o biri də “Kəpəz” qoyuldu, – Kəpəz də Gəncədir. Bəli, biz bu milli adları 1980-ci ildə qoyduq".
Əslində bu, qələbə şəhərin adını, keçmişini tarixdən silmək istəyənlərin üzərində qazanılan qələbə idi. Başqa sözlə, Heydər Əliyev siyasətinin qələbəsi idi.
Nəhayət, vətənsevər insanların illərlə uğrunda mübarizə apardığı, bu yolda təqiblərə, təzyiqlərə məruz qaldığı bir arzu uğurla nəticələndi, 1989-cu ilin 30 dekabrında zəngin tarixi keçmişə malik Gəncə öz adına qovuşdu.
Qeyd edək ki, 1989-cu il noyabrın 29-da Kirovabad Şəhər Xalq Deputatları Sovetinin sessiyasında sözügedən məsələ müzakirə olundu. Gəncə adının bərpası təklifi qəbul edildi və ertəsi gün qərar verildi. Dekabrın 30-da isə Azərbaycan SSR Ali Sovetinin Rəyasət Heyəti belə bir qərarı təsdiq etdi: “Gəncənin tarixi adını bərpa etmək haqqında şəhər vətəndaşlarının, əmək kollektivlərinin və respublikanın geniş ictimaiyyətinin çoxsaylı müraciətini, Kirovabad Şəhər Xalq Deputatları Sovetinin xahişini nəzərə alaraq və Azərbaycan SSR Konstitusiyasının 114-cü maddəsinə (18-ci bənd) uyğun olaraq “Kirovabad şəhəri Gəncə şəhəri adlandırılsın”.
Beləliklə, Azərbaycan rəsmən müs-təqil olmamışdan əvvəl Gəncənin tarixi adı özünə qayıdır, ədalət bərpa olunur, özü də bu dəfə əbədi olaraq.
Bu gün, dekabrın 30-da azadlıq, istiqlaliyyət uğrunda daim mübarizə aparan, qurbanlar verən qədim və qəhrəman Gəncə şəhərinin adının bərpasından 34 il keçir. Şəhərin adını da, ulu Nizamisini də, qəhrəman Cavad xanını da sevən insanların illərlə uğrunda mübarizə apardığı, bu yolda təqiblərə, təzyiqlərə məruz qaldığı bir arzu sonda uğurla nəticələndi.
Yenidən hakimiyyətə qayıdan ulu öndər Heydər Əliyevin müdrikliyi və uzaqgörənliyi sayəsində bu gün Gəncə xoşbəxt şəhərlərdən biridir. Ümummilli liderin layiqli davamçısı, Azərbaycan Respublikasının Prezidenti İlham Əliyevin qayğısı sayəsində şəhər öz görkəmini tamamilə dəyişib, elm, mədəniyyət mərkəzi olaraq dünya miqyasında tanınıb, qədimiliyi və müasirliyi, həm də gözəlliyi ilə göz oxşayır.
Hamlet QASIMOV
XQ-nin bölgə müxbiri,
Gəncə