Azərbaycan Dövlət Teatr Muzeyində Mədəniyyət Nazirliyi və Azərbaycan Gənclər Fondunun dəstəyi, “İRƏLİ” İctimai Birliyinin təşkilatçılığı ilə Əməkdar incəsənət xadimi, şair Baba Vəziroğlu ilə görüş keçirilib.
Tədbiri giriş sözü ilə açan “İRƏLİ” İctimai Birliyinin katibi Riad Cəbrayılov “Heydər Əliyev İli”nə həsr olunmuş layihə çərçivəsində mütəmadi olaraq mədəniyyət xadimləri ilə maarifləndirici və interaktiv görüşlərin keçirildiyini bildirib. Milli ədəbi mühitin formalaşmasında gənclərə olan diqqət və qayğıdan söhbət açan Riad Cəbrayılov bu səpkidə keçirilən müxtəlif tədbirlərdən də bəhs edib.
Sonra şair Baba Vəziroğlu geniş təqdimatla çıxış edərək Ulu öndər Heydər Əliyevlə bağlı olan xatirələrindən, eləcə də müasir Azərbaycan ədəbiyyatı və şeiriyyətinin inkişafı barədə söhbət açıb. Şair son dövrdə yazdığı şeirlərdən parçalar söyləyib.
Görüş “Azərbaycan ədəbiyyatının inkişafında Heydər Əliyev amili”, “Mədəniyyətimizin yaşadılması, inkişafı və təbliğində Azərbaycan dili və ədəbiyyatının rolu” və “Ədəbi mühitdə yeni, innovativ yanaşmalar: Yaradıcı sənayenin inkişafı kontekstində müasir yazarlıq ənənələrinə baxış” mövzularında panel müzakirələrlə davam edib. Auditoriyanın çoxsaylı sualları cavablandırılıb.
F.HÜQUQQIZI
XQ
