Avstriyanın Baden şəhərində Azərbaycanın Əməkdar artisti, pianoçu və bəstəkar İsfar Sarabski və tarzən Bəhruz Zeynalın konsert proqramı maraqla qarşılanıb.
Caz konsertində Azərbaycan və Avropa bəstəkarlarının əsərləri, həmçinin Azərbaycan xalq mahnıları caz improvizasiyaları ilə təqdim olunub. Eləcə də İsfar Sarabskinin bəstələdiyi “Novruz”, “Qarabağ atları”, “Area DNA”, “The Edge” və “Naməlum“ əsərləri, Bəhruz Zeynalın isə müəllifi olduğu “Batin” kompozisiyaları tamaşaçıların alqışlarını qazanıb. İ.Sarabskinin bəstələdiyi əsəri isə ilk dəfə ictimaiyyət üçün səsləndirilib.
Qeyd edək ki, İsfar Sarabski və onun rəhbərlik etdiyi musiqi qrupu sentyabrın 15-dən oktyabrın əvvəlinədək Azərbaycan musiqi mədəniyyətinin tanıdılması məqsədilə Avropanın bir sıra ölkələrində qastrol səfərindədir. Səfər çərçivəsində məşhur “Warner Music Group” şirkətinin əməkdaşlığı ilə yazılan “Planet” albomunun da təqdimatı keçirilir.
***
Azərbaycan Dövlət Gənc Tamaşaçılar Teatrının kollektivi Qırğızıstanın paytaxtı Bişkek şəhərində keçirilən “ART – ORDO 2023” IX Teatr Festivalında Ülviyyə Heydərovanın eyniadlı pyesi əsasında Elşad Rəhimzadənin quruluş verdiyi “İnanıram” adlı monotamaşa ilə çıxış edib.
Xalq artisti Baken Kıdekeyavanın 100 illiyinə həsr olunmuş festivalda tamaşanın yaradıcı heyəti festivalın xüsusi mükafatına, teatrın aktrisası Zemfira Əbdülsəmədova isə ana roluna görə "Ən yaxşı qadın" nominasiyası üzrə mükafata layiq görülüb.
Səhnə əsəri Vətən sevgisini bütün sevgilərdən daha üstün tutan şəhidlərimizə və onların analarına həsr olunub.
Hazırladı:
Ə.DOSTƏLİ
XQ
