İyirmi ildən bəri Estoniyada yaşayan Rövşən Nur bir çox beynəlxalq sərgilərin iştirakçısı kimi sənətsevərlərə yaxşı tanışdır. Rəssamın milli xalçalarımıza və təsviri sənətimizə həsr olunan sərgisi Azərbaycan Respublikası Diasporla İş üzrə Dövlət Komitəsinin dəstəyi ilə Tallinn şəhərindəki Dizayn və Memarlıq Qalereyasında açılıb.
Sərginin açılış mərasimində rəsmi şəxslər, mədəniyyət və incəsənət xadimləri, Estoniyada yaşayan etnik azlıqların nümayəndələri iştirak ediblər. Qonaqlara milli musiqi və rəqslərimiz, həmçinin Azərbaycan mətbəxinin ləziz təamları təqdim olunub.
Sərgidə rəssamın “Tarix” mövzusunda yaratdığı 100-ə yaxın əsəri nümayiş etdirilir. Ekspozisiyaya baxanlar onun fərdi yaradıcılıq üslubunu yüksək qiymətləndirirlər. Ziyarətçilərin, həmçinin xalçatoxuma və naxışların rəsmi üzrə ustad dərslərində iştirak etmək imkanı var.
Rövşən Nurun Milli Mədəniyyətlər Günü ilə əlaqədar daha bir sərgisi Tallinin “Baron” otelində təşkil olunub və davam edəcək. Bu sərgidə, həmçinin Azərbaycanın milli xalçaları nümayiş etdirilir, xalçaçılıq üzrə ustad dərslərinin təşkili nəzərdə tutulur.
“Tarix” sərgisi sentyabrın sonunadək, “Baron”dakı sərgi isə ayın 24-dək davam edəcək.
Ə.DOSTƏLİ
XQ
