Azərbaycan Yazıçılar Birliyinin (AYB) Natəvan klubunda şair, Prezident təqaüdçüsü, Beynəlxalq Rəsul Rza ədəbi mükafatı laureatı Balayar Sadiqin yenicə çapdan çıxmış “Yaddaş ətri” şeirlər və poemalar kitabının təqdimatı olub.
Tədbiri AYB-nin katibi İlqar Fəhmi açaraq, çağdaş poeziyamızın tanınmış nümayəndələrindən biri olan Balayar Sadiqin yaradıcılıq məziyyətlərindən bəhs etdi. Şair-publisist Ağacəfər Həsənli, filologiya elmləri doktoru, professor Elman Quliyev, “Kredo” qəzetinin baş redaktoru Əlirza Xələfli və başqaları müəllifin poetik duyumu, hadisələrə özəl yanaşması, poetikasının janr müxtəlifliyi barədə danışdılar. Qeyd olundu ki, kitabda şairin maraqla oxunan “Gülümsə, Vətən”, “Qızılbaş”, “Sözün Lənkəran ətri”, “İstanbula məktub” və “Zindan görüşləri” poemaları da yer alıb. Natiqlər ona yeni yaradıcılıq uğurları arzuladılar.
Balayar Sadiq tədbirə görə AYB rəhbərliyinə, xoş sözlərə görə natiqlərə minnətdaqlığını bildirdi, yeni şeirlərini oxudu və “Yaddaş ətri”nin nüsxələrini imzalayaraq oxuculara təqdim etdi.
Hazırladı:
Ə.DOSTƏLİ
XQ
