Mədəniyyət Nazirliyinin dəstəyi ilə Azərbaycan Dövlət Nəfəs Alətləri Orkestri Rusiyanın Yekaterinburq şəhərində IX Beynəlxalq Nəfəs Alətləri Orkestrləri Festivalında ölkəmizi təmsil edib.
Festivala bədii rəhbər-direktor, dirijor, Əməkdar incəsənət xadimi Əlibala Rzayevin başçılığı ilə 36 nəfərlik heyət qatılıb. Eyni zamanda, Əməkdar artist Aqil Cəfərovun rəhbərliyi ilə Rusiyanın Krasnoyarsk vilayətində fəaliyyət göstərən “Odlar yurdu” Azərbaycan Xalq Mahnı və Rəqs Ansamblı festivalda orkestrlə birgə çıxış edib.
***
Azərbaycan və Rusiya pianoçusu, bəstəkar Riad Məmmədov “Live at The Pushkin Museum” albomunun işıq üzü görməsi münasibətilə Moskvada xüsusi konsert proqramı ilə çıxış edib.
“Muzeon” parkında təşkil olunan konsertdə Riad Məmmədov konsertin birinci hissəsində İohann Sebastyan Baxın əsərlərini öz transkripsiyasında və bu əsərlərə improvizələri təqdim edib. Daha sonra proqram caz standartlarının ifası ilə davam edib.
***
Dövlət Turizm Agentliyinin tabeliyində fəaliyyət göstərən “Şahdağ” Turizm Mərkəzinin və Azərbaycan Motoklublar Birliyinin birgə təşkilatçılığı ilə “Şahdağ motosiklet festivalı” keçirilib.
İlk dəfə olaraq təşkil edilən festivalda ölkənin müxtəlif bölgələrindən 300-ə yaxın motohəvəskar iştirak edib. Onlar güclü və dəbli motosiklet, təcrübəli motosikletçi, uzağa yürüş, qol güləşi və digər müsabiqələrdə mübarizə aparıblar. Festival çərçivəsində kompleksin qonaqları üçün motohəvəskarlar tərəfindən ödənişsiz peşəkar təlimlər keçirilib. Şou proqramlar da maraqla qarşılanıb.
Hazırladı:
Əli NƏCƏFXANLI,
“Xalq qəzeti”