Qırğızıstanın Oş şəhəri Mərkəzi Asiyanın qədim şəhərlərindən biridir. Şəhərin 2500 yaşı var. Minilliklər ərzində yerləşdiyi coğrafi məkana görə Böyük İpək Yolunun tranzit şəhəri olub. Yerli sakinlər səyyahlara, tacirlərə, karvan sahiblərinə qulluq etməklə cörəkpulu qazanıblar. Oş ticarət üçün əlverişli yer olduğundan tacirləri, cənətkarları, heyvandarları və əkinçiləri özünə cəlb edib.
Yaşıl dağ yamaclarında yerləşən Oş şəhərinin ən nadir tarixi abidəsi Cüleyman-Too dağıdır. Bu müqəddəs dağ əsrlərlə şəhəri yaddelli düşmənlərdən qoruyub və uzun illərdir ki, zəvvarların və turistlərin sevimli yerinə çevrilib. 2009-cu ildə Süleyman-Too UNESCO-nun Ümumdünya irsi siyahısına salınıb.
Qərbdən Şərqə uzanan Süleyman-Too dağının uzunluğu 11 min 140, eni 560, hündürlüyü 1162 metrdir. Dağ qədim zamandan sakral əhəmiyyətə malik olub, bunu qorunub saxlanan petroqliflər sübut edir.
Fərqanənin Ərəb xilafətinin tərkibinə daxil olduğu dövrdə Süleyman-Too haqqında ilk yazılı məlumata ərəb cöğrafiyaşünası əl-İstaxrinin “Dövlətlərin yol tarixi” (X əsr) əsərində rast gəlinir. XVI əsrdə dağ Bara-Kux, conra isə XX əsrə qədər Taxtı-Süleyman adlanıb.
Dağın zirvəsində “Taxtı-Süleyman” məscidi yerləşir, tarixçilər bu məscidi Baburun hakimiyyəti dövrünə aid edirlər. Dağın ətəyində isə XVI əsrə aid “Abdullaxan ravatı” məscidi və Asaf ibn Burxiya (XVIII əsr) mavzoleyi var. Süleyman-Too dağında yeddi mağara da var ki, bunlardan ən məşhuru Çakka-Tamar və Tepeunkur mağaralarıdır. Dağdakı ən kiçik mağara Tamçı Tamar adlanır. Bu mağaranın lap dərinliyində Quranı xatırladan kitab formasında daş var. Bu daşın üzərinə əlini qoyub nə arzu etsən, çin olur. Bu mağaraya düşmək isə hər igidin işi deyil. Mağaraların divarlarından axan su damcılarına Süleymanın göz yaşları deyilir. Dağın sağ ətəyində orta əsrlərə aid hamam var.
Süleyman-Too haqqında saysız əfsanələr dolaşır. Deyirlər ki, bu dağda Məhəmməd Peyğəmbər namaz qılıb, ona görə dağın zirvəsində ərəb hərfləri ilə yazılan “Allah” sözünü oxumaq olur. Dağın zirvəsində, həmçinin böyrü üstə uzanmış insan silueti görünür. Rəvayətə görə bu, Süleyman peyğəmbərin siluetidir. Yerli sakinlər danışır ki, Süleyman peyğəmbər öz ordusu ilə səyahət edərkən bu dağa çatır və orduya dayanmaq əmri verir. O, əli ilə “Xoş!”, yəni “Kifayətdir!” işarəsini göstərir. Bu dağ o gündən Süleyman-Too, şəhər isə Oş adlanır.
X əsrdən başlayaraq, Asiya qitəsinin hər yerindən zəvvarlar bu dağa ziyarətə gəlir. Belə hesab olunur ki, Süleyman peyğəmbər bu dağda Allaha dualar edib və daşların üzərində onun alnının və dizlərinin izləri qalıb. Hər bir müsəlman üçün müqəddəs olan bu yerdə Əmir Teymurun nəticəsi, Böyük Moğollar Sülaləsinin banisi Məhəmməd Zəhirəddin Babur (1483-1530) özünə mehrablı kiçik bir hücrə inşa etdirib. İndi həmin yerdə ağ daşdan məscid tikilib və arxiv mənbələrinə görə “Baburun evi” ni xatırladır.
Əfsanəyə görə, 5 zirvəsi olan Süleyman-Too ali qüvvələrlə yer arasında əlaqə yaradır. Dağın zirvələri Taxtı-Süleyman və ya Buura-Too ( Dəvə-dağ), Şor-Too (Duz dağı), Kattama-Too (Qatlama dağ), Ruşan-Too (Ən yüksək) və Eer-Too (Yəhər dağ) adlanır. Dağın zirvələrində və yamaclarında çoxsaylı qayaüstü rəsmləri olan mağaralar turistlərin diqqətini cəlb edir. Dağda insan və heyvan, həndəsi fiqurları əks edilən 101 obyekt var. Burada zəvvarların sitayiş etməsi üçün coxlu məkan mövcuddur ki, onların 17-də sonsuzluqdan, baş və bel ağrılarından əziyyət çəkənlər şəfa tapır.
Süleyman-Too dağında Bel-Taş adlanan maili yüksəklik müalicəvi əhəmiyyətə malikdir. Kim bu yerdə üç dəfə beli üstə aşağı sürüşsə, oynaqlarındakı və onurğasındakı ağrılara son qoyular. “Ene beşiyi” (“Ana beşiyi”) adlanan yerdə övladı olmayanlar uşaqları olsun deyə dilək tuturlar.
Turistlərin ən çox sevdiyi yerlərdən biri dağdakı mağara-muzeydir. İkimərtəbəli muzeyin birinci mərtəbəsi sonradan genişləndirilib, ikinci mərtəbə isə öz təbii halında saxlanılıb. Bu muzeydə 35 min ekcponat- təbii sənət əsəri nümayiş etdirilir. Muzeydəki bəzi artefaktların yaşı 3000 ildən çoxdur. Mağara- muzeyin qarşısındakı meydançadan Oş şəhərinə gözəl mənzərə açılır.
Süleyman-Too oda sitayiş edən insanlar üçün də müqəddəs yer sayılıb. Bəzi tarixçilər bildirir ki, zərdüştilik dövründə Zərdüşt bu dağda yaşayıb və məşhur “Avesta”nı burada yaradıb. Dağda od və su məbədinin mövcudluğu buna sübutdur.
Mərkəzi Asiyada müqəddəs kadamjay, ərəb dilindən tərcümədə “Müqəddəsin izi” adlanan Süleyman-Too əsrlər boyu minlərlə insanın arzularını çin edib, onlara şəfa verib.
Xatırladırıq ki, qədim Oş şəhəri 2019-cu ildə “Türk dünyasının mədəniyyət paytaxtı” olub.
Qulu KƏNGƏRLİ,
“Xalq qəzeti”nin xüsusi müxbiri
Bişkek