Avqust şəhidlərinə ehtiram
“Naxçıvan Şəhid Ailələri” İctimai Birliyinin təşkilatçılığı və Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəliyinin dəstəyi ilə avqust ayında doğum günü olan şəhidlərin anım tədbiri keçirilib.
Dövlət və hökumət rəsmiləri, şəhid ailələri, qazilər, ictimaiyyət nümayəndələrinin iştirak etdiyi tədbirdə əvvəlcə ümummilli lider Heydər Əliyevin və şəhidlərin əziz xatirəsi bir dəqiqəlik sükutla yad edildikdən sonra Naxçıvan televiziyasının yad olunan şəhidlərlə bağlı hazırladığı videoçarx nümayiş etdirilib, tələbələr videoçarxda adları çəkilən 39 şəhidin portretləri ilə səhnəyə çıxıblar.
Naxçıvan Muxtar Respublikası Əmək və əhalinin sosial müdafiəsi nazirinin müavini, nazir vəzifəsini müvəqqəti icra edən Fərid Bağırzadə bildirib ki, səlahiyyətli nümayəndəliyin dəstəyi ilə bu ilin əvvəlindən etibarən hər ayın sonunda doğum günü həmin aya düşən şəhidlərin xatirəsinə həsr olunan anım tədbiri keçirilir. Bu, artıq 8-ci anım tədbiridir.
Naxçıvan Muxtar Respublikasının təhsil naziri Elxan Nəcəfov qeyd edib ki, Vətən müharibəsindəki şanlı qələbədə Naxçıvanın ümumtəhsil məktəblərinin məzunlarının da imzası vardır.
Şəhid Zülal Mədətlinin atası Rəhim Mədətov və şəhid Şükür Hacıyevin anası Fatma Şükürlü igid övladları ilə fəxr etdiklərini bildirib, onların xatirəsinin əziz tutulmasına görə minnətdarlıq ediblər. Sonra “Altay” teatrının aktyorlarının ifasında şəhidlərin xatirəsinə həsr olunmuş şeir-kompozisiya təqdim olunub.
Yüksək bal toplamış məzunlar
Naxçıvan Dövlət Milli Dram Teatrında ali məktəblərə qəbul imtahanlarında yüksək bal toplamış məzunların mükafatlandırılması mərasimi keçirilib.
Naxçıvan Muxtar Respublikasının baş naziri Ceyhun Cəlilov ölkəmizdə təhsilə qayğıdan, Naxçıvanda bu sahədə qazanılan uğurlardan bəhs edib. O, muxtar respublikada Prezidentin səlahiyyətli nümayəndəsi Fuad Nəcəflinin tədbir iştirakçılarına salamlarını, uğur qazanmış məzunlara, onların müəllimlərinə və valideynlərinə təbriklərini çatdırıb.
Baş nazir bildirib ki, 2023–2024-cü tədris ilində muxtar respublikada 4569 şagird ümumi orta təhsil səviyyəsini, 3500 şagird tam orta təhsil səviyyəsini başa vurub. 8 şagird qızıl, 1 şagird gümüş nişana, 256 şagird isə fərqlənmə attestatına layiq görülüb. Tam orta təhsil səviyyəsi üzrə fərqlənmə attestatına layiq görülən şagird sayı ötən illə müqayisədə 3 dəfə çox olub. Ali təhsil müəssisələrinə tələbə qəbulu müsabiqəsində 222 nəfər 500–600, 78 məzun 600–650, 27 şagird isə 650–700 intervalında bal toplayıb. Ötən illə müqayisədə yüksək nəticə göstərən məzunların sayı 67 faiz artıb. Bu da muxtar respublikada son 5 ildə əldə olunan ən yüksək göstəricidir.
Naxçıvan Muxtar Respublikası Təhsil Nazirliyinin əməkdaşı Gültəkin Rüstəmova ötən tədris ilində əldə olunan ümumi nəticələr barədə məlumat verib.
Valideynlər adından çıxış edən Ordubad rayonunun Dırnıs kənd tam orta məktəbinin direktoru Taleh Qasımov öz övladı da daxil olmaqla rəhbərlik etdiyi məktəbin 8 məzununun hər birinin tələbə adını qazandığını, onlardan birinin artıq Qarabağ Universitetinin tələbəsi olduğunu bildirib.
Ali məktəblərə keçirilən qəbul imtahanlarında 691,9 bal toplayaraq muxtar respublika 1-cisi olan Kənan İsmayıllı qazandığı uğurun təməlində müasir tədris şəraitinin dayandığını bildirib.
Sonra Naxçıvan Muxtar Respublikasının baş naziri Ceyhun Cəlilov 500–700 intervalında nəticə əldə etmiş məzunlara mükafatlar təqdim edib.
Səbuhi HƏSƏNOV
XQ
