Beynəlxalq müşahidəçilər Beyləqanda
83 saylı Beyləqan DSK-nın sədri Zakir Vəlişov “Seçki 2024” Müstəqil Media Mərkəzinə açıqlamasında bildirib ki, ATƏT/DTİHB müşahidəçiləri dairədə seçkiyə hazırlıq prosesini izləyiblər: “Dairədə qeydə alınmış 6 namizəd mübarizə aparır. Namizədlərin seçkiqabağı təşviqat kampaniyasını aparmaları üçün qanunvericiliyə uyğun olaraq, hamısına bərabər şərait yaradılıb. Bütün məntəqələrdə qapalı və açıq görüş yerləri ayrılıb, o cümlədən, təşviqat lövhələri yerləşdirilib”.
Seçkilər ölkəmizi gələcəyə aparır
“İlk dəfə səs vermək mənim üçün böyük əhəmiyyət kəsb edir. Bu, yalnız səs vermək deyil, eyni zamanda, gələcəyimizin qurulmasında iştirak etmək deməkdir”. Bu fikirləri “Seçki 2024” Müstəqil Media Mərkəzinə açıqlamasında parlament seçkilərində Sumqayıtda ilk dəfə səs verəcək Nuray Əzimli bildirib ki, sumqayıtlı bir gənc olaraq, doğulduğum və böyüdüyüm şəhərin, eləcə də bütün Azərbaycanın xoşbəxt gələcəyinə səs vermək mənim üçün qürurvericidir: “Düşünürəm ki, seçkilər Vətənimin sabahı üçün mühüm məqamdır və mən bunun bir parçası olduğuma görə çox sevinirəm”.
SMK-nın 75 dairədə nümayəndəsi var
"Vətəndaş Cəmiyyəti Uğrunda” Seçki Müşahidə Koalisiyası Naxçıvan Muxtar Respublikası da daxil olmaqla, ölkə üzrə 75 seçki dairəsində 500 nəfərdən çox şəxs ilə müşahidə aparacaq. Müşahidəçilər QHT üzvləri, fəalları və könüllüləridir. Koalisiya müşahidə prosesinə Ağdam, Cəbrayıl, Zəngilan, Füzuli, Laçın, Kəlbəcər rayonlarında və Şuşa şəhərində müşahidəçi kimi doğma yurdlarına qayıtmış QHT nümayəndələri cəlb olunub.
Bir dairədə 13 namizəd
12 saylı Xəzər birinci Seçki Dairəsinə 37 məntəqə daxildir. Dairə üzrə 47 min 981 seçici qeydə alınıb. Müraciət edən 13 nəfərdən hamısının namizədliyi qeydə alınıb.
Bunu “Seçki 2024” Müstəqil Media Mərkəzinə açıqlamasında 12 saylı Xəzər birinci DSK-nın sədri Mütəllim Balaqardaşov deyib. DSK sədri onu da bildirib ki, məntəqə seçki komissiyalarının üzvləri üçün MSK tərəfindən təşkil olunan maarifləndirici treninqlər başa çatıb.
