Azərbaycanın Böyük Britaniyadakı səfirliyinin yeni inzibati binasının açılışı ilə əlaqədar iyulun 25-də təntənəli tədbir keçirilib. COP29 mövzusuna həsr olunan mərasimdə iki ölkə arasında əlaqələrin tarixinə və inkişaf perspektivlərinə də nəzər salınıb.

Səfir Elin Süleymanov COP29-a ev sa­hibliyi edəcək Azərbaycanın diqqətinin tam şəkildə iqlim fəaliyyətinə yönəldiyini və ölkəmizin bütün dünya üçün həyati əhəmiy­yət daşıyan iqlim məqsədlərinin irəli aparıl­ması üçün əlindən gələni etdiyini bildirib. Diplomat bu məsuliyyətli işdə ilk gündən Azərbaycana dəstəyini əsirgəməyən Brita­niya tərəfinə təşəkkürünü bildirib. 

COP29-un Prezidenti, ekologiya və tə­bii sərvətlər naziri Muxtar Babayev bir neçə gün əvvəl Azərbaycan Prezidenti İlham Əliyevin “Avropa Siyasi Birliyi”nin Zirvə toplantısında iştirak etmək üçün Britaniya­ya işgüzar səfər etdiyini xatırladaraq, Azər­baycanın bu ölkədəki səfirliyinin yeni bi­nasında keçirilən tədbirdə həm də ikitərəfli dostluq münasibətlərinin qeyd olunduğunu vurğulayıb. Londonun iqlim fəaliyyətində vacib mərkəz rolu oynadığını qeyd edən M.Babayev iyunun sonunda Britaniyaya səfəri zamanı keçirdiyi görüşlərdən və qa­tıldığı tədbirlərdən söz açıb. COP26-ya ev sahibliyi etmiş Birləşmiş Krallığın vacib tərəfdaş olduğunu deyən M.Babayev brita­niyalı həmkarlarına COP29-un uğurla keçi­rilməsi istiqamətində göstərdikləri dəstəyə görə təşəkkür edib. 

Birləşmiş Krallığın enerji təhlükəsizli­yi və sıfır emissiya məsələləri üzrə dövlət katibi Ed Miliband çıxışında tədbirdə iş­tirak etməkdən şərəf duyduğunu bildirib. O, iqlim dəyişikliyinin qarşısının alınması və dünyanın “yaşıl” inkişafı üçün ölkələri bir araya gətirən COP tədbirlərinin əhə­miyyətini xüsusi vurğulayıb. Dövlət kati­bi indiyədək keçirilmiş COP görüşlərində razılaşdırılmış tədbirlərin davam etdiril­məsinin, habelə COP29-da iqlim maliy­yələşməsi məsələsi üzrə vacib razılığa gəlinməsinin iqlim məqsədlərinin təmin edilməsi baxımından mühüm əhəmiyyət daşıdığını diqqətə çatdırıb. Bu kontekstdə o, iqlim problemlərindən ən çox əziyyət çəkən ölkələrə dəstək verilməsinin önə­minə diqqət çəkib. Ed Miliband vurğulayıb ki, Britaniya COP29-un uğurla keçməsi və gözlənilən nəticələrin əldə olunması üçün Azərbaycana hər cür dəstək verməyə və yaxından tərəfdaşlıq etməyə hazırdır.

Tədbirdə Azərbaycan Prezidenti İlham Əliyevin COP29-da iştirakla bağlı Britani­yanın Baş naziri Kir Starmerə ünvanladığı dəvət məktubunun orijinal nüsxəsi Ed Mi­libanda təqdim edilib.

“The City of London” merinin rəsmi nümayəndəsi Alderman Qreq Couns çıxı­şında dünyanın maliyyə və biznes mərkəzi olan “The City”nin COP29-un uğurla keç­məsinə hər cür dəstək verməyə hazır oldu­ğunu qeyd edib.

XQ