Xəbər verildiyi kimi, Naxçıvan Muxtar Respublikasının Ali Məclisinə seçkilərə start verilib. 

Bu barədə Naxçıvan Muxtar Res­publikası Ali Məclisi sədrinin 28 iyun 2024-cü il tarixli sərəncamı ilə “Altıncı çağırış Azərbaycan Respublikası Milli Məclisinin buraxılması və Azərbaycan Respublikasının Milli Məclisinə növ­bədənkənar seçkilərin təyin edilməsi haqqında” Azərbaycan Respublikası Prezidentinin 2024-cü il 28 iyun tarixli 176 nömrəli Sərəncamı rəhbər tutula­raq və Naxçıvan Muxtar Respublikası Konstitusiyasının 5-ci maddəsinin II his­səsinin 1-ci bəndinə əsasən, Naxçıvan Muxtar Respublikasının Ali Məclisinə seçkilər 2024-cü il sentyabrın 1-nə təyin edilib. 

Dünən Əjdər Əliyevin sədrliyi ilə Mərkəzi Seçki Komissiyasının iclası keçirilib.

Ali Məclisə seçkilərlə əlaqədar qa­nunvericilikdə nəzərdə tutulan tədbirlə­rin sistemli, ardıcıl və keyfiyyətlə gerçək­ləşdirilməsi, habelə seçki iştirakçılarına metodiki kömək göstərilməsi və onların fəaliyyətlərinin daha da sadələşdirilmə­si məqsədilə seçkilərin hazırlanıb keçi­rilməsi üzrə əsas hərəkət və tədbirlərin Təqvim Planı komissiya üzvləri tərəfin­dən müzakirə olunaraq təsdiq edilib.

Daha sonra Naxçıvan Muxtar Res­publikasının inzibati ərazi vahidinin hüdudları daxilində 45 seçki dairəsinin yaradılması, onların sxemi, qrafik təsviri və hüdudlarının müəyyən olunması üzrə komissiyanın təklifləri müzakirə edilib. MSK sədrinin müavini, seçki dairələrinin sərhədlərinin müəyyən edilməsi üzrə komissiyanın sədri Xatirə İbrahimli mux­tar respublika üzrə yaradılması nəzərdə tutulan 45 seçki dairəsinin hüdudlarına dair hazırladıqları təkliflər, hər bir seçki dairəsinin mərkəzi və seçicilərinin sayı barədə komissiya üzvlərini məlumatlan­dırıb. 

İclasda qarşıdan gələn seçkilərdə vətəndaşların seçki hüququnu pozan hərəkətlərdən (hərəkətsizlikdən) və qərarlardan şikayətlərin araşdırılması, eləcə də vətəndaşların seçki hüquq­larının daha səmərəli təmin olunması məqsədilə MSK nəzdində ekspert qru­punun yaradılmasına dair məsələyə də baxılıb və 5 nəfərdən ibarət tərkibdə ekspert qrupunun yaradılmasına qərar verilib. Seçki qanunvericiliyinin tələblə­rinə uyğun olaraq dairə seçki komissi­yaları nəzdində 3 nəfərdən ibarət eks­pert qruplarının yaradılması isə seçki dairələrinin dairə seçki komissiyalarına həvalə olunub.

XQ