Türkiyə

Ankarada 28 May Müstəqillik Günü münasibətilə “Can Azərbaycan” mövzusunda tədbir keçirilib.

Türkiyə–Azərbaycan Dostluq, Əməkdaşlıq və Həm­rəylik Fondunun (TADİV) təşkilatçılığı ilə keçirilən təd­birdə Azərbaycanın Türkiyədəki səfiri Rəşad Məmmədov, Türkiyə–Azərbaycan Parlamentlərarası Dostluq Qrupunun sədri Şamil Ayrım, Türkiyə Prezidenti yanında Təhlükə­sizlik və Xarici Siyasət Şurasının üzvü, professor Aygün Attar, ictimaiyyət nümayəndələri və KİV iştirak ediblər.

Azərbaycanın Türkiyədəki Səfirliyinin nəzdində­ki Şuşa Konqres Mərkəzində keçirilən mərasimdə çıxış edən TADİV sədri Aygün Attar Azərbaycanın müstəqillik tarixi haqqında danışaraq bildirib ki, Xalq Cümhuriyyəti cinsindən, irqindən, etnik mənsubiyyətindən və dinindən asılı olmayaraq bütün Azərbaycan vətəndaşlarının bəra­bərliyini elan edib. Bu tarixi nailiyyətləri dünyanın bir çox ölkəsindən əvvəl əldə edən Azərbaycan, eyni zamanda qa­dınlara səsvermə hüququ verən ilk ölkələrdəndir.

***

İstanbulda da 28 May Azərbaycanın Müstəqillik Günü münasibətilə təntənəli bayram tədbiri keçirilib.

Azərbaycanın İstanbuldakı Baş Konsulluğunun təş­kil etdiyi mərasimdə İstanbul Valiliyi və qardaş ölkənin digər dövlət qurumlarının rəsmiləri, Türkiyədə fəaliyyət göstərən azərbaycanlı incəsənət və ictimaiyyət xadimləri, diplomatlar, Azərbaycanın dövlət təşkilatlarının nümayən­dələri, Türkiyədə təhsil alan hərbçilər, QHT-lər və digərlə­ri iştirak ediblər.

Baş konsul Nərminə Mustafayeva Azərbaycanın müstəqillik tarixindən danışaraq bildirib ki, bu gün yalnız Azərbaycan deyil, bütün bölgə üçün şanlı tarixdir. Qısa bir dövrü əhatə etməsinə baxmayaraq, 1918-ci il mayın 28-də Azərbaycan Xalq Cümhuriyyətinin öz müstəqilliyini elan etməsi ilə türk və İslam dünyasında ilk demokratik res­publikanın qurulması, eyni zamanda, Azərbaycan xalqının tarixində dönüş nöqtəsi oldu.

Qırğızıstan

Azərbaycanın Qırğızıstandakı səfirliyi Bişkekdə­ki “Novotel” mehmanxanasında 28 May Müstəqillik Gününə həsr olunmuş rəsmi qəbul keçirib.

Mərasimdə Qırğızıstanın xarici işlər naziri Jeenbek Kulubayev, hökumətin üzvləri, ictimai-siyasi dairələrin təmsilçiləri, səfirlər, digər diplomatlar, Azərbaycan və Türk diasporunun, yerli ictimaiyyətin və KİV nümayən­dələri iştirak ediblər.

Jeenbek Kulubayev Azərbaycan xalqını milli bayram münasibətilə təbrik edərək ən xoş arzularını bildirib. 

Azərbaycanın Qırğızıstandakı səfiri Lətif Qəndilov bildirib ki, müsəlman şərqində ilk demokratik respublika­nın 106 il əvvəl Azərbaycanda qurulduğunu, Xalq Cümhu­riyyətinin cəmi 23 ay yaşamasına baxmayaraq, dövlətçilik tariximizdə özünəməxsus yer tutub. Bu müddət ərzində ilk dəfə olaraq demokratik əsaslarda parlament, ordu, bank, milli universitet yaradılıb, qabaqcıl Avropa ölkələrindən öncə qadınlara seçki hüququ verilib. 1919-cu ildə Paris konfransında isə Millətlər Liqası tərəfindən Azərbaycan Xalq Cumhuriyyətinin tanınmasına nail olunub. XX əsrin sonunda müstəqilliyini bərpa edən Azərbaycan Respubli­kası ötən müddət ərzində böyük inkişaf yolu keçib, müasir güclü və nüfuzlu dövlətlərdən birinə çevrilib.

Həmin gün Bişkek şəhərindəki Heydər Əliyev adına 20 saylı məktəb-gimnaziyanın altı otağında yüksək tex­nologiyalı avadanlıqlarla təchiz edilmiş STEAM mərkəzi istifadəyə verilib.

Türkmənistan

Azərbaycanın Türkmənistandakı səfirliyində 28 May Müstəqillik Günü münasibətilə rəsmi qəbul keçirilib. 

Azərbaycanın Türkmənistandakı səfiri Qismət Gözə­lov çıxış edərək, 106 il əvvəl müsəlman Şərqində qurul­muş ilk dünyəvi, demokratik dövlət olan Azərbaycan Xalq Cümhuriyyətinin (AXC) tarixi əhəmiyyətindən söhbət açıb. Həmçinin AXC-nin varisi olan Azərbaycan Respub­likasının müstəqilliyini bərpa etdikdən sonra qazanılmış uğurlardan, dövlət quruculuğu sahəsində ümummilli lider Heydər Əliyevin misilsiz xidmətlərindən danışıb. Qeyd olunub ki, Azərbaycan Prezidenti İlham Əliyevin rəhbərli­yi ilə ölkəmiz sürətli inkişaf yoluna qədəm qoyub.

Səfir çıxışında Azərbaycanın böyük enerji və nəqliy­yat layihələri, o cümlədən Cənub Qaz Dəhlizi və Bakı–Tbilisi–Ceyhan enerji layihələri, həmçinin Şərq–Qərb və Şimal–Cənub nəqliyyat marşrutları, Bakı–Tbilisi–Qars dəmiryolu, habelə Mərkəzi Asiyanı Avropa ilə birləşdirə­cək elektrik enerjisi kimi böyük beynəlxalq layihələrin təşəbbüskarı və fəal iştirakçısı olduğunu bildirib.

Gürcüstan

28 May Azərbaycanın Müstəqillik Günü Tbilisidə də təntənəli şəkildə qeyd olunub. Mərasimin keçirildiyi salonda Azərbaycanın inkişafını əks etdirən fotolardan ibarət sərgi açılıb.

Məclisdə Azərbaycanın Gürcüstandakı səfiri Faiq Quliyev, Gürcüstan parlamentinin sədri Şalva Papuaşvili, eləcə də bu ölkədəki diplomatik korpusun nümayəndələri, azərbaycanlı və türk iş adamları iştirak ediblər.

Səfir Faiq Quliyev çıxış edərək xalqımızın dövlətçi­lik tarixindən söz açıb, 1918-ci ildə yaradılan Azərbaycan Xalq Cümhuriyyətinin 23 ay yaşamasına baxmayaraq, qa­zandığı uğurlar barədə ətraflı məlumat verib. O bildirib ki, 1990-cı ilin əvvəllərində xalqımız öz müstəqilliyinə yeni­dən qovuşub. Lakin həmin dövrdə Azərbaycan çox ciddi problemlərlə üzləşib. Görkəmli dövlət və siyasi xadim Heydər Əliyevin hakimiyyətə qayıdışından sonra Azər­baycan yenidən möhkəmləndi və dünya ölkələri sırasında öz layiqli yerini tutdu. 

Prezident İlham Əliyevin Ulu öndərin siyasi kur­sunu uğurla davam etdirməsi nəticəsində Azərbaycan öz torpaqlarını işğaldan azad etdi və hazırda həmin ərazilərdə sürətli quruculuq-abadlıq işləri həyata keçirilir.

Diplomat Azərbaycanın bir çox beynəlxalq tədbirlərə ev sahibliyini qeyd edib, yaxın vaxtlarda Bakının daha bir mötəbər tədbirə – COP29-a ev sahibliyi edəcəyini diqqətə çatdırıb.

Rusiya

Moskvada 28 May Azərbaycanın Müstəqillik Günü şərəfinə qala-ziyafət keçirilib. Şənlikdə siyasi və ictimai xadimlər, Moskvada akkreditə olunmuş diplomatik nümayəndəliklərin rəhbərləri, Azərbaycan diasporu­nun tanınmış nümayəndələri iştirak ediblər.

Mərasimi giriş sözü ilə açan Azərbaycanın Rusiyadakı səfiri Polad Bülbüloğlu Şərqdə ilk demokratik respublika­nın tarixindən danışıb, müasir dövrdə ölkəmizin müstəqil­liyinin qorunub saxlanmasının və möhkəmləndirilməsinin Azərbaycan xalqının ümummilli lideri, görkəmli dövlət və siyasi xadim Heydər Əliyevin adı ilə bağlı olduğunu de­yib. Səfir Azərbaycan–Rusiya münasibətlərinin mütərəqqi inkişafını qeyd edib.

Rusiya Federasiyası xarici işlər nazirinin müavini Mixail Qaluzin çıxışında Rusiya–Azərbaycan münasibət­lərinin mütərəqqi inkişafını qeyd edib. Rusiya XİN rəh­bərinin müavini vurğulayıb ki, Moskvanın səyləri Cənubi Qafqazı sabitlik və firavanlıq regionuna çevirmək məqsədi daşıyır. 

Ukrayna

Ukraynada Azərbaycanın Müstəqillik Günü müna­sibətilə qəbul təşkil olunub.

Azərbaycanın Ukraynadakı səfiri Seymur Mərdəliyev bildirib ki, 106 il əvvəl, 1918-ci ilin mayın 28-də “İstiq­lal” Bəyannaməsinin qəbulundan sonra bütün müsəlman Şərqində ilk parlamentli respublika olan Azərbaycan Xalq Cümhuriyyəti (AXC) yaradılıb. “Ciddi daxili və xarici çağırışlara baxmayaraq, AXC effektiv dövlət institutla­rı yaratmağa, vətəndaşlarının hüquqlarını qorumağa və beynəlxalq ictimaiyyətin etimadını qazanmağa nail olub. Azərbaycan Xalq Cümhuriyyətinin mövcudluğu 1920-ci ilin aprelində bolşevik istilası ilə sona çatsa da, 1991-ci ildə Azərbaycan Respublikası müstəqilliyini bərpa etdi. Azərbaycanın üçrəngli bayrağı, dövlət himni və gerbi Xalq Cümhuriyyətinin irsini əks etdirir. Bu gün ölkəmiz Prezident İlham Əliyevin rəhbərliyi ilə Azərbaycan Xalq Cümhuriyyətinin istək və ideallarını reallığa çevirir. Azər­baycan uzun tarixinin ən möhtəşəm və uğurlu dövrünü yaşayır və heç vaxt indiki qədər güclü olmayıb”, – deyə səfir qeyd edib.

Misir

Azərbaycan Respublikasının Misir Ərəb Respub­likasındakı səfirliyi 28 May Müstəqillik Günü müna­sibətilə Qahirənin “Sofitel Gazerah” otelində rəsmi qəbul təşkil edib. 

Mərasimdə Ərəb Dövlətləri Liqasının sabiq Baş kati­bi A.Musa, Misirin sabiq Baş naziri E.Şaraf, bu ölkənin ic­timai-siyasi xadimləri, dini konfederasiyaların nümayən­dələri, Misir parlamentinin yuxarı və aşağı palatalarının üzvləri, nazirliklərin təmsilçiləri, iş adamları, jurnalistlər, müxtəlif universitetlərin rəhbər və müəllim heyəti, Azər­baycan diasporunun üzvləri iştirak ediblər.

Azərbaycanın Misirdəki səfiri Elxan Poluxov Azər­baycan Xalq Cümhuriyyətinin yaranması tarixi haqqın­da məlumat verib. O, 1918-ci il mayın 28-də müsəlman Şərqində elan edilmiş ilk demokratik respublikanın milli dövlətçilik tarixində silinməz izlər qoyduğunu, xalqımı­zın gələcəyi üçün etibarlı zəmin hazırladığını vurğulayıb. Səfir 2024-cü ilin müstəqilliyimizin 106-ci ildönümünü ilə yanaşı, Azərbaycanın Misirdə diplomatik nümayən­dəliyinin açılmasının 30 illiyinə təsadüf etdiyini diqqətə çatdırıb, bununla əlaqədar səfirliyimiz tərəfindən bir sıra tədbirlərin keçirilməsinin nəzərdə tutulduğunu bildirib.

Səfir vurğulayıb ki, Prezident İlham Əliyevin rəhbər­liyi ilə xalqımız bu il ilk dəfə olaraq əlamətdar tarixi-milli bayramı Azərbaycan Respublikasının bütün əraziləri üzə­rində tam bərpa olunmuş suverenlik şəraitində qeyd edir.

Avstriya

Azərbaycanın Avstriyadakı səfirliyində 28 May Respublika Günü ünasibətilə rəsmi qəbul keçirilib. Mərasimdə Avstriyanın dövlət və hökumət rəsmiləri, parlament üzvləri, Vyanada akkreditə olunmuş diplo­matik korpusun, BMT bölməsinin və digər beynəlxalq təşkilatların təmsilçiləri, Azərbaycanın Avstriyada­kı fəxri konsulları, Avstriya işgüzar dairələrinin nü­mayəndələri, bu ölkədə yaşayan soydaşlarımız iştirak ediblər.

Azərbaycanın Avstriyadakı səfiri Rövşən Sadıqbəyli Azərbaycanın keçdiyi müstəqillik və inkişaf yoluna nəzər salıb, ölkəmizin müstəqilliyi və ərazi bütövlüyü uğrunda mübarizə aparan soydaşlarımızın rəşadət və fədakarlığının ehtiramla yad olunduğunu bildirib. Qeyd edilib ki, 106 il əvvəl İstiqlal Bəyannaməsi ilə müstəqilliyi elan olunan və müsəlman Şərqində ilk demokratik respublika olan Azərbaycan Xalq Cümhuriyyəti qısa ömür sürsə də, təkcə Azərbaycanın deyil, bütün regionun tarixində mühüm iz qoyub.

Avstriya Xarici İşlər Nazirliyində idarə rəisi Qerhard Sayller çıxışında Azərbaycan və Avstriya arasında ikitərəf­li əlaqələrin inkişaf etdiyini, yüksək səviyyəli səfərlərin mütəmadi şəkildə həyata keçirildiyini diqqətə çatdırıb. 

Vaşinqton 

Vaşinqton şəhərinin meri Myuriel Bauzer Azər­baycan Xalq Cümhuriyyətinin yaranmasının 106-cı ildönümü ilə bağlı 28 May tarixini Vaşinqton şəhərində Azərbaycanın Müstəqillik Günü elan edib və bununla bağlı Bəyannamə imzalayıb. 

Bəyannamədə 1918-ci ildə müsəlman dünyasında ilk parlamentli demokratik respublika olan və Şərqdə qadın­lara ilk dəfə səsvermə hüququ verməklə yanaşı bir sıra vacib islahatlara imza atan dövlətlərdən birinin – Azərbay­can Demokratik Respublikasının yaranması münasibətilə dünyada 50 milyondan çox azərbaycanlının Müstəqillik Gününü qeyd etdiyi bildirilib.

İngiltərə

Birləşmiş Krallığın ən nüfuzlu ali təhsil ocaqla­rından biri olan London İqtisadiyyat və Siyasi Elmlər Məktəbində (LSE) Azərbaycanın Müstəqillik Günün­də “Azərbaycan COP29: Yaşıl Gələcək üzrə Strategi­yalar” mövzusunda tədbir keçirilib.

Azərbaycanın Birləşmiş Krallıqdakı səfiri Elin Süley­manov 28 May Müstəqillik Günü münasibətilə tədbirdə iştirak edən Azərbaycan icmasının üzvlərini təbrik edib. Müstəqillik gününü Azərbaycanın gənc nəslinin parlaq nümayəndələri ilə birlikdə keçirməkdən böyük məmnun­luq duyduğunu qeyd edib. Səfir vurğulayıb ki, gənclərin təhsilinə və inkişafına investisiya yatırmaq, bununla neft kapitalını insan kapitalına çevirmək Azərbaycan Respub­likasının Prezidenti İlham Əliyevin həyata keçirdiyi si­yasətin prioritetlərindəndir. Səfir, həmçinin qeyd edib ki, ölkəmizin müstəqilliyini gücləndirmək, dayanıqlı inkişa­fını təmin etmək və Vətənimizin gözəl təbiətini qorumaq gənclərimizin mühüm vəzifələrindəndir.

Fransa

Azərbaycan Xalq Cümhuriyyətinin 106-cı ildönü­mü münasibətilə Fransadakı diplomatlarımız Paris Sülh Konfransına qatılmış, ancaq sonradan Vətənə qayıda bilməyən Cümhuriyyət qurucularının xatirə­sini yad edərək, onların Paris ətrafındakı qəbirlərini ziyarət ediblər.

Paris yaxınlığında Sən-Klu (Saint Cloud) qəbiristan­lığında uyuyan Xalq Cümhuriyyəti parlamentinin, eləcə də Paris Sülh Konfransında nümayəndə heyətinin sədri Əlimərdan bəy Topçubaşovun və milli hökumətin rəsmi mətbu orqanı “Azərbaycan” qəzetinin naşiri, Azərbayca­nın məşhur bəstəkarı Üzeyir Hacıbəylinin qardaşı və nü­mayəndə heyətinin üzvü Ceyhun Hacıbəylinin xatirəsi yad edilib, məzarları üzərinə əklil qoyulub.

Azərbaycanın Fransadakı səfiri Leyla Abdullayeva 106 il əvvəl mayın 28-də müsəlman dünyasında ilk par­lamentli demokratik respublikanın – Azərbaycan Xalq Cümhuriyyətinin sayəsində ölkəmizin müstəqilliyi məhz ilk dəfə burada – Paris Sülh Konfransında tanındığını xa­tırladıb. O qeyd edib ki, Azərbaycan müstəqilliyinin bər­pasından sonra Xalq Cümhuriyyəti tarixinin həqiqətlərinin üzə çıxarılmasında, onun Azərbaycan tarixində yerinin və əhəmiyyətinin göstərilməsində ulu öndər Heydər Əliyevin böyük xidmətləri olub. 

***

28 May Müstəqillik Günü Azərbaycan Respubli­kasının Avropa Şurası yanında daimi nümayəndəliyi­nin təşkilatçılığı ilə Strasburqda təntənəli şəkildə qeyd olunub.

Azərbaycan Respublikasının Avropa Şurası yanında daimi nümayəndəsi, səfir Fəxrəddin İsmayılov tədbiri aça­raq, Azərbaycan xalqının müstəqillik tarixindən, bu amal uğrunda mübarizəsindən danışıb.

Bildirilib ki, Azərbaycan Prezident İlham Əliyevin rəhbərliyi altında ərazi bütövlüyünü və suverenliyini tam bərpa edib. Daimi nümayəndə ölkəmizin beynəlxalq aləm­də nüfuzunun artdığını, Azərbaycanın COP29-a ev sahib­liyi edəcəyini vurğulayıb.

Avropa Şurasının Baş katibi Mariya Peyçinoviç Bu­riç 28 May – Müstəqillik Günü münasibətilə Azərbaycan xalqının sevincini bölüşdüyünü deyərək, xalqımızı bu mü­nasibətlə təbrik edib. O, Azərbaycanın 2001-ci ildə Avropa Şurasına üzv olduğunu və ötən illər ərzində AŞ-nin siyasət və qərarlarının formalaşmasında bərabər tərəfdaş kimi iş­tirak etdiyini vurğulayıb.

Polşa

Azərbaycanın Müstəqillik Günü Polşanın paytax­tı Varşavada da böyük təntənə ilə qeyd olunub. Polşa Azərbaycanlıları Şurasının təşkilatçılığı ilə gözəl bir məkanda, sözün əsl mənasında, kiçik bir Azərbaycan yaradılmışdır. Tədbirdə Polşada yaşayan soydaşları­mızla yanaşı, azərbaycanlı gənc tələbələr də həvəslə iştirak ediblər. 

Təşkilatın rəhbəri, hər kəsin hörmət və etimadını qa­zanmış Fərid Cəfərli öz çıxışında cəmi 23 ay mövcud ol­muş Azərbaycan Xalq Cümhuriyyətinin müsəlman şərqin­də demokratiya ənənələrinin formalaşmasında əhəmiyyətli təsir göstərməsindən danışıb. Varşava üzrə tələbələrin ko­ordinatoru Tuncay Novruzzadə isə çıxışında vurğulayıb ki, indi o və onun kimi dünyanın hər yerində təhsil alan tələbə və gənclər artıq utanmır, sıxılmır, alnıaçıq, başıuca gəzirlər: "Biz özümüzü qalib xalqın övladları kimi təqdim etməyi bacarır, məhz müstəqil respublikamıza layiq yaşa­maq üçün əlimizdən gələni edirik".

Kanada

Saskatçevan vilayətinin paytaxtı Regina şəhərində “Regina City Hall” mərkəzinin önündə 28 May Müstəqil­lik Günü münasibətilə Azərbaycan Bayrağının təntənəli şəkildə qaldırılması mərasimi keçirilib.

Regina Azərbaycan Mədəniyyəti Assosiasiyasının təşkilatçılığı ilə baş tutan mərasimdə şəhərin meri Sandra Masters, Qanunvericilik Məclisinin üzvləri Nikol Sarauer və Muhammad Fiaz, Jared Klark və yerli Azərbaycan ic­masının üzvləri iştirak ediblər. Tədbirdə çıxış edənlər Ka­nada azərbaycanlılarını 28 May Müstəqillik Günü münasi­bətilə təbrik edib, Azərbaycan icmasının daim həmrəylik, sosial tərəqqi, insan haqları və demokratiyanın yanında olduğu bildirilib. Əyalətin mədəni müxtəlifliyinə töhfələr verdiklərinə görə soydaşlarımıza minnətdarlıq ifadə edilib.

İsveçrə

Azərbaycanın İsveçrənin Bern şəhərindəki səfirli­yində 28 May Müstəqillik Gününə həsr olunmuş rəsmi qəbul keçirilib.

Mərasimdə İsveçrədə fəaliyyət göstərən diplomatik korpusun, dövlət qurumlarının, siyasi, mədəni, işgüzar da­irələrin, Azərbaycan diasporasının və yerli ictimaiyyətin nümayəndələri iştirak ediblər.

Azərbaycanın İsveçrə Konfederasiyası və Lixtenşteyn Knyazlığındakı səfiri Fuad İsgəndərov 106 il əvvəl ma­yın 28-də Şərqdə, müsəlman dünyasında ilk parlamentli demokratik dövlət – Azərbaycan Xalq Cümhuriyyətinin qurulduğunu bildirib.

Səfir Xalq Cümhuriyyətinin keçdiyi yoldan söz açıb, müsəlman dünyasında ilk demokratik ölkə olan Azər­baycan Demokratik Respublikasının tarixi əhəmiyyətin­dən, 23 aylıq dövrü ərzində qazandığı uğurlardan, onun müstəqillik yolundakı mübarizəsindən danışıb.

Səfir qeyd edib ki, Ulu öndərin ölkədə apardığı köklü islahatlar və dəqiq müəyyən edilmiş strategiya Azərbayca­nı dinamik inkişafa malik müasir dövlətə çevirdi.

Prezident İlham Əliyevin siyasəti nəticəsində ölkəmiz beynəlxalq arenada layiqli yerini tutub.

28 May Müstəqillik Günü münasibətilə Azər­baycanın Qətərdəki, Serbiyadakı, Litvadakı, Peru­dakı, Küveytdəki və digər ölkələrdəki səfirliklərin­də də rəsmi qəbullar və şənliklər keçirilib.

Səhifəni “Xalq qəzeti” müxbirlərinin və AZƏRTAC-ın materialları əsasında hazırladı:

Tahir AYDINOĞLU