Mayın 21-də Xarici İşlər naziri Ceyhun Bayramov İtaliyanın ölkəmizdə yeni təyin olunmuş səfiri Luka Di Canfrançesko ilə görüşüb.

Görüşdə iki ölkə arasında çoxölçülü strateji tərəfdaşlıq münasibətlərindən irəli gələn məsələlər, habelə cari regi­onal vəziyyət müzakirə olunub.

Ceyhun Bayramov postmünaqişə dövründə bölgədə mövcud vəziyyət və reallıqlar, işğaldan azad olunmuş əra­zilərdə aparılan genişmiqyaslı bərpa və quruculuq işləri, habelə Azərbaycan və Ermənistan arasında normallaşma prosesi barədə qarşı tərəfi ətraflı mə­lumatlandırıb. 

İtaliya şirkətlərinin yenidənqurma səylərinə töhfəsi məmnunluqla qeyd edilib. Ölkəmizdə mina təhdidi məsələ­si diqqətə çatdırılıb, minasızlaşdırma fəaliyyəti sahəsində əməkdaşlıq im­kanları dəyərləndirilib. 

Ölkəmizdə səfir təyin olunmasın­dan məmnun olduğunu bildirən Luka Di Canfrançesko fəaliyyəti müddətində mövcud çoxölçülü strateji tərəfdaşlıq münasibətlərinin inkişafı istiqamətində çalışacağını qeyd edib.

***

Həmin gün xarici işlər naziri Cey­hun Bayramov Ukraynanın ölkəmizə yeni təyin olunmuş səfiri Yuriy Husyev ilə də görüşüb.

Tərəflər iki ölkə arasında strateji tərəfdaşlıq əlaqələrinin iqtisadiyyat, ti­carət, enerji təhlükəsizliyi, nəqliyyat və kommunikasiyalar, humanitar və sair istiqamətlərdə inkişafından məmnun olduqlarını qeyd ediblər.

Səfir Yuriy Husyev Azərbaycanın Ukraynanın ərazi bütövlüyü və suve­renliyinə göstərdiyi daimi dəstəyə, o cümlədən, Ukraynaya humanitar yar­dımlara görə təşəkkür edib.