Mayın 10-da ümummilli lider Heydər Əliyevin anadan olmasının 101-ci ildönümündə Naxçıvan Muxtar Respublikasının yaranmasının 100 illiyi münasibətilə “Heydər Əliyev və Naxçıvan” mövzusunda konfrans keçirilib. 

Konfrans iştirakçıları əvvəlcə Ulu öndərin şəhərin baş meyda­nındakı abidəsini ziyarət edib, abidə önünə güllər düzüb, xatirə­sinə ehtiamlarını bildiriblər. 

Cəlil Məmmədquluzadə adına Dövlət Milli Dram Teatrında keçi­rilən məclisdə Naxçıvan Muxtar Respublikasında Azərbaycan Respublikası Prezidentinin səla­hiyyətli nümayəndəsi Fuad Nə­cəfli ümummilli liderin dövlətçilik fəaliyyətindən danışarkən böyük ömrün 1990–1993-cü illəri əhatə edən Naxçıvan dövründən xüsu­silə bəhs edib. Vurğulayıb ki, hə­min illərdə Naxçıvanda yaşayıb fəaliyyət göstərən dahi şəxsiyyət bütövlükdə müstəqil dövlətçiliyi­mizin əsaslarını işləyib hazırlayıb. 

Fuad Nəcəfli qeyd edib ki, Ümummilli liderin hakimiyyətə qa­yıtdığı 1993-cü ilin 15 iyun günü Azərbaycan xalqının tarixinə Mil­li Qurtuluş Günü kimi yazılıb. Bu dövrdən etibarə ulu öndər Heydər Əliyev müstəqil Azərbaycanın so­sial-iqtisadi inkişafının təmin edil­məsi məqsədilə yeni inkişaf stra­tegiyasının təməlini qoyub. Bu gün Azərbaycan dünyada sürətlə və dinamik inkişaf edən dövlət­lərdən biridir. Ölkənin iqtisadi qüdrətinin artması onun müstəqil siyasət yeritməsinə, əhalinin rifah halının ildən-ilə yüksəlməsinə imkan yaradır. İkinci Qarabağ müharibəsində qazanılmış ta­rixi Qələbə Xalq–Lider birliyinin təntənəsidir.

Naxçıvan Muxtar Respublika­sının Baş naziri Ceyhun Cəlilov ulu öndər Heydər Əliyevin xalqı­mız və dövlətçiliyimiz qarşısında misilsiz xidmətlərindən bəhs edib. 

Naxçıvan Dövlət Univer­sitetinin rektoru Elbrus İsayev yeni faktlar, yeni reallıqlar təşkil edən “Heydər Əliyev və Naxçı­van” mövzusunu ümummilli lider Heydər Əliyevin xalqımız qar­şısındakı misilsiz xidmətlərinin çoxtərəfli öyrənilməsi baxımından yüksək qiymətləndirib. 

Konfransın davamında Nax­çıvan televiziyasının hazırladığı “Heydər Əliyev və Naxçıvan” filmi təqdim olunub.

XQ