VI Ümumdünya Mədəniyyətlərarası Dialoq Forumu çərçivəsində dünən müxtəlif ölkələrin dini liderlərinin Şuşa görüşü keçirilib. Tolantının sonunda dini liderlərin Şuşa Bəyannaməsi qəbul olunub.

Sənəddə deyilir ki, Azərbaycan Respub­likasının Prezidenti İlham Əliyevin himayə­darlığı ilə təşkil olunan VI Ümumdünya Mədəniyyətlərarası Dialoq Forumu çərçivə­sində “Dinlərarası dialoq vasitəsilə etimadın möhkəmləndirilməsi” mövzusunda plenar sessiyanın – Bakı və Şuşa görüşlərinin iştirak­çıları olan dünya və ənənəvi dinlərin liderlə­ri, ictimaiyyət, elm xadimləri, beynəlxalq və dini təşkilatların nümayəndələri Azərbaycanın beynəlxalq müstəvidə sivilizasiyalararası və dinlərarası əməkdaşlığın inkişafında, mil­li-mədəni və mənəvi dəyərlərin qorunmasında, tolerantlıq və multikulturalizm ənənələrinin təbliğində önəmli rolunu qeyd edir, Prezidenti İlham Əliyevin Forumun açılış mərasimində iştirakını və dərin məzmunlu çıxışını yüksək dəyərləndirirlər.

Bəyanatda beynəlxalq səviyyədə terro­rizmin geniş miqyasda yayılması, ksenofobi­yanın, dini və etnik zəmində dözümsüzlüyün və zorakılığın artması faktları ilə bağlı dərin narahatlıq ifadə edilir, davamlı tərəqqiyə, sa­bitlik və təhlükəsizliyə maneə olan aqressiv təbliğatlara, nifrət çağırışlarına və dinlərarası ixtilafların qızışdırılması hallarına qarşı bey­nəlxalq birliyin birgə səylərinin zəruriliyi ifa­də olunur.

Dini liderlər dünya xalqlarının dini və mə­dəni müxtəlifliyinin bəşər sivilizasiyasının ən böyük irsi kimi qorunmasının vacibliyini təs­diq edərək, silahlı münaqişələr, terror aktları, dini və etnik zəmində baş verən zorakılıqların insan tələfatı ilə yanaşı, mədəni və dini irsin talan və məhv edilməsi ilə müşayiət olunma­sını yolverilməz hesab edirlər. Bu baxımdan sənəddə Ermənistanın işğal dövründə Azər­baycanın mədəni və mənəvi irsinə aid olan abidələri dağıtmasından, yandırılmış və mi­nalanmış torpaq, ekosid və urbisid siyasəti­nin ağır nəticələrindən dərin narahatlıq ifadə olunur.

Bəyanatda dini liderlər Bakıda keçirilə­cək İqlim dəyişikliyi üzrə COP29 Sammitinə, habelə bu mühüm platforma çərçivəsində beynəlxalq “Dini pavilyonu”na və “Dini Li­derlərin Zirvə görüşü”nə ev sahibliyi edəcək Azərbaycan Respublikasına uğur diləyirlər. Sonda onlar İnsan hüquqları haqqında Ümu­mi Bəyannaməyə riayət olunmasına – insan hüquqlarının, qadın və uşaq haqlarının qorun­ması sahəsində dövlət, din, elm və ictimaiyyət xadimlərinin birgə fəaliyyətini dəstəkləməyə çağırırlar. 

XQ