Dünən Bakıda “Azərbaycan Arbitraj Günləri” adlı beynəlxalq toplantı işə başlayıb. Azərbaycan Respublikası Prezidentinin Administrasiyasının Qanunvericilik və hüquq siyasəti şöbəsinin müdiri Gündüz Kərimov, bir sıra dövlət və hökumət nümayəndələri, müxtəlif ölkələrdən gələn qonaqlar iştirak ediblər.
Azərbaycan Arbitraj Assosiasiyasının sədri Kəmalə Mehdiyeva bildirib ki, ölkəmiz arbitraj bütün tərəflərin iştirakı ilə inkişaf edəcək. Azərbaycan beynəlxalq və yerli arbitraja şərait yaradan məkana çevriləcək. Bütün bunlar ölkənin iqtisadiyyatına müsbət təsir göstərəcək.
Ali Məhkəmənin və Məhkəmə-Hüquq Şurasının sədri İnam Kərimov isə qeyd edib ki, sahibkarlıq iqtisadi inkişafın təməl daşı kimi dayanıqlı iqtisadi sistemin qurulmasına və iqtisadi tərəqqiyə təkan verməklə yanaşı, həm də sosial rifahın yüksəldilməsində mühüm rol oynayır. Kommersiya məhkəmələrinin yaradılması isə sahibkarların hüquqlarının müdafiəsinin gücləndirilməsi və nəticədə ölkəmizdə biznes və investisiya iqliminin daha da yaxşılaşdırılması istiqamətində önəmli mərhələ olub. Ötən il Azərbaycanda “Arbitraj haqqında” Qanunun qəbul edilməsi ilə arbitraj institutunun inkişafı istiqamətində irəliyə doğru addım atılıb. Yeni Qanun Beynəlxalq Kommersiya Arbitrajı haqqında BMT-nin Model Qanunu əsasında hazırlanıb.
Azərbaycan Sahibkarlar Konfederasiyasının prezidenti Məmməd Musayev Prezident İlham Əliyevin rəhbərliyi ilə sosial-iqtisadi və məhkəmə-hüquq sahələrində də ardıcıl islahatların uğurla həyata keçirildiyini diqqətə çatdırıb. O bildirib ki, bunların məntiqi nəticəsi olaraq Azərbaycanda dayanıqlı və sabit iqtisadi sistem formalaşmaqdadır.
Beynəlxalq Ticarət Palatasının Arbitraj Məhkəməsinin keçmiş sədri Aleksis Mourre hazırda iqlim dəyişmələrinin dünyanı narahat edən əsas məsələlərdən biri olduğunu və bununla bağlı mübahisələrin sayının artdığını diqqətə çatdırıb.
Toplantı panel müzakirələrlə davam edib. “Azərbaycan Arbitraj Günləri”nin diskussiyaları bu gün yekunlaşacaq.
XQ
