AMEA-nın prezidenti akademik İsa Həbibbəyli Tatarıstan Elmlər Akademiyasının (Rusiya Federasiyası) Arxeologiya İnstitutunun direktoru akademik Ayrat Sıtdıkovla görüşüb.

Qonağa AMEA-nın elmi istiqamətlə­ri, xüsusilə arxeologiya və antropologiya sahəsində aparılan tədqiqatlar, Azərbay­can arxeologiyasının tarixi, əldə etdiyi nəticələr, yeni yaradılan ekspedisiyalar və onların fəaliyyəti barədə məlumat verən akademik İsa Həbibbəyli ölkəmiz­də bu elm sahəsinin daim diqqət mərkə­zində olduğunu bildirib. İşğaldan azad olunmuş ərazilərimizdə böyük miqyaslı arxeoloji qazıntı işlərinə start verildiyini diqqətə çatdıran AMEA rəhbəri artıq ilkin uğurlu elmi nəticələrin əldə edildiyini vur­ğulayıb. Akademiyanın prezidenti apa­rılacaq tədqiqatların mühüm əhəmiyyət kəsb etdiyini bildirərək, böyük təcrübəyə malik olan Tatarıstan arxeoloq və antro­poloq alimlərini Azərbaycan arxeoloqları ilə birlikdə Qarabağda birgə tədqiqatlar­da iştiraka dəvət edib.

Görüşdə Tatarıstan EA Arxeologiya İnstitutunun direktoru akademik Ayrat Sıtdıkov çıxış edərək, rəhbərlik etdiyi elmi-tədqiqat müəssisəsinin fəaliyyət is­tiqamətləri barədə ətraflı məlumat verib, birgə elmi tədqiqatların aparılmasında maraqlı olduqlarını diqqətə çatdırıb, qar­şılıqlı elmi bilik və təcrübə mübadiləsinin əhəmiyyətini vurğulayıb.

Görüşdə AMEA-nın vitse-prezidenti vəzifələrini icra edən akademik Gövhər Baxşəliyeva, AMEA Arxeologiya və Ant­ropologiya İnstitutunun direktoru tarix üzrə fəlsəfə doktoru, dosent Fərhad Qu­liyev, AMEA Rəyasət Heyəti aparatının Xarici əlaqələr və beynəlxalq təşkilatlarla iş şöbəsinin müdiri biologiya üzrə fəlsəfə doktoru, dosent Esmira Əlirzayeva və AMEA Rəyasət Heyəti aparatının İctima­iyyətlə əlaqələr, mətbuat və informasiya şöbəsinin müdiri filologiya üzrə fəlsəfə doktoru, dosent Ağahüseyn Şükürov da iştirak ediblər.

Qabil YUSİFOĞLU
XQ