Dünən Azərbaycan Respublikasının Vəkillər Kollegiyası Hüquq və İnsan Haqları İnstitutu ilə birgə “Soyqırımı cinayətinə görə beynəlxalq hüquqi məsuliyyət” mövzusunda dəyirmi masa keçirib.
Hüquq və İnsan Haqları İnstitutunun İdarə Heyətinin sədri Məhəmməd Quluzadə toplantını giriş sözü ilə açaraq bildirib ki, hüquqşünas alimlərimiz erməni millətçi-separatçılarının xalqımıza qarşı törətdikləri soyqırımları və müharibə cinayətləri barədə faktları dünya ictimaiyyətinə çatdıran, caniləri ittiham edən tədqiqatlar aparıb, çoxsaylı əsərlər yazıblar.
Vəkillər Kollegiyası Akademiyasının rektoru, professor Əmir Əliyev isə qeyd edib ki, xalqımıza qarşı ağır cinayətlərin təşkilində və törədilməsində iştirak etmiş təqsirkar şəxslərin müəyyənləşdirilərək mövcud qanunvericiliyə əsasən cinayət məsuliyyətinə cəlb olunması, habelə beynəlxalq hüquq normalarının və insan hüquq və azadlıqlarının kobud şəkildə pozulması faktları ilə bağlı beynəlxalq təşkilatlar qarşısında müvafiq vəsatətlər qaldırılıb.
Milli Məclisin deputatı Bəhruz Məhərrəmov, İstanbul Universiteti hüquq fakültəsinin professoru Fethi Gedikli, Ankara Universitetinin professoru Cavid Abdullazadə, ANAMA-nın nümayəndəsi Fərhad İsayev, BDU hüquq fakültəsinin dekanı Zaur Əliyev, cinayət hüququ və kriminologiya kafedrasının müdiri Şəhla Səmədova, dosent Əlövsət Allahverdiyev, BDU Azərbaycan tarixi kafedrasının dosenti Boran Əziz, Vəkillər Kollegiyasının Rəyasət Heyətinin üzvü İlhamə Həsənova, Hüquq və İnsan Haqları İnstitutunun əməkdaşı İlham Malikoğlu mövzu ilə bağlı çıxış ediblər.
Müzakirələr zamanı “Soyqırımı cinayətinin qarşısının alınması və onun cəzalandırılması haqqında” Konvensiyanın müddəaları təhlil olunub, həmçinin müasir şəraitdə soyqırımı törədən şəxslərin cinayət məsuliyyətinə cəlb edilməsi mexanizmlərinə toxunulub.
Qabil YUSİFOĞLU
XQ