Martın 6-da Milli Məclisin Sədri Sahibə Qafarova UNICEF-in Azərbaycandakı nümayəndəliyinin rəhbəri Saca Faruq Abdullahı qəbul edib. Qonağı Azərbaycanda fəaliyyətə başlaması münasibətilə təbrik edən spiker onun UNICEF-in Azərbaycandakı nümayəndəsi kimi fəaliyyəti, bu təşkilatla ölkəmiz arasında əməkdaşlığın möhkəmlənməsinə töhfə verəcəyinə əminliyini bildirib.
Qeyd olunub ki, Azərbaycan BMT-yəüzv olduqdan sonra təşkilatın müxtəlif qurumları ilə fəal əməkdaşlıq əlaqələri qurub. UNICEF ilə ölkəmiz arasında əməkdaşlıq da Azərbaycanın müstəqilliyinin ilk günlərindən başlayıb. Ötən il bu təşkilatın respublikamızdakı fəaliyyətinin 30 illiyi qeyd olunub. Hazırda bu qurumla Azərbaycanın müxtəlif dövlət təşkilatları, o cümlədən, Milli Məclis arasında yaxşı əməkdaşlıq əlaqələri mövcuddur.
S.Qafarova Milli Məclisin qadın, ailə və uşaq məsələləri üzrə qanunvericilik sahəsində fəaliyyəti haqqında da məlumat verib. Deyib ki, Milli Məclisdə uşaqlarla bağlı 35 qanun qəbul edilib, 100-dən çox qanuna əlavə və dəyişikliklər olunub. Sədr xatırladıb ki, bir neçə gün əvvəl Azərbaycan parlamenti “Məişət zorakılığı haqqında” Qanuna dəyişiklik edilməsi barədə qanun qəbul edib.
Görüşdə, həmçinin Azərbaycanın işğaldan azad olunan ərazilərində həyata keçirilən bərpa və quruculuq işləri, keçmiş məcburi köçkünlərin öz yurdlarına qayıtması barədə də məlumat verilib. Bununla yanaşı, Azərbaycan parlamentinin UNICEF ilə əməkdaşlıq məsələləri də nəzərdən keçirilib və bir sıra tədbirlərin birlikdə həyata keçirildiyi bildirilib.
UNICEF-in Azərbaycandakı nümayəndəliyinin rəhbəri Saca Faruq Abdullah ölkəmizi BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası –COP29-a evsahibliyi etməsi üçün seçilməsi münasibətilə təbrik edib. Qonaq bildirib ki, bu qərar Azərbaycanın sözügedən sahədə əldə etdiyi nailiyyətlərin yüksək səviyyədə tanınması deməkdir.
O, Azərbaycanda uşaq hüquqlarının qorunması istiqamətində mühüm nailiyyətlər əldə olunduğunu xatırladıb. Bunlar Davamlı İnkişaf Məqsədlərinə də uyğundur.
***
Dünən Milli Məclisin Sədri Sahibə Qafarova Latviya Respublikasının ölkəmizdəki fövqəladə və səlahiyyətli səfiri Edqars Skuyanı qəbul edib. Azərbaycan və Latviyanın dost və tərəfdaş ölkələr olduğunu vurğulayan spiker ikitərəfli münasibətlərimizin zəngin tarixə malik olduğunu, qarşılıqlı təmasların, ali və yüksək səviyyəli səfərlərin ölkələrimiz arasında əməkdaşlığın genişlənməsinə töhfə verdiyini bildirib.
Görüşdə bu il Azərbaycan və Latviya arasında diplomatik əlaqələrin qurulmasının 30 illiyinin qeyd olunduğu, ötən dövr ərzində ölkələrimiz arasında müxtəlif sahələr üzrə münasibətlərin uğurla inkişaf etdiyi diqqətə çatdırılıb. Söhbət zamanı parlamentlər arasında əlaqələrin daha da inkişafı ilə bağlı perspektivlərə dair də fikir mübadiləsi aparılıb. Sədr bəzi beynəlxalq təşkilatlarda Azərbaycana qarşı ikili standartların mövcud olduğunu diqqətə çatdırıb. O, bu çərçivədə Avropa Şurası Parlament Assambleyasının Azərbaycan nümayəndə heyətinin etimadnaməsini ratifikasiya etməməsini tənqid edərək deyib ki, AŞPA bu cür yanlış yanaşmadan imtina etməlidir.
Göstərilən yüksək qonaqpərvərliyə görə minnətdarlığını bildirən səfir Edqars Skuya ölkəmizdə gedən inkişaf proseslərinin onda dərin təəssürat yaratdığını söyləyib. Diplomat ölkəmizi BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası – COP29-a evsahibliyi etməsi üçün seçilməsi münasibətilə təbrik edib.
Ə.BƏDƏLOV
XQ