Hazırda seçici siyahılarında 6 milyon 478 min 623 seçicinin adı var. Onlar 6 min 537 seçki məntəqəsində səs verəcəklər.
Azərbaycanda ilk dəfə olaraq seçkilər işğaldan azad edilmiş ərazilərimizdə də keçirilir. Həmin ərazilərdə 26 seçki məntəqəsi yaradıb. 22 mindən çox seçici həmin ərazilərdə yaradılmış məntəqələrdə səs verəcək. Seçkilərdə şəffaflığın təmin edilməsi ilə bağlı 119 dairə üzrə 1 000 seçki məntəqəsində veb-kamera quraşdırılıb. Saat 07:30-dan gün ərzində bütün proseslər başa çatana qədər veb-kameralar işləyəcək.
Prezident seçkilərini izləmək üçün 90 min 372 müşahidəçi qeydiyyatdan keçib. Onlardan 5405-i MSK, qalanı isə dairə seçki komissiyalarında qeydiyyatdan keçib. Seçki prosesini akkreditasiyadan keçən 89 ölkədən 790 beynəlxalq müşahidəçi izləyəcək. Onlar 72 beynəlxalq təşkilatı təmsil edir.
Prezident seçkiləri ilə əlaqədar 37 ölkədə 49 məntəqə səsvermə üçün hazır vəziyyətdədir. Məntəqələr səfirliklərdə və konsulluqlarda yaradılıb. Bu məntəqələrdə artıq 23 minə yaxın seçici siyahıya alınıb. Müşahidəçilərdən siyasi partiyaların nümayəndələri də var. 14 siyasi partiya namizədi olmamasına baxmayaraq, müşahidəçi kimi özlərinin tərəfdarlarını prosesə cəlb ediblər.
Ümumi müşahidəçilərin 50 mindən çoxu məhz 19 siyasi partiyanın nümayəndələridir. Bundan əlavə, Azərbaycanda fəaliyyət göstərən təxminən 83 qeyri-hökumət təşkilatı da müşahidələr aparacaq.
Dünyanın aparıcı media qurumları “Associated Press”, “BBC”, “Al Jazeera”, “Kyodo” kimi agentliklər də daxil olmaqla, seçkilərdə ümumilikdə 109 beynəlxalq media qurumu iştirak edir. Onların 216 təmsilçisi beynəlxalq müşahidəçi kimi qeydə alınıb.
Əliqismət BƏDƏLOV
XQ