Mərakeşin nüfuzlu media orqanlarının nümayəndələri AZƏRTAC-da olublar. İdarə Heyətinin sədri Vüqar Əliyev iki ölkə mediası arasında genişlənən əlaqələrdən danışıb.
Qonaqlara AZƏRTAC haqqında ətraflı məlumat verilib. Bildirilib ki, 104 yaşını qeyd etməyə hazırlaşan agentlik Azərbaycanın ilk xəbər agentliyidir. Hazırda dünyanın 50 xəbər agentliyi ilə tərəfdaşlıq münasibətlərinə malik olan agentlik 8 dildə xəbər, 5 dildə video yayır. Onun 21 ölkədə 22 müxbir məntəqəsi fəaliyyət göstərir.
Qeyd olunub ki, AZƏRTAC Mərakeşin MAP agentliyi ilə əlaqələrə malikdir. Bununla belə, əməkdaşlığın daha da genişləndirilməsinə və fəal informasiya mübadiləsinin aparılmasına ehtiyac var.
Görüşdə MAP agentliyinin redaktoru Mohammed Asvab, “L’Opinion” qəzetinin redaktoru Anass Maklux, “Al Bayane” qəzetinin direktorluğunun rəhbəri Mahtat Rakas, “Le Desk” rəqəmsal mətbu orqanının jurnalisti Fatima Lqadiri, “TelQuel” həftəlik xəbər jurnalının jurnalisti Yassine Majdi, “L’economiste” qəzetinin jurnalisti Saad Alami Yunes, BBMT onlayn xəbər kanalının jurnalisti Buxaib Brhadda iştirak ediblər.
XQ
