ATƏT/DTİHB-nin müşahidəçiləri İsmayıllıda seçkiyə hazırlıq prosesini izləyiblər. Qurumun müşahidəçiləri 89 saylı İsmayıllı Seçki Dairəsinə iki dəfə baş çəkiblər. Beynəlxalq müşahidəçilər, əsasən, seçici siyahılarının dəqiqliyini yoxlayıb və seçkilərə hazırlıq prosesindən razı qalıblar. Bunu 89 saylı Dairə Seçki Komissiyasının sədri Əlirəmzi Məhərrəmov deyib.
DSK sədri dairə üzrə, ümumilikdə, 630 müşahidəçinin qeydiyyatdan keçdiyini bildirib. Onun sözlərinə görə, seçkilərə hazırlıq prosesi qanunvericiliyə uyğun formada davam etdirilir. Dairə üzrə qeydiyyatda olan 50 min 533 seçici 61 seçki məntəqəsində səsvermə hüququndan istifadə edəcək. Altı seçki məntəqəsində panduslar quraşdırılıb. Səsvermə gününə qədər pandusların quraşdırılması davam edəcək. Altı seçki məntəqəsində isə veb-kameralar quraşdırılıb. Namizədlərin təşviqat kampaniyasına geniş imkanlar yaradılıb. Bütün seçki məntəqələrində təşviqat lövhələri mövcuddur və hər bir namizədə Seçki Məcəlləsinin tələblərinə uyğun olaraq bərabər səviyyədə yer ayrılıb.
Əliqismət BƏDƏLOV
XQ