Gürcüstanın Baş naziri İrakli Qaribaşvili istefa verdiyini açıqlayıb. Siyasətçinin sözlərinə görə, o, 2012-ci ildə yaradılmış hakim “Gürcü arzusu” partiyasına rəhbərlik etmək təklifi alıb. Hazırda partiyanın lideri İrakli Kobaxidzedir. Ehtimal olunur ki, Kobaxidze Qaribaşvilini əvəz edəcək və hökumətə rəhbərlik ona tapşırılacaq.
İrakli Qaribaşvili yanvarın 29-da keçirdiyi brifinqdə vəzifəsini tərk etməsinin səbəbini açıqlamayıb. Lakin Gürcüstanın “İmedi” telekanalının analitikləri hesab edirlər ki, bu qərar qarşıdan gələn parlament seçkiləri ilə əlaqədardır. Bildirilib ki, oktyabrın 26-da parlament seçkiləri yeni formatda keçiriləcək. Seçkilər zamanı 5 faiz baryeri olan proporsional sistemdən istifadə olunacaq.
Bu arada Gürcüstan hökuməti Avropa İttifaqına daxil olmaq şanslarını artırmaq üçün 9 tövsiyənin həyata keçirilməsi üzrə fəaliyyət planını təsdiqləyib. Bu planın hazırlanmasını ölkənin Xarici İşlər Nazirliyi, eləcə də Gürcüstan parlamenti əlaqələndirib. “Rusiyanın Gürcüstana təsirini” məhdudlaşdıran qətnamə layihəsi isə rədd edilib.
P.ƏFƏNDİ
XQ