“Zəfər seçkiləri”

Mərkəzi Seçki Komissiyasının sədri Məzahir Pənahov deyib ki, prezident seçkilərini qey­ri-rəsmi olaraq “Zəfər seçkiləri” adlandırırıq. Çünki bu, azad olunmuş ərazilərdə və bütün Azərbaycanda keçirilən ilk seç­kidir. Azad olunan ərazilərdə yaradılan 26 seçki məntəqəsi­nin 20 mindən çox seçicisi var. 

M.Pənahov qeyd edib ki, səsvermədə öz doğma yurduna qayıdanlarla birlikdə, azad olunmuş ərazilərdə tikinti-quraşdır­ma işlərində çalışan insanlar da seçki hüququ olan şəxslərdir. Onlar da səs­vermədə iştirak edəcəklər. M.Pənahov media qurumlarının və subyektlərinin də işğaldan azad edilmiş ərazilərdə seçki prosesində fəal iştirak etmələrinin zəru­riliyini bildirib. Prezident seçkilərini Azər­baycanda son illərdə formalaşmış yüksək əhvali-ruhiyyəyə uyğun başa vurmalıyıq. Azərbaycanın ərazi bütövlüyü artıq təmin olunub. İlk dəfə olaraq, Azərbaycanın bü­tün bölgələrində, beynəlxalq miqyasda tanınan ərazilərində seçki keçiriləcək.

Ombudsman Aparatı monitorinqlər keçirəcək

Ombudsman Aparatının rəhbəri Aydın Səfixanlı növbədənkənar prezident seçkiləri ilə bağlı monitorinqlərin keçiriləcəyini bildirib. Monitorinqlər ilkin ola­raq seçicilərlə görüşlər üçün ayrılmış açıq və qapalı yerlərdə aparılacaq.

Seçki hüququnun pozulması ilə bağ­lı Ombudsmana indidən müraciətlər daxil olur. Bu müraciətlər operativ olaraq Mərkəzi Seçki Komissiyası ilə birlikdə araşdırılır.

6 min 319 seçki məntəqəsi yaradılıb

Seçki dairələrinin yenidən təş­kili və azad edilmiş ərazilərdə yeni seçki məntəqələrinin təş­kilindən sonra ölkə üzrə seçki məntəqələrinin sayı açıqlanıb.

Bu barədə Mərkəzi Seçki Komissi­yasının katibi Mikayıl Rəhimov məlu­mat verib. O deyib ki, 125 seçki dairəsi üzrə 6319 seçki məntəqəsi var. Bu seçki məntəqələrinin 26-sı işğaldan azad olun­muş ərazilərdə yerləşir.

Müşahidəçilərin sayı 50 minə çatacaq

“Seçki kimi mürəkkəb proses­də qanunvericiliyin tələbləri­nin pozulmamasına çalışırıq. Müxtəlif qurumlarla həyata keçirdiyimiz maarifləndirmə tədbirlərinin də məqsədi budur və bu format ilkdir”.

Bu fikri Mərkəzi Seçki Komissiyasının sədri Məzahir Pənahov səsləndirib. O deyib ki, Azərbaycanda keçirilən seçkiləri daxili aktorlarla yanaşı, xarici təşkilatlar da izləyirlər. Qeydə alınmış 7 namizədin 5-i siyasi partiya təmsilçiləridir. Hazırda müşahidəçilərin sayı 20 minə çatıb. He­sab edirəm ki, seçkiyə qədər bu rəqəm 50 minə yaxınlaşacaq. Artıq beynəlxalq qurumlar da Azərbaycanın seçki prosesi ilə bağlı böyük yol qət etdiyini bildirirlər.

Həssas qrupun seçkidə iştirakı təmin ediləcək

Ombudsman Səbinə Əliyeva deyib ki, həssas qrupdan olan vətəndaşla­rımızın seçki prosesində iştirakının təmin edilməsi istiqamətində işlər apa­rılır. 

Hamı bir vətəndaş olaraq seçkilərdə fəal iştirak etməli, ölkəmizin ictimai-siyasi həyatında mühüm rol oynayacaq bu pro­sesə yaxından qoşulmalıdır. Fiziki qüsur­lu, əlil, görmə və eşitmə qabiliyyəti məh­dud olan vətəndaşların seçki prosesində iştirakını təmin etmək məqsədilə lazımi işlər görülür.

Əliqismət BƏDƏLOV
XQ