İşsizlərdən niyə plastik kart tələb olunur?
Azərbaycanda sağlamlıq haqqında arayış üçün vətəndaşdan 40 manat dövlət rüsusmu tələb olunur. Tibbi arayışın baha olması barədə Milli Məclisdə dəfələrlə məsələ qaldırılıb, şikayətlər səslənib. Müzakirələr zamanı bildirilib ki, bu məbləğ imkansız ailə üçün bir kisə un deməkdir.
Eyni zamanda, son günlər sosial şəbəkələrdə poliklinikalarda sağlamlıq haqqında arayışın alınması üçün rüsumun plastik kartla ödənilməsi müzakirələrə səbəb olub.
Bir qrup deputat bildirib ki, poliklinikaya sağlamlıq arayışı almağa gələn şəxslər, adətən, işə düzəlmək istəyənlərdir. Hələ işə düzəlməyən şəxsdən plastik kart tələb etmək nə dərəcədə doğrudur?
Qadınların əmək hüquqları artırılır
Milli Məclisdə müzakirəyə çıxarılan “Azərbaycan Respublikasının Əmək Məcəlləsində dəyişiklik edilməsi barədə qanun layihəsində” bəzi yeniliklər nəzərdə tutlub. Bu barədə parlamentin Əmək və sosial siyasət komitəsinin sədri Musa Quliyev məlumat verib. Dəyişikliyə görə, hamilə, üç yaşına qədər uşağı olan və 18 yaşına qədər əlilliyi olan uşaqlara baxan qadınlar gecə növbələrində, bayram günlərində könüllülük əsasında işə, ezamiyyəyə cəlb oluna bilərlər.
Mövcud qanuna görə bu kateqoriyadan olan azyaşlılara baxan qadınların gecə növbələrində, bayram günlərində işləməsinə qadağa qoyulub. Həmçinin ezamiyyə getmələrinə də icazə yoxdur.
Qanun layihəsinə gözlənilən dəyişikliyin əsas məqsədi ölkədə qadın və kişilərin əmək haqları arasında fərqi azaltmaqdır.
Hazırladı:
Əliqismət BƏDƏLOV
XQ