Türkiyə Cümhuriyyətinin Atatürk Kültür, Dil və Tarix Yüksək Qurumunun ali mükafatı olan “Türk dilinə xidmət” mükafatına layiq görülənlər sırasında Türkiyənin Egey Universitetinin professoru, Türkiyə Yazarlar Birliyi, Türk Mədəniyyəti Araşdırma İnstitutunun üzvü, görkəmli yazıçısı-alim Əli Yavuz Akpınar da var.
Ali mükafata layiq görülən Yavuz Akpınar Azərbaycanın yaxın dostu, AYB-nin üzvü, BDU-nun fəxri professorudur. Hələ sovet dövründə müasir Azərbaycan ədəbiyyatının qurucusu olan Mirzə Fətəli Axundzadə haqqında doktorluq işi müdafiə etmiş, Azərbaycan mədəniyyətinin təbliği sahəsində gördüyü böyük işlərə görə 1989-cu ildə Dövlət mükafatına layiq görülmüşdür. Yavuz Akpınarın Azərbaycanda türkçülük ənənələrinin oyanış və formalaşmasında, böyük bir ədəbiyyatçılar nəslinin yetişməsində əvəzsiz xidmətləri və zəhməti olmuşdur.
Bakıda Qulam Məmmədli, Həmid Araslı, Mirzağa Quluzadə, Rəsul Rza, Abbas Zamanov, Kamal Talıbzadə, Bəxtiyar Vahabzadə, Nəbi Xəzri, Aqşin Babayev, Elçin, Anar, İsa Həbibbəyli, Kamil Vəliyev, Rəfael Hüseynov, Əsgər Rəsulov, Vilayət Quliyev, Sabir Rüstəmxanlı, Moskvada Əkbər Babayev və başqaları ilə dərin dostluq əlaqələri olan Yavuz Akpınarın Azərbaycan ədəbiyyatının qardaş Türkiyədə tanıdılmasında müstəsna xidmətləri danılmazdır. Azərbaycan Türk Mədəniyyətini Tanıtma Dərnəyinin prezidenti mərhum İbrahim Bozyellə nəşr etdirdikləri "Qardaş ədəbiyyatlar" jurnalı vasitəsilə Türkiyədə Azərbaycan, özbək, türkmən, tatar ədəbiyyatının tanıdılmasında əvəzsiz rolu olub. Alimin şəxsi arxivində Azərbaycan ziyalılarına aid yüzlərlə məktub saxlanılır. Akademik İsa Həbibbəyli onu "Azərbaycan ədəbiyyatının Türkiyədə baş konsulu" adlandırıb, Vilayət Quliyev isə Akpınarın “Ümumtürk mədəniyyətinə təmənnasız xidmətini haqq yolu"na xidmət kimi dəyərləndirib.
Görkəmli alim Azərbaycan ədəbiyyatını təkcə Türkiyədə, türk dünyasında deyil, uzaq ABŞ-da da uğurla təbliğ edən alimlərdən olmuşdur. 1992-1993-cü illərdə Miçiqan Universitetində türkologiya sahəsində qonaq mühazirəçi kimi çalışdığı illərdə “Amerikanın səsi” radiosunun Azərbaycan xidməti ilə əməkdaşlıq etmiş, davamlı olaraq ədəbiyyat və mədəniyyətimizlə bağlı müəllif proqramının müəllifi və aparıcısı olmuşdur.
Dəfələrlə redaksiyamızın qonağı olan fədəkar alim və dəyərli dostumuz professor Yavuz Akpınarı aldığı ali mükafat münasibəti ilə təbrik edir, can sağlığı, fəaliyyətində uğurlar arzulayırıq.
N.QƏDİMOĞLU
XQ