Bu hadisə ciddi qalmaqala səbəb olub

Türkiyənin “Ankaragücü” klubunun prezidenti Faruk Koca da daxil olmaqla, 3 şübhəli şəxs həbs edilib. Buna 59 yaşlı funksionerin Superliqanın son turunda “Rizəspor”la matçdan sonra meydana daxil olaraq, baş hakim Halil Umut Meleri yumruqla vurmağı səbəb olub. 

Hadisədən sonra xəstəxanaya yer­ləşdirilən Halil Umut Meler Ankara Polis İdman Təhlükəsizlik Şöbəsi əməkdaşları­na ifadə verib. Hakim ona qarşı hücumda iştirak edən hər kəsdən şikayətçi olub. 

Bununla əlaqədar fövqəladə iclas ke­çirən Türkiyə Futbol Federasiyası bütün liqalarda matçların qeyri-müəyyən müd­dətədək təxirə salınmasına qərar verib. Türkiyə Aktiv Futbol Hakimləri və Müşa­hidəçiləri Dərnəyi isə referilərin bu həftə çempionat oyunlarına çıxmayacaqlarını elan edib.

FIFA prezidenti Canni İnfan­tino şəxsi instaqram hesabında­kı paylaşımında meydanda və ya meydandan kənarda şiddətə qətiyyən yer olmadığını bildirib. Qurum rəsmisi "Ankaragücü" - "Rizəspor" matçından sonra baş verən hadisələrin tamamilə qə­buledilməz olduğunu vurğulayıb: “Hakimlər, futbolçular, azarkeşlər və nümayəndələr oyundan həzz almaq üçün təhlükəsiz olmalıdırlar. Müvafiq orqanları bunu ciddi şəkildə yerinə yetir­məyə çağırıram".

Qeyd edək ki, “Ankaragücü” – “Rizəspor” qarşılaşması 1:1 hesabı ilə yekunlaşıb. 

L.QURBANOVA
XQ