Noyabrın 22-də Ədliyyə Nazirliyində ədliyyə orqanlarının 105 illiyi və peşə bayramı günü münasibətilə təntənəli yığıncaq keçirilib.
Ədliyyə naziri Fikrət Məmmədov peşə bayramı günü münasibətilə ədliyyə işçilərini təbrik edib, builki bayramın “Heydər Əliyev İli”ndə və Prezident, Müzəffər Ali Baş Komandan İlham Əliyevin rəhbərliyi ilə Vətənimizin ərazi bütövlüyünün və suverenliyinin tam təmin edilməsi ilə bağlı tarixi Zəfərimizin yaşatdığı yüksək qürur hissi ilə qeyd olunduğunu bildirib.
Ümummilli liderin xalqımız və dövlətimiz qarşısında misilsiz xidmətləri, Azərbaycan ədliyyəsinə daim xüsusi diqqət göstərdiyi vurğulanıb, yubiley ilində “Heydər Əliyev və Azərbaycan ədliyyəsi” xüsusi kitabının hazırlandığı bildirilib.
Nazir Prezident İlham Əliyevin 20 illik zəfər yolundan danışaraq ölkəmizin davamlı sosial-iqtisadi inkişafını, beynəlxalq aləmdə nüfuzunun günbəgün yüksəlməsini qeyd edib. Bildirib ki, Ümummilli liderin şah əsəri olan müstəqil Azərbaycan dövləti özünün ən qüdrətli dövrünü yaşayır, bayrağımız azad edilmiş bütün torpaqlarımızda – Şuşada, Xankəndidə vüqarla dalğalanır.
Dövlətimizin başçısının rəhbərliyi və Birinci vitse-prezident Mehriban xanım Əliyevanın fəal iştirakı ilə doğma torpaqlarımızda sürətli bərpa-quruculuq işləri aparılaraq Qarabağ və Şərqi Zəngəzur dirçəlir, soydaşlarımız öz dədə-baba yurdlarına dönərək orada həyat yenidən qaynayır.
Konstitusiya Məhkəməsinin sədri Fərhad Abdullayev və Ali Məhkəmənin sədri İnam Kərimov çıxış edərək ədliyyə işçilərinin peşə bayramı günü münasibətilə təbriklərini çatdırıb, insan hüquqlarının və qanunun aliliyinin təmin olunması sahəsində ədliyyə orqanlarının əməkdaşlarına uğurlu fəaliyyət arzulayıblar.
XQ