Çinin Şanxay şəhərində Azərbaycan-Çin Hökumətlərarası Ticarət-İqtisadi Əməkdaşlıq Komissiyasının 9-cu iclası keçirilib.
Iclasda Azərbaycan nümayəndə heyətinə Baş nazirin müavini, Azərbaycan–Çin Hökumətlərarası Ticarət-İqtisadi Əməkdaşlıq Komissiyasının həmsədri Şahin Mustafayev, Çin tərəfinə isə ticarət nazirinin müavini, hökumətlərarası komissiyanın həmsədri Lin Ci rəhbərlik edib.
Ş.Mustafayev iki ölkənin ticari-iqtisadi istiqamət də daxil olmaqla müxtəlif sahələrdə uğurla əməkdaşlıq etdiyini, qarşıda iqtisadi əməkdaşlığın keyfiyyətcə yeni məzmun ilə zənginləşdirilməsi vəzifəsi durduğunu bildirib. O, ötən il Azərbaycan–Çin ticarət əlaqələrinin həcminin əvvəlki illə müqayisədə 21 faiz çoxaldığını, qarşılıqlı ticarətin cari ilin 9 ayı ərzində təxminən 50 faiz artmasının müsbət dinamikanın göstəricisi olduğunu deyib.
Çinin ticarət nazirinin müavini, hökumətlərarası komissiyanın həmsədri Lin Ci Çin–Azərbaycan münasibətlərinin bütün sahələrdə yüksək səviyyədə inkişaf etdiyini bildirib, əməkdaşlığımızın inkişafında dövlət başçısının səylərini vurğulayıb. Bu xüsusda Çin Xalq Respublikasının Sədri Si Cinpin ilə Azərbaycan Prezidenti İlham Əliyevin ötən il Şanxay Əməkdaşlıq Təşkilatının Səmərqənddəki Zirvə toplantısı çərçivəsində görüşünün əhəmiyyəti qeyd edilib.
Sonda Azərbaycan-Çin Hökumətlərarası Ticarət-İqtisadi Əməkdaşlıq Komissiyasının 9-cu iclasının protokolu imzalanıb.
***
Baş nazirin müavini Şahin Mustafayev 6-cı Çin Beynəlxalq İdxal Sərgisi çərçivəsində təşkil olunan Honçiao Beynəlxalq İqtisadi Forumunun “Qlobal ekoloji sivilizasiyanın qurulması üçün yaşıl investisiya və ticarətin inkişaf etdirilməsi” adlı plenar iclasında çıxışı edib. O bildirib ki, son illər Azərbaycanın Çin ilə iqtisadi əməkdaşlığı genişlənərək bütün sahələrdə nəzərəçarpacaq inkişafa səbəb olub. Azərbaycan ilk dövrdən Çin Xalq Respublikasının (ÇXR) Sədri Si Cinpinin iki ölkə arasında əlaqələri gücləndirən və müxtəlif sahələrdə yeni əməkdaşlıq imkanları yaradan “Bir kəmər, bir yol” təşəbbüsünü dəstəkləyib. Azərbaycan bu təşəbbüsün əsas istiqamətlərindən biri olan “yaşıl inkişaf”ın təşviqini də dəstəkləyir.
Azərbaycanın 2030-cu ilədək alternativ və bərpaolunan mənbələrdən əldə edilən enerjinin həcmini 30 faizə çatdırmaqda qərarlı olduğunu bildirən Ş.Mustafayev işğaldan azad olunan Qarabağ və Şərqi Zəngəzur iqtisadi rayonlarının Prezident İlham Əliyevin tapşırığı ilə “Yaşıl enerji zonası” konsepsiyası formatında bərpa edildiyini, həmin ərazilərdə ən müasir texnologiya və konsepsiyaların, o cümlədən “ağıllı kənd”, “ağıllı şəhər”, “ağıllı kənd təsərrüfatı” və “yaşıl enerji”nin tətbiq olunduğunu diqqətə çatdırıb.
Ölkəmizin alternativ və bərpaolunan enerji potensialı haqqında məlumat verən Baş nazirin müavini bildirib ki, bu sahə artıq Azərbaycanda xarici investisiyaların əsas mənbəyinə çevrilib. O, Azərbaycandakı “yaşıl enerji” layihələrində Çin şirkətləri ilə uğurlu əməkdaşlıq qurulduğunu deyib.
Ş.Mustafayev diqqətə çatdırıb ki, ötən ilin dekabrında Buxarestdə Azərbaycan, Gürcüstan, Rumıniya və Macarıstan hökumətləri arasında yaşıl enerjinin inkişafı və ötürülməsi sahəsində strateji tərəfdaşlıq haqqında imzalanan Sazişə əsasən Azərbaycanda istehsal edilən “yaşıl enerji” Avropaya nəql olunacaq.
XQ