Milli Məclisin Sədri Sahibə Qafarova Rumıniyaya rəsmi səfəri çərçivəsində bu ölkənin Baş naziri İon-Marçel Çolaku ilə görüşüb.
Milli Məclisin Mətbuat və ictimaiyyətlə əlaqələr şöbəsindən qəzetimizə verilən məlumatda bildirilir ki, qonaqları salamlayan Rumıniyanın Baş naziri Azərbaycana səfərini və səfər çərçivəsində Prezident İlham Əliyevlə görüşünü xoş təəssüratlarla xatırlayıb. O, iki ölkə arasında strateji münasibətlərin uğurla inkişafını qeyd edərək, Azərbaycan və Rumıniyanın sadəcə tərəfdaş deyil, həm də dost ölkələr olduğunu vurğulayıb. Baş nazirin sözlərinə görə, Azərbaycanın dövlət müstəqilliyini Türkiyədən sonra dünyada ikinci tanıyan ölkə Rumıniyadır. Həmçinin, Rumıniya Azərbaycanla strateji tərəfdaşlığa dair saziş imzalayan ilk Avropa İttifaqı ölkəsidir. Azərbaycanın Rumıniyanın Cənubi Qafqazda birinci ticarət tərəfdaşı olduğunu diqqətə çatdıran İon-Marçel Çolaku ölkələrimiz arasında iqtisadi əlaqələrin inkişafı üçün daha böyük potensial olduğunu qeyd edib.
İ.Çolaku, həmçinin Azərbaycanın Avropa İttifaqının enerji təhlükəsizliyinin təmin olunmasında mühüm rolu barədə danışıb. O, avropalı həmkarları ilə də Cənub Qaz dəhlizini müzakirə etdiyini xatırladaraq deyib ki, nəqliyyat sahəsində də Azərbaycan mühüm rola malikdir. Onun sözlərinə görə, Qara dəniz və Xəzər dənizi arasında nəqliyyat bağlantısının gücləndirilməsi üçün yaxşı imkanlar mövcuddur. “Yaşıl enerji” layihələrinin vacibliyini vurğulayan İon-Marçel Çolaku deyib ki, Avropanın hazırda “yaşıl enerji”yə ciddi ehtiyacı var. Azərbaycandan “yaşıl enerji”nin ixracı məsələsi əhəmiyyətlidir.
Milli Məclisin Sədri Sahibə Qafarova Azərbaycan-Rumıniya dostluq münasibətlərinin strateji tərəfdaşlıq səviyyəsində uğurla inkişaf etdiyini deyərək, Baş nazirin Rumıniya Deputatlar Palatasının Sədri kimi cari ilin fevral ayında ölkəmizə səfərini və onunla görüşünü məmnunluqla xatırlayıb. O, ikitərəfli münasibətlərin inkişafında dövlət başçıları səviyyəsində qarşılıqlı səfərlər və görüşlərin müstəsna rolunu qeyd edərək, Azərbaycan və Rumıniya prezidentlərinin qarşılıqlı səfərlərini xatırladıb. S.Qafarova bu səfərlərin ölkələrimiz arasında yüksək səviyyəli fəal siyasi dialoqun mövcudluğunun göstəricisi olduğunu bildirib.
Parlamentinin rəhbəri iki ölkə arasında imzalanmış müqavilələrdən söhbət açıb və deyib ki, hüquqi baza kifayət qədər zəngindir. Qeyd olunub ki, bu günə qədər iki ölkə arasında 60-dan çox sənəd imzalanıb. Bu da ikitərəfli münasibətlər üçün mühüm hüquqi baza təşkil edir. Onun sözlərinə görə, hazıra ölkələrimiz arasında iqtisadiyyat, enerji sahəsində əlaqələr yaxşı səviyyədədir, ticarət dövriyyəsi getdikcə artmaqdadır. Bununla yanaşı, müxtəlif sahələr üzrə əməkdaşlığın genişləndirilməsi üçün əlverişli potensial var.
S.Qafarovanın sözlərinə görə, hazırda enerji təhlükəsizliyi məsələsində yeni perspektivlər var. O cümlədən, “yaşıl enerji” sahəsində əməkdaşlığın gücləndirilməsi imkanları mövcuddur.
Sahibə xanım Ermənistanın işğalçılıq siyasətindən də söhbət açıb. O, BMT Təhlükəsizlik Şurası və digər beynəlxalq təşkilatlar tərəfindən qəbul olunmuş və ərazilərimizin Ermənistanın işğalından azad edilməsini nəzərdə tutan qətnamələrin 30 ilə yaxın icra olunmamasını diqqətə çatdırıb. 2020-ci ildə Azərbaycanın öz gücünə həmin qətnamələrin icrasını yerinə yetirib. Amma çox paradoksaldır ki, bu gün bəzi dairələr özünün beynəlxalq hüquqla tanınmış, təsdiq olunmuş ərazi bütövlüyünü və suverenliyini bərpa etdiyi üçün Azərbaycana qarşı qərəzli bəyanatlar səsləndirirlər.
Baz nazir İ.Çolaku Rumıniyanın hər zaman Azərbaycanın ərazi bütövlüyünü dəstəklədiyini, tezliklə Azərbaycanla Ermənistan arasında sülh sazişinin imzalanmasını arzuladıqlarını diqqətə çatdırıb.
***
Rumıniyada rəsmi səfərdə olan Milli Məclisin Sədri Sahibə Qafarovanın başçılıq etdiyi parlament nümayəndə heyəti Buxarestdəki “Tey” parkında Azərbaycan xalqının ümummilli lideri Heydər Əliyevin abidəsini ziyarət edib və abidənin önünə əklil qoyub.
Xatırladaq ki, 2004-cü ildə Prezident İlham Əliyevin iştirakı ilə Buxarestdə ulu öndər Heydər Əliyevin abidəsinin açılışı olub. Dünya şöhrətli siyasi xadim Heydər Əliyevin Buxarestdə abidəsinin qoyulması Azərbaycan-Rumıniya əlaqələrinin inkişafının təzahürüdür.
Əliqismət BƏDƏLOV
XQ